القائمة الرئيسية

الصفحات

4 - قصة الحلم الأسود بالدارجة





تتمة


4 - قصة الحلم الأسود بالدارجة


قال الحاج بسياسة : راك كتعرفها زعما حق المعرفة .. بنت مربية ومرزنة وحتى الواليد ديالها الله يعمرها دار..
شاف فيه باستغراب : شكون ؟؟

الحاج: اشراق... الصديقة ديالك ... مزيانة مافيها مايتعاب

حرك محمد طه راسو وقال: لا لا... مكنفكرش دابا فالزواج ومغنخليش ليلى اللي شحال وهي معلقة

تدخلات الحاجة بتسول: الله يرضي عليك الحبيب ديالي ماضيعش اشراق ... الله يرضي عليك دنيا واخرة ..(شدات ليه فيديه بتوسل) حتى الى مابغيتيهاش نتا جيبها ليا انا ... ماتخسرش ليا خاطري الله يرضي عليك..

الحاج بهدوء: ماتلقاش حسن منها وليلى ماشي من النصيب غيجيب ليها الله نصيبها الله يرضي عليك
كحزات حداه الحاجة باغا تبكي وكتشد ليه فيدو

- جيب ليا اشراق تبقا معايا المهم تسما مرت ولدي ... (حطات يدها على صدرها ) انا باغا ديك البنت وحامقة عليها عمرني بغيت شي وحدة فعيالات خوتك بحال اللي بغيتها .. جيبها ليا تعيش معايا هنايا وغنبقا نرضي عليك حياتي كاملة

قربات سلمى بشوية جلسات حداهم وقالت بهدوء

- ليلى طبعها فشكل مقادرينش نتافهمو معاها وكترد الهضرة مكتوقرش... اشراق من وجهها باينة بنت الناس.. واخا حتى واحد ما تزاد ملاك ولاكن على الاقل اشراق كتحتارم وديال العشرة ماشي بحال ليلى ..خايفين منها وتوقع منها اي حاجة

الحاج: نشاء الله بحول الله مغتبقاش هاد ليلى ... بقدرة الله تعالى اشراق اللي غتاخد وغتاخد معاها الرضا ديال واليديك وعمر سيدي ربي ما يخيبك

بقا ساكت كيشوف قدامو مطولا عاقد حجبانو وقال

- دابا بغيتو تندموني علاش جبتها لهنا وصافي

الحاج: لاااا الحبيب ديالي ماتقولش هاكاك .. ربي سخرها حتى جات ودار ليها السبب.. والى بغيتي ليلى الله يعاونك انا ماغندخلش كاع فيها .. جيب ليا غير اشراق اوليدي ديك البنية غنقطعها من لحمي والى ماجبتيهاش غتبقا فيا حرقة طول حياتي... عمرني رغبتك اماما اول مرة كنرغبك... (بتوسل) الله يرضي عليك الكبيدة ديالي ماضيعهاش وجيب ليها تبقا معايا باسمها مرات ولدي سيدي محمد طه ونفرح بيها ونتا الله يهديك من عندو حتى دير عقلك على خاطرك



وصلات اشراق لدار مسخسخة طاحت نعسات نيشان مافاقت حتى تنصص النهار فيقها اليتيلفون كيصوني وهزاتو لقات سلمى
اشراق: الو سلمى

سلمى: كبيدة ديالي ... كي بقيتي ؟

اشراق: الحمد الله احبيبة ونتي

سلمى : انا صبحت ناشطة مقاداني فرحة ههه

اشراق: ياك الاللة خهه ايوا فرحينا معاك حتى حنا

ضحكات سلمى وقالت: ايوا الاللة غنجيو طالبين راغبين فيك الى بغيتي

حلات اشراق عينيها بزوج وقال: نعام!!!؟

سلمى: الاللة محمد عجبتيه ... وبغاك فلحلال ... وحتى حنا بغيناك الى قبلتي علينا

بقات اشراق ساكتة مصدومة وعينيها كيبريو ماقدراتش تقول حتى كلمة .. ضحكات سلمى وقالت

- مالكي سكتي ههه ايوا ردي عليا شنو قلتي ههه راه ماعندناش الوقت خاصنا نجيو قبل مياخدوك لينا لخرين

اشراق: بارتباك) مم ما اا انا .. ماعرفت مانقول ليك صدمتيني

سلمى : ماعندك مناش تصدمي اكبيدة ديالي ... هضري مع داركم و هاكي هاكي الحاجة بغات تهضر معاك.

الحاجة: الو بنتي ... كي بقيتي شوية

قالت اشراق بخجل) الحمد لله نتوما كي صبحتو

قالت الحاجة بسعادة : الحمد الله اماما ... ايوا شنو قلتي ؟ راه ولدي بغاك فلحلال اش كتقولي نتي؟

بقات اشراق ساكتة كتشوف قدامها حشمانة والشعر مديلي على وجهها ماهضراتش

الحاجة : السكووووت علامة الرضا ههه صافي عطيني النمرة دماماك نعيط ليها باش نجيو راه والله منخليك لهادوك يدوك

ضحكات اشراق وقالت بخجل : واخا نشاء الله

خدات سلمى تيليفون : الو عروستنا ههه وجدي ليا رسك هاا ... راه خويا كيبغي الزين هه امرت القاضي هههه

بقات اشراق كضحك بخجل وسلمى شادة فيها .قطعات وبقات يابسة فبلاصتها غير كتشوف مصدومة تخلطو عليا الافكار ماعرفاتش واش كتحلم ولا بصح. دخلات عليها خليج لقاتها كضحك بوحدها وقالت

- مالكي كضحكي ياك لاباس؟

شافت فيها اشراق فصدمة وابتسامة : تخيلي شكون جاي يخطبني

خلييج: داك زرق الزنفارة شكون!

اشراق: لا... محمد طه


 لسات خليج مصدومة كتشوف فيها وترسم ضحكة على وجهها فدهول
- حلفي!!! كتهضري بصح!!! هي زرك الزنفارة راح فستين داهية

ضحكات اشراق وقالت : راااح اختي رااح ههه (دارت يدها على فمه) ناري صدموني .... مامتيقاش والله

خليج: ايوا شكون بحال غتزوجي بالقاضي ولد الناجي

قالت اشراق فدهشة: عمرني تخيلتها !!!

دورات خليج راسها وقالت: اااحححياني عليك كاين شي وحدة تشوف قاضي ولد الناجي ومنحفرش ليه طيحو ولا كنتي كتستاي بيلوط حتى نتي

اشراق: باشمأزاز ) كنت كنتسنا كيلوط حيدي نوض غتمشي للدار نقولها لماما

ناضت بالزربة لبسات حوايجها وخرجات بلا فطور مشات لدارهم نيشان ودخلات عليهم على غفلة قفزات مها اللي واقفة فلكوزينة

اشراق: ماااما ماااما... جاوني الخطاب

قالت الحاجة : بشوية عليك سلمي بعدا

طلعتت اشراق اللثام وقالت وسلمات وقالت : جاوني الخطااااب

لاللة نزيهة : شكون هاد الخطاب ؟؟؟

اشراق: واحد الناس الله يعمرها دار خو صاحبتي

مسحات لاللة نزيهة ديديها وقالت : شكون وشنو كيدير ؟

اشراق بلهفة: قاااااضي

لاللة نزيهة : قاضي!!! نيت ولا غير خدام فمحكمة !

اشراق: لااا قاااضي بالمطرقة اشمن وءت.ء. ولد الناجي

لاللة نزيهة : شكون هاد الناجي؟؟


اشراق : الناجي مالين الذهب عندهم محلات ديال الذهب معروووفين
ابتاسمات لاللة نزيهة وقالت: ايوا الله يكمل بلخير .. فوقاش قالك غيجي

اشراق: ماعرفتش مهم عطيتهم النمرة ديالك غيهضرو معاك ... وهاداك الزمر اللي جا شنو غنديرو فيه

دخلات عليهم الجدة بلا حس كتسنط وهي تحمحم لاللة نزيهة وجرات اشراق بشوية

- احمم . اجي قيسي واحد البيجامة شريتها ليك ... شوفي واش تجي قدك

دخلاتها البيت سدات عليهم وقالت بصوت خافت

- عنداك تجبدي الهضرة حدا جداك ضرب ليك الطر صافي سكتي

اشراق: وداك النوصيبة شنو غنديرو فيه

لاللة نزيهة : غي سكتي نتي وصافي دابا وسيري رجعي عند ختك جلسي معاه تما حتى نعيط ليك

قالت اشراق بتدمر: وشنووو غنديرو دابا راه والله منتزوج بيه


مشات رجعات لدار خليج عاوتاني وجلساش هي وعقلها كتدي وتجيب.. شنو غيوقع دابا عنداك بابا ميبغيش ؟ عنداك يرفض ويزوجيني لداك الموصيبة لكحلة ؟ ناري الخوف دخلني ومزاال حتى مصدقتش الحاجة جايا تخطبني ... علاش مابين ليا والو ومالمحش ليا كاع ؟ ولاكن كان خايف عليا الصراحة فاش طحت وتقصحت ... كان فالاول مقادرش يقرب مني غير خلاونا بوحدنا قرب وبدا كيسولني وبغا يديني سبيطار .. اجي وليلى شنو دار معاه غيضرب عشرة ديال سبع سنين فرمشت عين! صافي سالا معاها دغيا قدر يسمح فيها ويبغيني انا!! الا بصح قدر يديرها راه مايسواش ! واناااا مااااالي ااااش دخلني فيها راه سبع سنين وهما بجوج وقدامهم فرص كن بغاو يتزوجو غيتزوجو علاش كنعقد الامور السيد جاني من الباب بغا لحلال علاش مزالة كنقلب ونسول؟؟ سبع سنين ولا عشر سنين ولا مية عام مالي غنجي على الضرة ! ياااه شحال فيا حتى انا الناس شادينها منين سهالت وانا باغا نتفلسف يضبر راسو معاها المهم بغاني فلحلال ماشي جا عندي يتصاحب ويجرني معاه واحد سبع سنين اخرى

العقل كيدي ويجيب وهي كتخمم وتشاور مع راسها اما خليج خرجات كتجري على وراقها تلحق على راجلها . داز عندها النهار طويل ماشي بحال كاع الايام . تعاشات العشية وهزات تيليفون تاصلات بلاللة نزيهة
اشراق : الو ماما ... عيطات ليك الحاجة ؟

