القائمة الرئيسية

الصفحات

نهار تصاحبت حملت / الأجزاء السابعة ما قبل الأخيرة 2019

9isas Maghribiya

✎ بقلم : نهيلة سليمي 

لنبدأ بسم الله

قراءة ممتعة الأجزاء السابعة و ما قبلا الأخيرة :


وأنهم بغاو يوجدو للعرس مباشرة من بعد الخطبة،
وقلت ليه ما كاين مشكل، غير نعلم ماما وأحبيبتي باش تكون في راسهم، قال لي يا الله تهلاي في راسك وفي وصال.


ومشيت قلتها لحبيبتي واتصلت بي ماما وقلتها ليها وفرحات بزاف وبقات تبكي وتزغرد مسكينة، وقالت لي غاديا نجي عندك غدا إن شاء الله نوجد معاك ونحضر معاك أبنتي، وغاديا نشوف مع خوتك إلى بغاو يجيو معايا الله يهديهم
تفكرت بابا وبقيت نبكي ونعانق في تصويرة صغيرة ديالو ونبوس فيها، وتمنيت أنه يكون معانا ولكن آش نعمل هادا قدر الله والمكتوب، وفي الغد غير فقت من النعاس سمعت ماما كتهضر في الدروج مع احبيبتي مولات الدار، جات مسكينة بكري مع الفجر، ودخلات عند احبيبتي ونزلت عندهم، من بعد ما لبست بنتي وصال ونزلتها معايا، وفرحات ماما وبدات تزغرد وتعانق فيا، وقالت لي راه خويا الكبير هو اللي جابها بالطوموبيل وأنه قال ليها تقولي الله يبارك والله يعمل ليك اللي فيها الخير، وأنه قال ليها ما نقدرش نشوفها ولا نهضر معاها، الله يسامحها واله يسهل عليها وخلاص، وبقيت نبكي وأنا كنشوف كيفاش خوتي من لحمي ودمي ما بقاوش قادرين يشوفوني ولا يهضرو معايا، لهاد الدرجة غلطة وحدة حرماتني من خوتي ؟
غلطة وحدة خلاتني نشتاق نعانق خوتي وجلس معاهم ونضحك معاهم كيف كنت ؟ كنت أعز وحدة في الدنيا عندهم، كانو كيقولو لماما راها أعز علينا منك والله ، كان اللي اخرج منهم كيجيب لي في ليدو زريعو ولا مسكة ولا حلوة كل نهار، واللي بغى يعمل شي حاجة فيهم حتى يشاورني ويهضر معايا، كنتفكر خوتي ونبكي بالدم والدموع حتى تنشف عيني، ولكن هذا مكتاب الله.



ودازت الخطبة زوينة وجات أم عزيز واخواتاتو بجوج وخالتو وشي ناس قرابين منهم، وأنا حضرات معايا ماما وخالتي وعبد الكبير الشاف ديالي، وشي بنات خدامين معايا صحاباتي، وبنت احبيبتي وراجلها، وشحال خالتي بكات مسكينة وطلبات مني السماحة وقلت ليها انتي ما عليك والو، وحتى راجلك راه مسكين خاف على سمعة بناتو، وصافي الأمور دازت بخير، وكتبنا العقد ديال الزواج نهار الثلاثاء، ومن بعد صافي وليت كنخرج مع عزيز أنا وصال، وتهلى فيها بزاف وخلاها حتى هي كتموت عليه، وبدات كتقول ليه بابا، وهو فرحان بيها بزاف ما كيخلي
ما يشري ليها، وأنا فرحت بزاف وبديت نوجد للعرس أنا وياه.


اعملنا العقد ديال الزواج أنا وعزيز وبدينا كنوجدو للعرس، ولكن المشكلة هي أن طليقة عزيز خرجات لينا من الجنب، تصورو أنها كانت قبل ما ندخل أنا لحياة عزيز كتمنع عليه يشوف اولادو وكتحاول تكرههم فيه، قليل فين كيشوفهم مسكين، وملي عرفاتو تزوجني ووصلاتها الأخبار ديالنا بدات كتعيط ليه كل ساعة، مرة ولدك مريض، مرة راه اولادك كيبكيو توحشوك وبغاو يشوفوك، كل مرة حجة، وأنا كنت كنقول ليه ماشي مشكل راهم اولادك، وهوما محتاجين ليك، ولكن هو كان كيبان لي مخبي شي حاجة، فينما كيجي من عندهم كيبان لي مغير ومهموم، وحاولت معاه وبزز قال لي واحد نهار ما باقيش نمشي عندها راها لصقاتني باغياني نرجعها هي واولادها وكتطلب مني السماحة وقالت لي باللي ما كانش عندها العقل وراها عرفات دابا المكانة ديالو في حياتها،
عرفتو وخى أنا كنموت على عزيز وكنغير عليه من أي حاجة، قلت ليه هاديك راها أم أولادك وهادوك أولادك أنا اللي دخلت لحياتك في وقت ماشي مناسب، وقلت ليه أنا كيبان لي من الأحسن ليك والأحسن لهادوك الأولاد مساكن أنك ترجعها وتطلقني وتعاود حياتك مع الأسرة ديالك من جديد، وكون على يقين راني غاديا نكون فرحانة ليكم وسعيدة بجمع الشمل ديالكم،


 وغاديا نكون أختك وتكون خويا العزيز إن شاء الله، عرفتو ما تصوروش أنه بدى يبكي وقال لي أنت ملاك ما عمرني شفت شي إنسانة في الطيبوبة ديالك، وأنا معاك عاد عرفت معنى الحياة ومعنى السعادة، قبل ما نعرفك راني كنت كنعيش الجحيم، ودبا باغيا ترميني في الجحيم بيديك، وعانقني لأول مرة مسكين كيعانقني ويقول لي هاديك راها لفعة، هاديك راها عينيها غير على الفلوس والدنيا والطمع، ماشي بحالك انتي اللي غير نية.

صافي بقا كيسايس فيها حتى خلاها تنساه شوية وقلبات عليه وما بقاتش كتبرزطو، ولكن المشكلة الكبيرة والمكيدة العظيمة اللي كانت كتوجد فيها لينا أنا وعزيز ما غادين نعرفوها حتى لنهار اللي غادين نمشيو أنا وعزيز لدارنا وفي أول ليلة في الدار، كانت ليلة كحلة، ومن بعدها غاديا تبدا أيام كحلة خلاتني استغفر الله العظيم نشك واش كاين شي حاجة اسميتها الرحمة، وقلت صافي أنا تخلقت باش نتعذب في الدنيا.



                                      الأجزاء الأخيرة ⇚

تعليقات

تعليقان (2)
إرسال تعليق
  1. site zwin bzzef kmli bha haka khti nouhaila bon courage

    ردحذف
  2. شكرا حبيبة , ديزولي على تعطيلا , راكي عارفا رمضان و الحياة ... , الجزء الأخير غدا انشروا انشاء الله

    ردحذف

إرسال تعليق

🔴 ممنوع قراءة القصص المخيلة للآداب و أنت على صيام