لالة نزيهة : لا عيط باه لباباك عاد دابا هضر معاه فتيليفون .. قاليه غنجيو نخطبو اشراق قاليه باباك مرحبا ودار معاه دوز هاد السيمانة عاد يجيو

ضربات حنكها: اويييييلي على دوز سيمانة ياكما بابا ناوي ليا على شي حاجة

لاللة نزيهة : نوي الخير تلقايه الله يستر على كنس .. بقاي تما ماتجيش حتى نعيط ليك وعاد اجي

اشراق: راه كتقلبو نشنق راسي ... راه نديرها

لاللة نزيهة : واش باغا تعصبيني ... جلسي وسكتي خلي هاد الروينة دوز على خير(قطعات عليها)


شدات اشراق الارض فدار ختها كتسنا محمد طه يعيط ولا يسول ولا المهم اي حاجة يبينها ليها كراجل عجباتو مرى بغا يتزوج بيها لاكن والو الاسبوع كامل ما عيط ما سول ما سيفط شي مسج .. بقات الهضرة غير بينها وبين سلمى اللي كتعطيها الاعذار كل مرة عذر جديد حتى وصل النهار ديال الخطبة لاكن الخطبة المنحوسة ديال المنحوس اللي جاي يخطبها .. جلسات فالصالوت على اعصابها وخليج كتلبس جلابتها
اشراق: ناااري قلبي مامهينيش .. ياك بابا غيرفض صافي حيت طه غيجي

خليج: داكشي اللي كيبان ليا ميمكنش بابا يتعامل مع الحاج الناجي بحقارة من بعد ما صافي قاليه مرحبا

ردت اشراق كتحك فخادها بتوثر: وعلاش ماما قالت ليا ما تجيش

خليج : انا غنرد عليك الخبار نتي بقاي هنا عنداك تهوري.. هانا مشيت

خرجات خليج وبقات اشراق فالدار على اعصابها كتسنا وتمشي وتجي وكتصوني مكيجاوبها حتى واحد ... العقل غيخرج بلاصتو ولا من يرد ليها الخبار ديال هاد الخطبة المنحوسة.

بقات جالسة شاردة حتى رن التيليفون وقفزات من بلاصتها جاوبات بلهفة

- الو خليج شنو وقع ؟ شنو كاين؟

ردت خليج بسرعة : ويييلي ويييلي كارثة كاااااارثة مطيحش ليك على بالك هانا فطريق هانا قريبة

وقفات اشراق مخلوعة : شنو اللي وقع هضري مديريش ليا بحال هاكا هضري مكنحملش اللي يدير ليا هااااااكاااا

خليج: وا صافي هانا وصلت هانا طالعة

لاحت اشراق تيليفون ومشات كتجري تعرضات ليها فالباب حلات ليها وبدات تسنا الاسانسور حتى خرات منو خليج وشداتها اشراق

- شنو وقع شنوووو هضريييي غتركبي فيا السكر

جراتها خليج لداخل وسدات الباب ولاحت الصاك وبدات تشالي بيديها وضحك
- فضيييحة الحاج عبد الغني صدق مطاااااااور الاللة ... تافق ماللول هوا با سيدي من مور ما جا كحل الزنفارة يخطبك ومشا تافقو يزوجو ليه فدوى بنت عمي ..باش يرجع الصلح بين با سيدي وعمي قاليه داك الطيران اللي فيها جيبها لهنا غنزوجوها بغات ولا كرهات وحتى عمي ااااصلا ساخط عليها بغا يتفك منها ومن الفضيحة اللي دارت لينا وسط العائلة قاليهم تزوج .. شغتبقا دير عندي هنا .. ايوا صافي جا كحل الزنفارة عوال على ضريب الصداقو وجد باك كووولشي وجاب العدول وجلسهم فالصالة و ناضت مو قالت ليك جيبو لينا لعروسة لهنا وبدات تشرط على ماما بحال الى جايا بزز ... هزوليها الخاطر وال ليهم بابا لا لعروسة منبقة . . . جاب لاكارط ديالها وصاااافي عقدو وتجمعاتالحفلة هه قال ليهم نشوفها قالو ليه غدا غنديرو صداقة ودي مرتك مكاين عرس ولا يحزانون

حلات اشراق فمها وقالت :وهي شنو قالت؟؟؟

خليج : جالسة فالبيت ومدورة وجهها مكتشوفش فينا وماعارفاش باللي جاي يخطبك نتي ولسقوه ليها هي كيحساب ليها جا يخطبها نيشان


وهي كتعاود صونا ليها هوا نيت وجاوباتو
- الو

- حبيبة مبروك علينا هانتي وليتي ديالي وجدي ليا ك***** راني شحال وانا صابر عليه

ضحكات باشمأزاز وقالت: الله يبارك فيك كنتمنا ندخل مباركة مسعودة عليك ... يالاه بسلامة حتى لغدا ماتشوفني

قطعات عليه وبدات كضحك : اويييلي با سيدي باقا فيه هاد القاعدة دعام نوضو تركدو !!!

خليج : ايوا هاكا كانو كيزوجو بناتهم شحال هادي كيسفطو الصغيرة للعين تسقي فاش كيجي شي حد يخطبها كيعطيوه لكبيرة .. حتى يدوز كلشي ويقولو ليهم ماعندنا بنات للزواج هاديك اللي عندنا راها عطيناها ليكم

اشراق: وييييلي على با سيدي ! عنداك يدير ليا شي فضيحة فلخطبة ديالي؟

وقفات خليج كضحك وتلمس فيها وقالت

- وشكون يقدر يلعب مع قضي القضا ... نتي راه جاي ليك سيدي القاااااضي ... يقولوها ويشللو بيها فمهم

اشراق: دورات راسها) خااايفة غير توقع شي موصيبة مع سي القاضي و السي ناجي... ولا با سيدي يزبلها ويقول ليهم (قلداتو) حنا مابغينااااش ديك الفضييحة ولاكن بنت عمها اللي صوراتها . (رجعات لصوتها) ايوا وينوض السي الناجي والحاجة كيقلبو علفيديو ويضرب ليا الحاج كوووولشي فزيرو ويخليني جالسة حداهم حتى يطيحو ليا السنان ويتخالط ليا فمي مع فمهم

ضحكات خليج وقالت: ماعرفتيش الى ناضت مي لالللة وقالت (قلداتها وقوصات ضهرها شوية) كما سترتيها الله يستر عرضك دنيااااا واخرة ... لحرام القصيص صوراتها بغات ليها الفضيحة ساعا زوجنااااها .. ايوا يا لاللة ينوضو يقلبو علاش سترك ياكما مفوهة من شي جهة هههههههه

تنهدات اشراق كضحك: محمد طه راه شايف الفيديو عارف شنو كاين وولد الوقت راه واليديه اللي غتزراق ليا معاهم ... مي لاللة وبا سيدي خاصنا نديرو ليهم شي حاجة ميحضروش ... والله حتى يزبلوها مالك مكتعرفيهمش !


قلبوها ضحك كيضحكو على جدهم وجداتهم وعلى طبعهم و الهضرة ديالهم حتى شبعو
خليج: نوووضي نشوفو شنو نوجدو لهاد الخطبة باش بغيتي نستقبلو الناس بالماء والزغارت ... وجدي ضهرك تهزي السدادر راه نزيهة قالت لينا اجيو تخملو الدار ههه

اشراق: فوقاش؟!

خليج: غدا ... قالت ليك غتخمل كولشي وتصبن الزرابي

شدات اشراق فضهرها : اناااري ضهري باقي كيضرني

خليج : ماعندي ما مدير ليك اختي التخمال هادا

مشاو رجعو للدار عند لاللة نزيهة وضحكو على شنو وقع حتى شبعو ... حضرو للصداقة اللي دارو وقطعات الهضرة مع فدوى ومع امها اللي كانت جالسة عندهم فالدار .. عزلو الرجال بوحدهم والعيالات بوحدهم و دازت الصداقة في سلام .. لبسو فدوى قفطان ودارو عليها توب على راسها غطاوها وخرجوها بالزغارت مشات مع راجلها .. اما اشراق ماخرجات ما طلات حتى خوات الدار فخطرة وصبحو كيخملو ويهزو ويحطو ... عطاتهم لاللة نزيهة شنو يديرو وخرجات سلتات تقدا وحصلو هما وسط الدار كيخملو ومكفضين البيجمات حتى للفوق والمياهات والصابون مزلع وكل وحدة علاياش كتشتف

قابت خليج وهي كترط داك الماء اللي جاي من الايو باش كتشلل اشراق الزرابي

- ولاهيلا نزيهة خلات لينا الروينة ومشات

وقفات اشراق وهزات جنب البيجامة مع الكيلوط وقالت سخفانة

- جري الزربية نطلعوها ... جريها تقسم ليا ضهري

خرجات الجدة من البيت معبسة : واش مزال مابغيتوش تجمعو علينا هاد الماء مالقينا منين ندوزو

خلفات اشراق برجليها حفيانة فوق الروينة وقالت

- سيري تجلسي سيري غضربي شي زلقة هنا ونصدقو فسييطارات كنتجاراو

خليج: مي لاللة سيري تجلسي راه عضامك هشاش

الحاجة : جمعوووو علياااا هاد الروينااا مالقيت فين نجلس

جلسات ليهم الحاجة على راسهم كتنكر وهما سخفانين فتخمال ... نهار كامل وهما غارقين بجوج هبطو الكوزينة كاملة وهزو الصالة كلها .. بدلو الطلامط حطو وحدين اخرين زورق وبدلو الريدوات وكلشي تصبن وطلع ينشف .. الحمام كيشعل والدار كضوي والكوزينة كتشقشق والبيوت كيشعلو ريحة النقا فالدار كتسرح المناخر. رجعات الحاجة هي والحاج مقديين من السوبر . دخلات لاللة نزيهة كدور عينيها ودوز يدها فوق الاثات وتشوف الغبرة واش باقا .. ضربات دورة فالدار ومشات كتقلب الحمام والقنات وهزات راسها فالسقف وقالت

- مامسحتوش هاد الثرياااات؟؟؟ شبعانين غبرة

خرجات اشراق من الكوزينة كتمسح يديها وقالت

- عييينا ضهرنا تقسم

لاللة نزيهة : مالكم اش درتو باش عيتو ؟ دوزتو جفاف وبدلتو الطلام عيييتو!!! ايهايهاي ... دوزي مسحي دوك التريات من الغبرة وهزي الزربية عاد دوزي عليهم

مشات اشراق هزات شيفون ودخلات دوزات عليهم بالزربة ورجعات للكوزينة لقات لاللة نزيهة جبدات ليهم خدمة اخرى .. كاع ديك التقدية حطاتها ليهم يستفوها ويغسلوها وهي جلسات رونات واحد الحلوة بالديسير ودارتها فالتلاجة
وقفات اشراق شادة ضهرها : ضهريييي ... ناري ضهري

سدات خليج التلاجة : صافي انا تفصلت ... غنمشي للحمام عفت راسي

اشراق: حتى انا

لاللة نزيهة : سيرو وسكنو عاوتاني

خليج: غنعيط لماريا تشد لنا نوبة (هزات تيليفون) الو ماريا ... الحمام خاوي احبيبة؟ صافي حجزي ليا انا واشراق واحد نص ساعة ونكونو عندك ... حمام روايال بجوج .. يالاه احبيبة بسلامة

قطعات ومشات جمعات حوايجها هي واشراق ودازو للصالة عند الحاج طيرو منو فليسات الحمام واخا هي ماطيروهاش منو موالف كيعطيهم ويزيدهم ويتهلا ومعيشهم اميرات مكيقولش بلخصوص مللي كتعلق شي حاجة براحتهم وسعادتهم .. واخا خليج تزوجات وعندها رزقها باقي باها كيحسبها من مصاريفو مكيهضرش فقضية الفلوس بالمرة .

مشاو ضربو تحميمة ومساج جبداتهم الكسالة مزيان ورجعو للدار مزنكين .. لبسو بيجامات وجاو مع لكوطي نيشان لقاو اتاي والحلوى و الكيكة اللي صايبات لاللة نزيهة محطوطة باردة بالديسير وجلسو كيرتاحو

هزات لاللة نزيهة يدها كتعمر اتاي وضحك وقالت

- ايوا اشراق... غدا جايين فيك الخطاب

قال باها كيضحك معاها : ها حنا عاوتاني غنوضو نجريو فالقاعة و فالدهاز ... نزوج بنتي العزيزة

حمار وجه اشراق ودورات وجهها للجنب حمرا وخليج مخرجة عينيها وفمها عامر

- بصح غيجيو غدا!!! جاب الله خملنا الدار !


تكمشات اشراق وجمعات رجليها فوق الفوطوي حدا جداتها وسكتات
الحاج: الحاج الناجي كنعرفو مزيان ... الله يعمرها دار .. شرا من عندي الفراش ما مرة ما جوج الله يعمرها سلعة لا هوا لا ولادو

الحاجة : الله يلاقينا مع ما احسن منا داكشي اللي بغينا ... مابغيناهش لاباااااس عليه ... يعيشها ويسعدها ويكون ولد الناس معاها وعائلتو محتارمين

قال الحاج وهوا متكي كيشرب اتاي: لااالا العائلة ديالهم مشييييت سولت عليها وكولشي كيعرفها ... ماعندهمش كاااع شي عطب .. ولادو كاملين قاريين ..شي على برا وشي هنا خدام ... عندو شي جوج بنيات وحدة مزوجة ومحامية .. و وحدة عندها البيرو فالسكك الحديدية .. و بقا عندو غير هاد الصغير فولادو راه تبارك الله تخرج فالقضاة ... ايوا نعام السي ولا قاضي تبارك الله ... عائلتهم مزيانة وناس الكرم والجود وتجار كبار مايخصها خير معاهم

لاللة نزيهة : ايوا الله يتاويهم للخير .. هادشي اللي بغينا لبناتنا

خليج: فراسك اباب قرا معايا... (تذاركات الموقف)

شافت فيها اشراق وخرجات عينيها وهي تقشعهم لاللة نزهة وقالت بتشكيك

- غير قولي قولي ... شنو بغيتي تقولي؟ شكون قرا معاك

قلباتها خليج بابتسامة كتلف وقالت: كان قرا معايا واحد الولد حتى هوا ورجع قاضي وصفاي

ردات ليها لاللة نزيهة نفس الابتسامة وقالت: اممم (شافت فأشراق بنص عين ) ماااانعرف علاش ساكتين نتوما

خزرات اشراق وقالت: بقاي تسكتي شوية كطيري

لاللة نزيهة : كطيرو بجوج ... حتى منكونش كنعرفكم احياااني على اللي عندو البنات


قال لحاج وهوا مرفوع مداهاش كاع فيهم
- انا يلا جات عليا كن تسنات حتى دارت شي خدمة ولا شي حاجة راسها عاد تزوج

اشراق: الخدمة غتهرب!

شافت فيها مها ردعاتها وقالت : ايييي على الخدمة غتهرب راه نتوما بنات الوقت الس غتهربو

هبطات خليج راسها كضحك فصمت وتشوف فوجه اشراق اللي رجع حمر ولاللة نزيهة حاطاهم قدامها تحت المجهر غير حاضيا عينيهم

لاللة نزيهة : ايوا معاياش قالو ليك غيجيو؟

الحاج: فلعشية نشاء الله ... وجدو للناس ماتحطو والى خصاتكم شي حاجة لعربي يتسخر ليكم

غمزات خليج اشراق وناضو مشاو للكوزينة كيوشوشو

خليج : شنو غنحطو للناس غدا واخا نوضو مع الفجر ميقدناش الوقت ... غفلونا جاب الله فكينا الدار ومشنا للحمام اما كن بقينا هاكاك كوراحنا كندوشو ونقيو دجاج !

دارت اشراق يدها على جنبها وقالت : ولاهيلا (تنهدات) والمشكلة شفتي كفاش ضايفونا .. فضيحة الى حطينا ليهم شي حاجة ماشي هي هاديك والحاجة مولفة بتاويل

خليج: ماما عندها خلاص دوك ليناب باقيين جداد وبابا نقولو ليه غدا يسيفط لينا لفوطوي الزرق اللي فاحانوت مع العربي ونحيدو هاد الكرونة مجايش مع الصالون فالازرق ... ايوا صافي ها الدار مقادة ياكي.. يبقا لينا شنو نحطو .. غنجيب السربيس المذهب اللي جاب ليا الزين ديالي من قطر فيه غنحطو الحلوى و داكشي .. اصلا غير هاداك بوحدو هماوي . خصات شي حاجة نجيبها من الدار وها ماما خلاص عندها كولشي سادة عليه غتبقا الماكلة هي اللي حريرتها حريرة

دارت اشراق يدها فمها كيتافقو وقالت بتركيز

-غنصايب ديك شلاضة الاسبانية اللي صايبت فالخطبة ديالك ... نديرو البسطيلة و نص حولي مشوي بالخضرة مبخرة والدنجال مشرمل فالجناب مع الخيار وخيزو والزيتون وداكشي .. الحلوى نشريوها ونديرو عصير المانك والبنان و واحد ديال الحامض والنعناع و واحد ديال لافوكا مع فخوي سيك


جلسو يتافقو وعيطو على لاللة نزهة للكوزينة وبداو يخططو .. حلات لاللة نزهة الثلاجة طلات عليها وقالت
- ايوا صافي .. يالاه بداو حيدو داكشي اللي خصو يتحيد من الطريق

اشراق: ويبقا لينا الوقت غدا للحولي ؟ البطسلة غنودوها دابا واللحم حتى لغدا باش يبقا فيتي

تنهدات لاللة نزيهة : تلفت ... المهم داكشي اللي خصو يدار دابا حيدوه من الطريق ... شنو باقي خاصك لشلاضة ؟

شهقات اشراق: باقي خاص كولشي !! اش جبتو من هاد السوبر ما جبتو والو !

لاللة نزيهة : ويالاه قيدي داكشي اللي خاص دغيا نعيط للعربي يمشي يجيبو بالزربة

اشراق: بعصبية) ديك المرة قلت ليه جيب الفطر طرييي مشا جابو ليا معلب هاد المرة يعاود يجيبو نخويه ليه على راسو اصلا مابقاش الوقت فين يبقا غادي جاي

تحنات على الكارني كتقيد وتفكر وتقيد عمرات الورقة كاملة من اللور ومن القدام وقطعاتها وقالت

- فينو العربي؟ جا؟

ردت خليج وهي حداها كتقطع الدجاج

- هاهووا جا

ثلتمات اشراق ومشات عندو لقاتو واقف وسط الدار وعطاتو الورقة وقالت بحدة
.- ها شنو غتجيب ... غتعطيها لوحدة من هادوك اللي خدامين تما هي تجمع ليك السلعة ... وماتعطلش راه محتاجة التقدية دابا ... دوز عند الكزار يعطيك السخرة راه عيط ليه الحاج دابا على نص جدي واسير وتلف كولشي عاوتاني ..شد الورقة كيضحك وقال

- ولفلوس الاللة اشراق؟

اشراق: راه مقيدة ليك تما شحال يعطيك لحاجة راه مشا للجامع يصلي المغرب دوز عندو يعطيهم ليك .. ومتعطلش

مشا لعربي ورجعات اشراق كفضات ودخلات للكوزينة عند خليج .. كل وحدة شنو كتوجد وكل وحدة شنو كطيب اشراق فشلاضة وخليج فالبسطيلة .. لماعن كاملين هبطو والبوطات كاملين شاعلين والحاجة دايخة بيناتهم غير كدور ما عرفتتهمش اش بغاو يصنعو كاع ! ولاكن عارفة بناتها كيعرفو اعجب حسن منها كاع وخلات ليهم لكوزينة ومشات خرجات تقدا داكشي الي غتكلف بيه هي

جوج دالليل ولبنات واقفين فلكوزينة اللي طابت كيبردوها والى الثلاجة مباشرة .. البسطيلة بفواكه البحر جابتها خليج هي هاديك على حقها وطريقها بقا ليها غير تحمر وديكور فقط وتحط. اما اشراق شلاضة ديالها صعيبة فيها شلا خلطات خاصة وشلا طبخات كل حاجة وكفاش كطيب بوحدها .. ها المحار لكروفيت روايال ها الكلامار . الدجاج اناناص بطاطة سرطان البحر وفواكه بحرية اخرى هي بحد داثها وجبة كاملة منوعة ومشكلة من خضراوات و صلصات خاصة بيها . عصرات عليها خليج حتى حيدات كاع داكشي اللي خصو يطيب من الطريق والصلصات اللي خصها تخلط و تهنات . صبحات الصباح على واحد البلاكو هي وخليج سرحو فيه داك الجدي و تحماو عليه هوا والمقبلات ديالو حيدوه من الطريق ودازت للسلطة ديالها جبدات صينية طويلة فيها جوج طبقات و بدات تستف وتقاد وتنسم و تزين حتى وجداتها وحيداتها من الطريق ومشاو دوشو عليهم خلاو لاللة نزيهة مقابلة العصير وتستف الحلوى .

لبسات قميص كريمي من داكشي الرفيع وصيبات شعرها وحطات مكياج خفيف وبليغة فرجليها وبقات كدور وتشوف وتعطر الدار بالعود وتوجد كلشي على يديها حتى سمعات الدقان ودخلات كتجري للبيت بديك المبيخرة اللي هازو


هربات للبيت تخشات وبدات طل من مور الباب وضحك وتشوف فيهم داخلين مع باها وهوا كيرحب ماقداه فرحة ولاللة نزيهة فرحانة حتى هي كترحب وتعاود .. سلمات على الحاجة اللي جايا هازو الكادو بجليليبة والطالون و الشال ديالها والحاج بالكوستيم نعام اسيدي وسلمى معاهم بجليليبة والطالون و شي راجل اخر معاهم كاملين كيضحكو يالاه بغا يبان ليها مولاي السلطان وهي تزف عليها جداتها من اللور بصندالة
- ادوزي تجلسي مابقيتوش تحشمو الله ينعلكم ... سيري تلاحي عليه الله ينعل الي ميحشم !

رجعات اللور ماقدراتش حتى تشوفو حرماتها عليها الحاجة وخرجات تسلم وتجلس مع الضياف . بقات مخبية حتى جات خليج كتفرتس ومعاها سلمى حلو عليها الباب

سلمى : نزغررررت نزغرررت هههه

اشراق: لالالالا ماشي دابا ماشي دابا هههه

عنقاتها سلمى وقالت : تبااااارك الله على مرات خويا ...ياختي ياختي عين الحسود فيها عود

خليج غير كتشوف وضحك واشراف حشمانة وسلمى كضحك

- ياختشي تزعطت انا تزعطت ههه

اشراق: اوييلي ماتزيديش فيه هههه

سلمى: نزييييدو سكر وحلاوة بسم الله مشاء الله الجمال يا ناس الجمال ... يالاه خرجي يا لاللة خرجي نشوفوك وتشوووفينا .. تشوفييينا راه جاييين نخطبو وراشين الروايح وهازين الورد ولابسين كوسطيييييم هخهخخخ

بداو كيموتو بالضحك حتى دخلات عليهم لاللة نزيهة فرحانة من وجهها باينة عجباتها العائلة ..
لاللة نزيهة : يالاه خرجي يالاه

سلمى: عطييونا ديالنا .. نمشيو بحاالنا ههه

بقات لاللة نزيهة كضحك وسلمى خالقة الجو عاجبها الحال

دارت اشراق الحجاب ديالها ولثامها الابيض وقفازات دونتيل فالابيض وخرجات بحال الاميرة وسطهم ودخلات للصالون وهاد المرة سلمات عادي على الجميع وعنقاتها حماتها وبدات تصلي على النبي ودازت حشمانة مدات يدها لمحمد طه

الى بغيتو السلطة غنحطها ليكم فيديو فلاشين يوتوب بالطريقة المفصلة كتصلاح للمناسبات بصفة عامة


مدات يدها وعينيها فالارض لاكن ما سلمش عليها ... هزات عينيها بخجل لقاتو غير كيشوف فيها ويشوف فيدها عاد مد يدو بشوية سلم عليها .. بقات غير حاللة فمها .. السيد طلع اوسم من المتوقع كاع .. دغيا سلمات ومشات جلسات حدا باها كتشرق الشوفات منو وهوا قدامها كيتجمع عادي مع عائلتها وعائلتو وكيتناقشو .. داير رجل على رجل وتقاشر كحلين رقاق وشروال توب كحل .. حيد لافيست وبقا بالقميجة محلولين ليها الصفات اللوين .. فكل مرة كيتصادفو العينين كيباتسم معاها بمجاملة وهي كتشتت النضر .. هضرو على مواضيع كثيرة وتناقشو فيها بالعقل عاد دخلو فالموضوع وقال الحاج وهوا كيقاد الجلسة بجدية
الحاج : ايوا السي الحاج .. المعرفة راه ديييجا كنعرفو بعضياتنا ..... ايوا هادشي اللي كاين .

دارت الحاجة يدها على فمها مصدومة فيه ! حسابها صافي غيهضر ساعا كسيرا وسكت بيه الموطور .. تدخلات وقالت

- جينا السي الحاج طالبين لاللة اشراق الغزالة لسيدي محمد طه ... على سنة الله ورسوله


الحاج عبد الغني: مرحبا والدار داركم .. البنت بنتكم وانا منلقاشي حسن منكم
الحاج : هادشي اللي كاين

نخزاتو الحاجة : هادشي اللي كاين هادشي اللي كاين هضر نيشان مع الناس شنو هادشي اللي كاين!

رد بصوت خافت : متأ... خلينا نهضرو دابا الله يهديك

الحاجة : سمعي الاللة نزيهة ... بنتك راه بحال بنتي ... نديرها فعويناتي وربي شاهد عليا ... متخصها حتى حاجة واللي قاستها ضرني .. فرموش عويناتي نديرها

حشمات لاللة نزيهة وقالت : هادا المضمون الحاجة ... وراك كتعرفي بنات الوقت .. خااصهم شوية ديال الخاطر

الحاج عبد الغني: وشوية ديال الزيييار .. قطع هبرة تبرا

الحاج الناجي: بنات الناس باااااينين السي الحاج ... سماهم على وجوههم ... وماتخلقو الطيبات الا للطيبون ... الى كتابو لبعضياتهم راه منزيدوهم غير الخير والصلاة على النبي

الحاج عبد الغني: اللهم صلي عليك ارسول الله ... مبارك مسعود اولدي

حرك محمد طه راسو كيشوف لتحت بصرامة ورد بابتسامة

- الله يبارك فيك الحاج

لاللة نزيهة : بلطافة) ايوا منوصيكشاي اولدي ... راه عندك خواتاتك وعارف البنات .. شوية ديال السياسة وصافي

تدخلات سلمى : شوفي اخالتي نزيهة ... ماعندك علاش توصي ... اشراق وحدة منا واللي ضراتها ضراتنا

الحاج الناجي بعفوية هادشي اللي كاين

ساط الحاجة من مناخرها كنشوف فيه بنص عين وجمعات يديها كتنفخ عصبها وباينة فيه داخ وتلف وفبحال هاد المواقف الواحد كيتلف ماكيبقا عارف اش يقول

شافت فولدها لكبير اللي حداها وقالت : هضر قول شي حاجة

ضحك وقال: الله يجعل كلشي مبارك مسعود .. نقراو الفاتحة اسيادنا

الحاج الناجي: بسم الله

هز كولشي يديه ومنهم طه وهوا كيشوف قدامو ويقرا معاهم ومع الختام طلقاتها سلمى بواحد التزغريتة ديازها لكلام


ضحكات الحاجة وشافت فمحمد طه وقالت
- عطيها البياض ههه

جاتو الضحكة وخشا يدو فلافيست اللي حداه جبد منها 200 درهم مدها ليها قدامهم وهما كيضحو .
ناضت اشراق من وسطهم حانية راسها وهازة قفطانها وخلاتهم جالسين كيتجمعو

الحاج الناجي: السي لحاج ... خير البر عاجله ... وجد للبنية وريقاتها نكتبو كتابنا .. ما عندنا مانتسناو

جراتو الحاجة كتوشوش ليه فودنو شنو يقول

الحاج: حنا جينا خطبنا وغنجيو المرة الجايا نكتبو كتابنا

الحاج عبد الغني : ايوا انا باغي بنتي نفرح بيها .. ونشوفها عروسة

تدخلات الحاجة : غنفرحو كاملين غير هوا حنا مابغيناش نطولو ... صافي نكتبو كتابنا ونديو بنتنا مكاين لا العكوسات .

لاللة نزهة : ايوا صافي .. الصيف نديرو ليها نهارها وتمشي مع راجلها

الحاجة خرجات عينيها : الصيف !! بزاااف الاللة نزيهة ... الى غييير شروطها حنا قبلين عليهم واللي طلباتو فالصداق يعطيه ليها

الحاج عبد الغني: الااا يعطي شاااي الاللة يتهلا ليا غير فلبنية هاداك هوا الربح عندنا ... اناااا ندير لبنتي نهارها غير نشوفها فرحانة وهي اللي بقات ليا ... ختها تزوجات راه غتمشي لقطر قريب ... وهيا اللي بقات لينا مابغيناش نزربو

الحاج الناجي: خير البر ... عاااجله السي عبد الغني ... توكل على الله وصافي نرجعو فراس الشهر نكتبو كتابنا ونديرو ليها نهارها والله يسخر ليهم


طبقات وكبيرة وطالعة بفواكه البحر مشكلة والانانس فالطبقة السفيلة مقسوم فنص بعروشو معمر من الوسط بخلطة مشكلة مع صلصة بيضاء دايرة بيها انوع السلطات الخضر والمحار والطبة الثانية دتيرة كاملة بكروفيت روايال والارز الوسط ومكونات اخرى وفواكه بحرية والطبقة الثالتة الاخيرة فيها سرطان البحر واقف مركبين فيه عويدات طوال د وكثار فيهم الجبن وطوماط سورو ولحم مدخن وداير بيه تشكيلة ديال الكلمار ولوبيا خضرا طويلة وبيض مصلوق مقطع الوسط ومعمر الوسطانيي ديالو .. تشكيلة رائعة مع الوان كتفتح الشهية دخلوها بحال الى هازين عمارية حطوها فوق الطبلة و وجدو الطباسل وشدو حتى اشراق تجلس معاهم فااطبلة حيت مكتارش بزاف وحشومة تبقا بوحدها . سماو الله وبداو والحاجة كتبنن وتسول
- تبارك الله... شكون تريتور اللي درتو ؟

ضحكات لاللة نزيهة وبناتها وقالت: ها تريتور

هز الحاج الناجي عينيه شاف فأشراق وبقا مصدوم

الحاجة : بصح!!! ماشي تريتور!!! نتي ا اشراق ؟؟؟!

ضحكات من تحت اللثام حشمانة وهي تبدا سلمى

- نووو ماتقوليهاش !!! نتي صايبتيها كاااملة!

الحاجة نزيهة : ولاهيلا هي... هادي هي الاخصائية عندنا فهادشي هي وخليج

الحاج : تبارك الله عليك ابنتي ... ماعندي مانقول معتبر هادشي

انا محمد ماقال والو في فمو ابتسامة وكيشوف فيها مرة مرة

الحاجة : ضاروري تصايبيها لينا نشاء الله فالدار

بقات ساكتة وقالت لاللة نزيهة : نشاء الله ههه

السلطة تكلات كاملة ... بقاو فيها غير لقشور .. تهزات الصينية وتحطات البسطيلة بالحوت وسولات الحاجة مجددا

- نتي اللي صايبتيها؟

لاللة نزيهة : هادي ديال خااالييج

الحاجة : تبارك الله والصلاة على النبي على بنياتك

لاللة نزيهة : مرحبا بيك

تحط ليهم الشواء ومقبلاته والديسير مشكل مزوق ومقطع و تعشاو فرحانين عجباتهم عائلة اشراق .. اما الاخير ناضت للبيت حشمانة حيدات اللثام وقالت

- كي جا داكشي مزيان ؟؟

خليج: طبعا جا زوين ماشفتيهمش تصدمو حساب ليهم تريتور

اشراق: شوفي يدي كترعد ... اصلا ماكليت والو بقيت غير كنقب تسدات ليا الشهية

حلات عليهم لاللة نزيهة الباب: اشراااق ... خطيبك بغا يشوفك ... ضاروري تحيدي ليه اللثام

وقفات اشراق بتوثر وقالت : دابا !!!

خليج: اييه ضاروري هههه

لاللة نزيهة : يالاه يالاه هاهوا جاي .. خليج خرجي من تما خليه يشوفها على خاطرو

بقات خليج غير كضحك بوحدها وقالت بصوت خافت : الحاج عبد لغني كان مضهشر نهار العرس ماعقلش عليه دابا كاع هههه هانا مشيت اختي ضربي شي تعكيرة دغيا راك غتحيدي اللثام .. شويني فيه زعما كاع مشايفك باز هههه


دخل عندها للبيت بخطوات بطيئة ورد موراه الباب بشوية.. تلفت عندها لقاها جالسة بقفطان ديالها والشعر مصايب ملوي محلول طويل والفولار عليه مرمي من الجناب ولثام خفيف على نيفها وحشمانة غير كترمش .. شافت مزيرة وقلبها كيطلع ويهبط بسرعة ويديها كيترعدو ووقفات من الاحترام .. ابتاسم ليها ومدات يديها تسلم ومد يديو حتى هوا شد فيها وجرها عندو على غفلة سلم بوجه قائلا
- انشوفو هاد السلام اللي مكتسلميش

ماحساتش براسها حتى تزداو لحناك وبعدات متفاجأة كتشوفي فيه فدهشة وضحك بمجاملة

صغر عينيه فيها بابتسامة وقال : ياك مكتسلميش؟! ولا تراجعتي؟

قالت بارتباك وابتسامة : غير دابا

دار يديه فجيابو كيحرك راسو ويشوف فجنابو

- اممم.. غير دابا ؟ اللي مكيسلمش راه مكيسلم لا دابا ولا من بعد ولالا

دورات وجهها للجنب مارضاتش وتزنكات وقالت بابتسامة

- جلس ..

جلسات فوق الناموسية وجلس حداها كيشوف قدامو وساكت .. بقا ساكت مطولا وهي كذلك كتفرد يديها مع بعضياتهم .. شاف فيها بنضرة تأمل صارمة ومد صبعو بشوية حيد ليها اللثام على وجهها وهبط الفولار على شعرها وهبط الشعر ناعم على وجهها .. حمارت بغات طرطق وردات الشعر مور ودنها كتسناه يقول شي كلمة لاكن بقا ساكت غير كيشوف فيها وهي كتبلع الريق .. بغات تسرق النضر وهزات عينها فيه وجاتها الضحكة بدات كضحك ويدها على نيفيفها .. تنهد ودار ابتسامة خفيفة وقال بهدوء

- كضحكي !!

دمعات بالضحك وقاجة راسها ومتوثرة وجاها السهد بدات كتنفخ وقالت

- الصهد
هز عينو فيها بقا كيشوف مطولا وقال مع تنهيدة عميقة

- شحال خاصك فالصداق؟؟


شافت فيه باستغراب: شنوو؟؟!!
جبد كارني دشيك من جيبو وقال : شحال كطلبي فصداقك

بقات ساكتة كتشوف فيه باستغراب وهوا كيشوق فيه بنضرات غريبة وعاقد حواجبو .. تبادلو نضرات مختلفة لوهلة من بعد قالت بانزعاج وهدوء

- واخا ... تقدر تعطيني نكتب صداقي بيديا

بقا كيشوف فيها فدهشة ورمش جوج مرات ومد ليها ستيلو والكارني وتحنات عليهم كتكتب وتردد وهوا كيشوف فيها

- كنطلب فصداقي .. الاستقرار - الاحترام - الحب - التقدير - الوفاء و الاخلاص ... ومؤخر الصداق كنطلب الرحمة - العطف - الحنان و راحة البال .(حطات ستيلو وشافت فيه ) قابل على هاد الثمن ؟

بقا مصدوم غير كيشوف اما هي هزات التوب ديالها دارتو على راسها لواتو و رجعات اللثام ديالها ودورات وجهها لجهة اخرى كتشوف وتخاطب نفسها وقلبها كيزدح ماعجبهاش الحال.. اول مرة نحس براسي رخيصة طول عمري ا عازة نفسي وعاطيا قيمة لراسي وعمرني سمحت لشي واحد ينقص مني شكون ما بغا يكون .. واول مرة نحس احساس بحاا هادا ونرتاح لشي واحد كما رتاحيت ليه! واخا ماشي بزاف باش عرفتو... كنحس براسي كنعرفو من زمان ! واش حتى كيحس بنفس الاحساس ولا حنا النسا كنبالغو فيه ونشبكو الاحداث ونكبرو مشاعرنا بالاوهام ؟ علاش فين ما كنفرح بزاف كنهجرو ؟ خاصني نفرح على قدي ولا كفاش؟ من نهار اللول بدات المساومة وكيهضر معايا بهاد الطريقة الناقصة بحال الى جاي بزز .. شنو زعما يكون هادا طبعو وانا خاصني نفهمو ونولف عليه ؟ ايوا الى كان هادا طبعو الله ينعلو طبع الشحط من الاول ! ياكما بغا يطبق عليا الماقولة ديال نهار الاول يموت المش!! اااه يا ربي دير ليا اللي فيها الخير انا وكلت امري بين يديك ما تخيبنيش

تنهدات وكانت غدمع لاكن وقفاتها فالقنت بصبعها وبقات كتسوط بشوية باش ميحسش بيها حتى حسات راسها بردات وتلفتات عندو لقاتو باقي على نفس الوضعية كيشوف بانزعاج ودهشة فداك الصداق . . . ابتاسمات بمجاملة وقالت

- ياكما غالي بزاف ؟


مجاوبهاش وقطع الشيك من بلاصتو وعطاه ليها بابتسامة مجاملة وقال
- غالي بزاااف ... ولاكن غنخدم عليه باش نكملو ليك .. الى كنتي قابلة تصبري

بقات ساكتة كتشوف فالشيك بانزعاج وتهبط فراسها كأنها كتشاور وبدات كتمد يدها للشيك بتردد وقلبها كيدفعها حتا شداتو من يدو وشافت فيه بنضرات انثوية .. ابتاسم وناض كيتنهد مسح على وجهه وقال بطريقتو المعتادة

- ها حنا غنمشيو .. وتيليفون بيناتنا .. الى حتاجيتي اي حاجة قوليها ليا

ابتاسمات بمجاملة وخرج كيشوف قدامو ورد موراه الباب ومشا . جلسات فوق الفطوي ساهية كتخمم وتشوف فالشيك حتى دخلات عليها خليج قفزاتها وجلسات حداها كتفرنس

- شنو كنتو كتوشوشو هااا؟؟؟ شنو كان كيقولك؟

طوات اشراق الشيك وتنهدات : والو .. كنا كنهضرو على الصداق وصافي

خليج : ايوا وشحال عطاك !

اشراق : جاه غالي بزاف وقالي صبري عليا

جمعات خايج الضحك وقالت : هي زويتيه بشي مليار الصكعة

اشراق: ها هوا الشيك عندي ... وغادي نصرفو مع الايام

شدات خليج الشيك بقات كتقرا وتشوف مصدومة وقالت

اويلي شهاد تبرهيش!!

اشراق: طيراتو ليها من يدها ) حقي هادا مالي ماعندي حق فيه ؟ اشنو طلبت منو كاع؛؟ يحتارمني ..يقدرني ويبغيني ويخلص ليا .. يعطيني راحة الباب ويحن فيا ويرحمني ويرحم ضعفي .. فاش نمرض... فاش نيأس... فاش نعيا ... فاش ضرني شي حاجة ...صافي شنو طلبت كاع

تنهدات خليج وقالت: ايوا اختي نتي تعرفي .

اشراق : مشاو؟

خليج : مشاو ... نوضي نوضي تاكلي راك ماكليتي والو... وشتي داك الصداق راه ميقد عليه حتى واحد غير كوني هانيا حتى وحدة مكتزوج باها ولا خوها


ناضت كتنهد بدلات الجو مع عائلتها وشدات الحديث مع سلمى اللي حمساتها لنهار العرس وكتشاور معاها شنو يجيبو شنو ميجيبوش ولاللة نزيهة كدور بيها باغا تعرف اش كانو يقولو . بدات الايام كدور وهما كيوجدو وتعجبات ليه حتى تشركو عينيها بالعجب .. مالو مكيسول ما يسيفط مسج !! هادي كاملة خدمة ! كل مرة تعطي سلمى والحاجة مبرر فشكل وكيقلبو الهضرة للتوجاد حيت قررو يديرو العرس وكتب الكتاب فنهار واحد ويجمعو ويطويو كما اقتارح الحاج الناجي على الحاج عبد الغني .
اما الحاجة هي وسلمى ماقصروش من جهدهم فالدهاز .. كل مرة خارجين داخلين كيوجدو مانساو ليها حتى شرويطة عاد مكيضوبلو ليها الحوايج ويبدلو ليها الفراش .. ترونو حتى هما وقلبو بيت النعاس كامل ديال محمد طه وجابو واحد اخر فالرمادي جديد كبير

الحاجة : يكون الفراش وجد

قالت سلمى كتلمط الناموسية هي ونادية اللي خدامة عندهم

- يكون وجد راه قالت ليا غنبتو وصافي اما الطرز طرزاتو

الحاجة : مزيان باش نطلقوه ليها تجي تلقاه واجد

سلمى : راه باقي خاص بزااف اماما ديال لحوايج .. باقي شحال من حاجة دافعينها ومزال ما وجدات

الحاجة : كولشي غيوجد فوقتو نشاء الله ...

دخل عليهم محمد طه للبيت سبورتيف بحال ديما فيدو علبة مربعة حمرا وقال بصرامة كالعادة

- الحاجة .. هاكي هادا خبيه عندك

شداتو الحاجة فيديها وقالت : بسم الله ... تبارك الله مشاء الله (شافت فيه ) فين غادي ؟

رد على عجلة : الحاج كيتسناني فالمحل ..

خرج مشا وقربات سلمى بشوية فرحانة

- بلاتي نشوفو .. حلي

حلو العلبة وتحلو عينيهم مع عقد ذهب منبت كامل و حلقات وخاتم و براسلي ديال اليد عصري اكثر من رائع

الحاجة : تباااارك الله والصلاة على النبي هادشي زويين

سلمى : الدياموند اماما هادا بلاتي نشوف!!!!

هزات كارط حداه بحال كرط بطاقة التعريف وبدات كتقرا وقالت فدهشة

- ولاهيلا دياموند !!! (ابتاسمات ودوزات يدها عليه) شتي هاد الحجر كامل اللي فيه اماما الماس!!! غزاااال ... (شافت فالبطاقة ) بصحتها وراحتها سعداتها .. مكتبو بسميتها

بقات الحاجة ساهية فيه وقالت: زوييين ... عاد جابو هاد الموديل يمكن

ليلى : واقيلا ... (حطات الكرط) خبي خبي هادشي حتى نديوه عندااااك توقع ليه شي حاجة هادا راه الالماس والذهب حضيه و..

سمعو صوت الغوات لتحت والسوق حامي تخلعو وخباو الطقم ونزلو كيتجاراو لقاو ليلى كتغوت وسط الدار ومحمد طه كيشدها ويهدنها

ليلى : طلق منيييي .... والله متزوج بيها ... فينا هيااااا تهبط عندي لهنااااا

غوت عليها فوجها فعفعها وقال : ليلااااا ... صااافي هضرنااااا فهادشي

الحاجة وهي نازلة مع الدروج : الاللة اااالاللة مالنا على هاد الصدع اش هاد قلة الترابي

خرجات فيها سلمى عينيها : مالك اختي جايا هاجمة علينا فقلب الدار اش واقع فالدينا

الحاجة : خرجها عليا من هنا ... خرجها ولا غنعيط ليها للبوليس ... خرجوها ليا من داري

جرها محمد طه من يدها بزز منها يدها لبرا وسلمى معاهم وزدخات عليهم الحاجة الباب ديال الخشب بالجهد وخلاتهم كيتقاتلو


شداتو ليلى كتبكي وتشد ليه وجهو وتقول
- مغتزوجش ياك ... مغتزوج وحدة اخرى هادشي ماعمرو كون ...شوف فيا شوف فيا انا ليلى ... ليلى الحب الاول والاخير

هبط ليها يديها وقال بغضب : ليلى هضرنا فهادشي وتفاهمنا صافي علاش هاد الصكوندال

نترات ليلى يديها بجوج وقالت كتجر فيه: لاااا متافقناش .. انا وياك تخلقنا باش نكونو مع بعضياتنا
خفض الحدة دصوتو وشد ليها فدراعها

- صافي ... صافي علاش كتبكي دابا راه شرحت ليك وتفهمتيني فالاول شنو تبدل دابا

طارت عليه باستو من فمو قدام ليلى وهوا كيشوف فيها حار مع تصرفاتها .. بعدات وقالت

- انا مغنتنازلش عليك سمعتيني ... مغنتنازل عليك واخا طيح الروح

ردت سلمى بصرامة هازة حاجبها : شوفي راك كضيعي وقتك فالخوا الخاوي ومايمكنش يربط حياتو معاك حتى يموت وجا الوقت فين يبني حياتو

شافت فيها ليلة وخرجات عينيها : حياتو بنااااااها كتسمعي ... بناااها معايا انا ...

زعف على سلمى : سلماااا ماتخلينيش نفاااجر ... سكتي ودخلي بحالك

نفاجرات سلمى : لااااا مغنسكتش نتا خويااااا ماشي براني علياااا ... هاد العلاقة اللي بنيتو فلحرام خاصها تردم

هجمات عليها ليلى : ماشي شغلاااااك ... ماشي شغلك حياتنا هادي ونتي ماشي شغلك

جر ليلى بعدها : اجي ... اجي معاااايا يااالاه تحركي

ليلى : لا مغنمشييش غنبقااااا ... باغا نشوفها .. طلق مني ... فين هيا ... ليوم غنقتلها

وقفات ليها سلمى قدامها وقالت : مغتوصليهاش .... يالاه وريني حنت يديك ... الفيلم ديالك سالاااا .. سيفيني

غوتات ليلى كتبكي وبدات تقول بصوت مرتفع

- عمرو مغيسااالي ... حنا كنبغيو بعضياتنا ... انا عطيتو كووولشي كتسمعي (سد ليها فمها من اللور وهرباتو) عطيتو كولشي خووووك تاق**** ني سمعتي وغيتحمل مسؤوليتو ... هوا مولاهااا وعمروك تحلمو تزوجوه بهاديك الشايطة

ردات عليها سلمى الهجوم وغوتات: تحمليها نتيييي وبزااااف عليك تعايريها سمعتي ... نتي اللي فرطتي واللي فرط يكرط وحتى واحد ماضربك على يدك ... كوني حتى نتي عندك نفس ماشي تنعسو فرحااانين وتنوضو تقولو ليه تحمل مسؤوليتك ماشدكش بزز كان عاجبك الحال بحالك بحالو ... جمعي راسك وزايدون نتي اللي بغيتي كنتي غاديريها مع واحد اخر بلاصتو .. نتي ماحافضتيش من الاول على راسك .. هوا راااجل مخاسر والو نتي اللي تحليييييتي ليه وعاجبك الحال ودابا سيري شوفي اش ديري ... رخصتي راااسك هادي نتيجتك ومزااااالة مرخصة راسك مابغيتيش توبي ...

زعف على سلمى بغضب حتى كان غيضربها لاكن دغيا هزات خنافرها ومشات دخلات ودفع ليلى هزها دخلها للطموبيل زدح الباب وطلع فرك دوك الروايط حتى تكلو وخرات طموبيل كتحك مع الارض وزاد


طلعات ليلى كتسوط كملات على الفراش اللي خلات ومشاو كيهضرو على الموضوع ويكملو توجادهم . وتاصلو بأشراق يسولو فيها لقاوها فرحانة كتوجد حتى هي لنهارها الكبير .. وفعلا تهدات فالتوجاد وتلهات معاه .. ها القاعة والنكافة و الجوق .. ختارت قاعة فيها جوج طبقات باش يعزلو الرجال على العيالات وتنشط هي بوحدها مع النسا وتاخد راحتها كما بغات وكان ليها داكشي اللي بغات .
صبحات عروسة غاديين بيها البنات للحمام اللي حجزات خليج وداوها كيزغرتو عليها مالبسينها الابيض وفرحانين ... اما هي غير كضحك فأسعد نهار فحياتها ولقات الحباب دايرين بيها دارو ليها التقاليد على اصولهم ودوشو ليها فلحمام بالشمع ودايرين عليها كيصليو على النبي خرجات .. عطروها وغطاوها ورجعوها للدار لقاوها عامرة بالعائلة ..اما سلمى بقات واقفة معاهم وحتى لحمام مشات ليه وكلشي مصدوم فلوستها و وقفتها على كلشي ... وحاضية غير بعينيها الشادة والفادة كتر من خليج . دخلوها للصالون باجوهرة والتقاليد الجبلية وزيف حياتي على راسها بدون مكياج وجلسات دايرة ذهبها والصلاة والسلام عليك ارسول الله .. منعو التصوير وجابو نساء خاصين يحضيو التصوير فقط . حناو ليها يديها وهزاتهم وطلقات رجيلاتها حناتهم ودخل باها و عمومها وخوالها فرحانين تصورو معاها كاملين وحطو ليها الابياض .. ها اللي كيحط رزمة دلفلوس ها اللي كيحط ليها الذهب عمرو ليها الطبق ومشاو . اما الميمة جلسات حداها بعكازها متحركاتش من حداها وغير كتنخز بيه ورادة البال .. جمعو الحنة ... جمعو اراو بلغتها عندي ... ديرو هادي ..فعلو هادي .. ليشوها غاتم فيه كميميسة فيها الفاسوخ وملحة ومغطسة فالحنة لونها حمر بيها . دازت ليها الحنة من داكشي الرفيع ومشات لبيتها قشراتها على خاطرها وعطاوها كبدة مشوية كلاتها وتكات ترتاح سخفانة يالاه بغات تنعس فاجأها التيليفون لأول مرة وطلات لقات اسمو !! من نهار خطب ما هضر ما سمعات صوتو كي وقع ليه على سلامتو اللي سالا شغلاتو ليها .. هزات تيلي جاوبات بصوت خافت وقالت

- الو

رد بصوتو الرجولي فعفع شرايين قلبها وقال

- صافا؟ ... كلشي مزيان ؟

اشراق: الحمد لله .. نتا لاباس عليك

محمد طه : الحمد لله .. كي دازت عندكم العشية؟

اشراق: مزيان الحمد لله ونتوما

رد بهدوء: مزيان ... عيانة يمكن نخليك ترتاحي شوية

تنهدات : شوية

محمد طه: يالاه رتاحي ... حتى لغدا نشاء الله

اشراق: نشاء الله بون وي

محمد طه : بون وي


قطعات كتنهد عاجبها الحال مللي سول فيها وغمضات عينيها غطسات فأحلامها حتى صبح الحال وصبح كولشي كيجري عاوتاني بحال عرس خليج .. لعروسة داتها خليج لدارها فين مكاينش حس البشر باش دوش وتصايب على خاطرها وجابو اللي كيصايب كلشي صايب ليهم تما هما وسلمى لاكن سلمى غير سلات مشات باش تعاون الحاجة حيت عيالات خوتها مكيتنفسوش بالعياقة ومكيحطوش يديهم فالحاجة .. اما اللي جاو من الخارج يحضرو هادوك خلاص حالة خاصة ... جات عندها النكافة لبساتها الشدة الشمالية على اصولها باش دخل بيها وطبق تقاليد باها وغطاتها بشبكة وجلسوها دايرين بيها بالتكاشك والشعور والزغارت كيتسناو مولاي السلطان . فجأة دقات سلمى وحلات ليها خليج ودخلو بجوج كيجرو فالتكاشط و يشاليو بالشعور والمكياج
سلمى بلهفة : صافي واجدة ؟؟؟ نعيط للعريس يطلع ؟؟؟

النكافات : صافي واجدة غير يدخل

سلمى : انا غنعيط ليه

هزات اشراق عيونها وهي جالسة شدات فخليج وقالت كتنهج

- ناري مخلوعة

شدات فيها خليج : يديك باردين مالكي ؟

اشراق: ماعرفتش ... حاسة بالخلعة والسخفة

ضحكات خليج وبدات تغني ليها بالجبلية باش تحيط ليها الخلعة

- مشييت للشمال نتسوق لقيت الزين يحمق عفا مولاي راني بقيت مشوق .. غييييير موت امحمد موت هههه


ضحكات اشراق وهي تابتة كضحك مكتحركش ... دخلات سلمى كضحك وموراها محمد طه على هيئة العرسان باين عليه التوثر غير مخبيه وكيضحك بزز بثبات .. البذلة سوداء ولافيست مسدودة من واحد الصدفة و القميجة بيضاء فكل مرة يحرك يدو ودراعو كتجبد عليه حتى كتهرب العين على الصددفة .. الطولة والقد والوقفة والحضور اللهم صلي عليك ارسول الله .. كبر الشعر شوية فوق مكاينش حس تشاوك واخا مقادة تسريحو ومحسن تحسينة جات مع شخصييتو .. اللحية مقادة وهابطة شوية مع العنق وكرافاطة حمرا .. الصباط كيشعل والساعة فاليد ولخيط مذهب فاليد لخرى .. النضرات قتالة بقاو نكافات كيزغرتو عليه والحاجة موراه كتصلي على النبي اما اشراق مهبطة راسها كتشطح فبلاصتها .. وقفو ليه النكافاك كيضحكو وقالت وحدة
- بياض الشوفة امولاي سلطان

ضحك ودار يدو فجيبو وتلفت عند مو مدات ليه الفلوس حيت مهازش معاه .. ربطة ديال الزرقات حيد منهم كمشة ماحسبهاش وحطها ليهم بقاو غير كيشوفو .. داروه فعينيهم مارصاوش من اازعاريت ودارو ليه الطريق داز ووقفو ليه لعروسة كترعد .. القلب عند اشراق كيضرب فركابيها ويديها و جسمها كامل وغير كترمش .. هز الشبكة بهدوء ردها للور وباس بلاصة التاج مع الزغارت ورجع الجنب .. ضارو بيها النكافات دارو عليها سلهام وهبطوه عليها خباوها .. مد يدو عطاها ليها وهي غادية كتجر تكشيطة تقيلة وشدات فيها بطرق صبعانها وخرجو


طلعات فسيارتو مزوقة بالورد بحال ديال العرسان بالابيض وساق بيه خوه .. مشاو مباشرة للقاعة ودخلوها مستورة مشافوهاش الرجال حتى لداخل القاعة وعراو عليها اما مولاي سلطان مادخلش طلع لفوق عند الرجال هوا وخوتو وطبعا مشارك فالعرس ماديا حيت كبيروه على اللي كانو ناويين وحضرات عائلتو كاملة وصحابو وعزلو النساء على الرجال .. دخلتت اشراق كتشوف فالارض على الطريقة الشمالية وجلسات شوية مع منع التصوير بالهواتف وناضت داوها النكافات لغرفة تغير الملابس وبدلو ليها اللبسة والمشطة ودخل عليها مولاي السلطان كالعادة وخرج معاها هاد المرة شاد ليها فيدها ومعاها المحارم ديالها والاب ديالو حتى هوا ... حيت رفض يدخل وسط الناس بوحدو وكان غيتعكس لولا الحاجة عتقات الموقف وداز كلشي مزيان ودخلو معاه .. عائلتها كاملة بقات غير كتشوف وهي كتشوف فيهم وضحك عينيها كيدمعو بالفرحة .. وخلاص مللي عرفو ولد من وقاضي من لفوق كملات الباهية .. ضهشر البنات ووقفوهم يشطحو شوية مع العائلة بموسيقى هادية شوية تقدر تحرك عليها العروسة ... وقف بزز وكيضحك بزز ومو وخواتاتو كيدورو بيه .. النص تما مكتعرفهومش اشراق باينين من عائلتو .. جلس معاها وبداو الحضور كينوضو يسلمو عليهم وهي كتشوف وجووه جديدة ونساء فغاية الرقة و وجوج فنانات معاهم تصورو معاها مكانتش متوقعة تشوفهم ابدا . وجوه كتشوفهم فمواقه التواصل بزاف مشهورين لقاتهم حداها كيتصورو .. غمراتها الفرحة وبغاو عينيها يدمعو مكانتش متوقعة عرسها يكون بهاد الشكل هادا . ناض العريس خلاها كدور فالعمارية ومشا ماعرفاتو فين غبر حتى نقلو ليهم البث فالشاشات ديال القاعة كيحنيو ليه فجلابة بيضاء وبلغة صفرا .. نزل عليه السر وكيضحك مع خوه جالس حداه وخوتو لخرين دايرين بيه وحتى نساء خوتو حاضرين وخواتاتو ومو وجدو وكلشي ... حاضر.. شخصيات سياسية حتى هما شداتهم الكامرة وكلشي كيضحك ... الحاجة واقفة كتشالي عليه بواحد الزيف والعيالات كيسفقو بيديهم ويتمتايلو معارفينش كاع على اشمن موسيقى غادين غير الصورة اللي طالعة . سلمى قدامو كتحني ليه بلفلوس وهوا مدور وجهو مركز مع خوه كيهضرو ويضحكو من نيتهم

دخلو اشراق تبدل ورجع ليها مرة اخرى يدخل معاها .. لبسات لبسة خفيفة ديال العشاء وخرجات هي وياه رحبو بالناس ومشاو لبلاصة اخرى جلسو فيها فيها كراسا ملكيين وطاولة منقوشة عليها زاجة والعدول فالجناب جالسين .. جلسات بالسلهام واللثام على وجهها وقفازات بيضاء مشبكة كيبانو فيها غير لعينين مكحلين .. جلس حداها بهدوء باش يطيحو العقد ودارو بيه خوتو و عمامها حتى هي وباها جلس حداها و باه حتى هوا جلس حداه .. وفتحو لكتاب ... الموسيقى اندلسية مطلوقة وكاين اللي كيشطح كاع مراه فهاد العالم .
فتاتح العدول بالدعاء والكل كيقول امين وبدا الكلام

- توصلتي بالصداق ديالك كامل ابنتي

بثات ساكتة مهبطة راسها وقالت بصوت منخفض

- باقي ..

مدار حتى ردت فعل بقا ساكت عادي .. نطق الحاج الناجي مستغرب وقال بصوت خافت

- مزاال ماعطيتيها صداقها ؟

حرك راسو وقال فتبات : باقي .. من بعد من بعد

العدول : باقي ابنتي

اشراق: باقي ... حتى لمور لعرس

العدول: شحال ندير ليك هنا تساليه

شافت فيه كترمش وقالت: مادير والو ... صافي

تنهد العدول وقال : قابلة ابنتي بالسي محمد طه يكون زوجك .. على سنة الله ورسوله

بتكشيطة كحلة وقفات حداها بنت .. تكشيطة مسقسقة ودايرة الحجاب ونضارات الشوف ومكياج فاقع .. ايه ليلى لاكن مبدلة تماما .. حطات يديها على كتف اشراق بلطف وهزات راسها كتشوف فالكتاب بحال لحضور و مانتابه ليها حد كلشي مبدل بالمكياج وملهي مع الاحداث جمعات النفس بملامح شرانية .. تقبات الكتاب بعينيها كدوز يدها على كتف اشراق بلطف وتبتاسم


كرر لعدول كلامو وقال : قابلة ابنتي بالسيد محمد طه زوجت لك على سنة الله ورسوله
رد بخفوت : قابلة

عطاوها الستيلو توقع وشداتو بخجل .. جات توقع مابغاش يكتب .. حولات مجددا و تعكس .. تنهدات الحاجة وبدات تقرا عليهم القرآن والنساء كيصليو على النبي وجبد الاخ الاكبر ستيلو من لافيست مدو ليها بابتسامة وقبطاتو بخجل وقعات وحطاتو ..

العدول : سيد محمد طه ... قابل بالسيدة اشراق الناصيري .. زوجة لك على سنة الله ورسوله

هنا تهز صدر ليلى وهي كتشوف فيه واقفة بجنب اشراق وسنانها كيتحكو مع بعضهم ... جمعات القبضة ديدها كتزفر وعينيها فيه متمالكة نفسها .. حرك راسو بابتسامة بغا يهضر وهوا يمشي الضو وجا فبلاصتو ووقع ماس ومشا الضو فلحضة .. تخلعو الحضور اللي واقفين معاهم وحسو بشي حاجة ماشي هي هاديك .. الستيلو مابغاش يكتب... الضوء مشا...شي واحد كيدير شي حاجة ماشي طبيعية مافيها شك... تخلعات لاللة نزيهة وخليج حتى هي بداو كيقراو القرآن .. بزربا رجع الضوء حيت ماتقطعش وكان محمد طه وقع .. تلفتو لقاوه دار توقيع ديالو وبداو كيزغرتو ومشات الحاجة كتجري مخلوعة عند الجوق حيدات الغنا وطلقو القرآن واحد الشوية .. ورجع الوضع تهدن من بعد ما تفزعو اولياء الامر ... ناضو من طاولة لعدول واشراق شادة فصدرها وكتقول لخليج للي حداها

- قلبي مقبوط ياختي .. شهاد النحس ..

خليج : الله يحضر السلامة .. زيدي تعشاي زيدي ... هادشي ماشي هوا هداك .

داوها جلسوها على الطبلة مع المحارم والبقية خرجو وليلى مابقا بان ليها اثر .. تحط العشا تعشاو وبزز باش كلات اشراق رداتها غير على الماء صافي اما محمد طه مدور وجهه كيسمع لباه للي حداه وهوا كيهضر معاه . سالا العشا في امان الله وناضت اشراق تبدل حوايجها ورفضات تلبس اللبسة اللي باقا وحتى لاللة نزيهة والحاجة وسلمى بغاو يساليو العرس دغيا وخايفين توقع شي حاجة ويتقلب كلشي يسكت ليهم القلب .

جلسوها فغرفة تغير اللباس وجلس محمد طه فالقنت ديال الفوطوي شاد راسو وعينيه حومر

مشات عندو الحاجة عطاتو كينة دالراس وقرعة دالماء فيدو وعلقات ليه اية الكرسي فحجاب فالمعصم ديالو .. حيدو لأشراق التكشيطة خلاوها بشورط ابيض مشبك وديباردور قدامو وهي كتغزل فبلاصتها لاكن ماهزش راسو كاع و واخا هزو ردو اللور مباشرة كيشوف فالسقف ماشافش فيها .. ناضت كيتشتت النضر بعفوية حط الكاس دالماء ومدات ليه سلمى البذلة ديالو ودخلات معاه لغرفة معزولة بدل حوايجو وخرج تلاقات ليه الحاجة فلباب مخلوعة ولونها مخطوف

- كيبقا راسك شوية ؟ باقي كيضرك

حرك راسو وقال : سافا دابا ..

لقا اشراق لابسة غوب بيضاء ضافية ولحجاب ابيض ولثام ابيض ناصع رطب .. شافت فيه بعينيها وابتاسمات ورد ليها الابتسامة وشد فيدها خرجها .. هبطو بالزغارت وسلمى كتزرب فالتريتور والنكافات مابغاو تصاور مابغاو روطار بغاو يساليو كلشي دغيا .. وقفو قطعو الحلوة قدام الحضور كامل حتى الرجال اللي كانو معزولين فالقاعة دخلو .. قطعو العريس طرف فطبسيل وعطاوه شوكة وكل بيها اشراق من تحت اللثام بهدوء وهي كذلك وكلاتو وكضحك بخجل ومشاو جلسو قدام الحضور اللي واقفين قدامهم مع موسيقى هادئة .. جابو ليهم بلاطو فيه الحليب والثمر والخواتم .. الكيسان كل واحد فيه شريط فلون .. ديال لهروسة فيه شريط وردي والعريس شريط ازرق ومع الثلفة والدوخة ماعرف العريس اشمن كاس يهز من بعد ما لبسها الخاتم ولبسات ليه الخاتم شربها من كاسو وشرباتو من كاسها وفهاد الاثناء كانت سلمى كتهضر مع تريتور وسالات معاه الهضرة وجات خارجة وهي تساطح مع سيدة بتكشيطة سوداء ... شافت فيه بابتسامة وقالت

سلمى : سمحي ليا

شافت فيها السيدة بابتسامة جانبية وقالت "مكاين مشكل " ومشات بقات سلمى كتشوف فيها باستغراب وهي تخرج عينيها وقالت "ليلى !!!!! " مشات كتجري موراها مخلوعة وقلبها غيسكت حتى للباب لاكن اختفت ليلى وغبر ليها الاثار .. توثرات ليلى ورجعات كتجري للقاعة شافت فلعرسان بانو ليها نايضين ولحفلة سالات وخارجين مع الحضور لحقاتهم كتجري للسيارة وشدات فأسراق بفزع

- سلمى : اشرااااق ... لاباس عليك ؟؟؟ واش سافاااا!!! واقعة ليك شي حاجة

شافت فيها اشراق باستغراب : علاش شنو وقع!!

حولات سلمى عينيها بتتاقل وخوف جهة محمد طه لقاتو تبدل فيه اللون ومزير على عينيه وواقف حدا الباب شاد فيها بزز خرجو عينيها ويالاه بغات تغوت طاح قدامها طيحة وحدة


اسوء حدث .. اسوء حاجة ممكن توقع لأي انساء هوا ينتهي الفرح بمآسات .. من بعد ماكان الكل فرحان .. الكل سعيد وعاجبو الحال تقلب كلشي فآخر لحضة ... ترون كولشي ووقعات كارثة فزعات كولشي وخلات كولشي مصدوم ..شي كيشوف فشي ومجات غير فلخوت والواليدين اللي طاحو على ولدهم كيغوتو .
* فبيتها جالسة مصدومة حاللة فمها .. الحاجة كتحرك فيها وهي ساكتة

الحاجة : بنتي اشراق... هاكي لبسي هادو

شافت فيها اشراق لقات فيديها حوايج بيضين

الحاجة : لبسيهم راه حوايج حق الله

مارداتش عليها اشراق ... وقفات فحالة من الصدمة والدنيا كدور بيها .. من لاغوب البيضاء ديال العرس للجلابة البيضاء ديال العزا !

خرجات كتجر فرجليها لابسة تقاشر بيضين وباغة بيضاء والجلابة والحجاب ابيض .. وجها الابيض بهات كأنه عمرو داز فيه الدم .. هبطات مع الدروج كتشوف الفيلا عامرة بالناس.. لعيالات كاملين كيشوفو فيها نازلة .. كيتعرضو ليها يسلمو عليها وهي جامدة مكدير حتى رد فعل .. البركة فراسك ... البركة فراسك .. البركة فراسك ...هادي الجملة اللي كتردد كل مرة فودنيها .. جلسات بحال الخشبة والباب قدامها محلول ساهية وكتقول هاهوا دابا غيدخل .. هاهوا دابا غيجي ... هاهوا دابا غيوقف قدامنا . لاكن مشات الاوهام سدا ودخلات مع الباب اللي عمرها توقعات تشوفها .. ليلى وحتى هي لابسة الابيض وشال على راسها .. بالصدمة وقفات كتشوف فيها وعينيها خارجين


الحاجة : اشراااااق اشرااااااق ... اشراااااااااق (كضرب فوجهها ) اشرااااااق شوفي بنتي شوفي فيااااا انا ماماك الحاجة شوفي فيااااا
كضرب فوجهها وهي واقفة قدامها وعينيها خارجين كتشوف فبلاصة وحدا.. دخلات عليهم سلمى للبيت كتجري لقات اشراق واقفة شعرها محلول بالقفطان ابيض حالة عينيها والحاجة قدامها كتسرفق فيها .. تخلعات سلمى وقالت

- شنو وقع مالها ؟؟؟؟

الحاجة : اري الماء اري الماااء.

هزات سلمى الكاس بسرعة ورشات ليها وجهها عاد رجعات لوعي ديالها ونطقات

-اشراق: شكون هادي؟؟؟ شكون هادي علاش جات

مسحات ليها الحاجة وجهها وقالت: بسم الله عليك ابنتي بسم الله مكاين حد غير ونتي وسلمى ها البيت خااوي مكاين حد

شنو وقع ؟ كنحس بقلبي مقبوط مزير والدنيا كدور بيا .. تلفت مابقيتش عارفة راسي فين وشنو واقع فالدنيا .. رجعت الوعي ديالي عاد عرفت باللي غير كنتخايل ولا ماعرفت كنحلم ولا شنو كاع وقع .. ياربي اشنو هادشي .. ياربي فك كربتنا وبعد عليا الشر ياربي .. ياربي الى درت شي دنب غفرو ليا يا ربي

جلسوها فشلانة على الناموسية وتكاو ليها راسها وهي كتسوط وعينيها كيتلسقو .. تنهدات الحاجة وقالت

- حسبي الله ونعم الوكيل ... حسبي الله ونعم الوكيل فاللي كان حيلة وسباب ..

جلسات سلمى حدا رجلين اشراق اللي متكية ساكتة وقالت

- مالها شنو وقع ليها ؟

الحاجة : كانت ناعسة مابيها ما عليها حتى جات واقفة حالة عينيها خلعاتني

سلمى : غتكون كانت كتحلم وصافي (تنهدات ) غنمشي للكلينيك .. هاد اليوماين دازت علينا كحلة يا ربي السلامة

تحنات الحاجة عند اشراق وقالت : هاحنا بنتي غنمشيو نطلو على راجلك فلكلينيك وماماك وختك راهم جايين عندك فالطريق . وناديا هاهيا معاك مغنتعطلوش ابنتي

ناضت الحاجة كتنهد لبسات جلابتها وركبات مع سلمى فطموبيل مباشرة للكلينيك . نزلات الحاجة كتشكي وسلمى كتسوط قلبها عامر

الحاجة : كان غيموت كان غيموت ... كان غيموت جاب الله طرنا بيه كنجريو ... اميييمتي على تسمم اميمتي ... اميمتي يعطيهم السم لهادا اللي حطو ليهم ... كن ماتغسلو ليه مسارنو ديك الساعة كوراه مشا عند الله... كن غنترزا فولدي على كبري حسبي الله ونعم الوكيل

سلمى غير ساكتة وكتنفخ وتخرج النفس مرعودة وتردد

- تحط لاشراق وشربو هوا ...ولاكن هادشي مغيدوزش مرور الكرام... عند الفورة يبان لحساب

دخلو لغرفة كبيرة مجهزة بحال غرفة النوم كان جالس فيها الحاج الناجي على لكرسي هاز الهم ويدو على خدو و اولادو بثلاتة كيشبهو ليه كل واحد فين كيتنهد ويفك الحجاية بوحدو .. اما محمد طه جالس غير بشورط كحل قصير صدرو عريان مشعر والتعب فعينيه و والكعيا طالعة الممرض كيعبر ليه الضغط

الممرض: مرتافع ليك الضغط بزااف ! واش كتحس براسك مزيان

حرك راسو يزفر: لا هوا هاداك

وقفات حداه الحاجة كدوز يدها على ضهرو المدزوج

- كي بقيتي الحبيب ديالي كي كاتحس براسك

احح بقيتو فيا كنت ناوية نصفيها لجد بوه


حط يدو على يدها اللي على كتفو وباسها
- ماتخلعيش راني لاباس

تأثرات الحاجة وطاحت معنقاه كتبكي وتشالي وتشهق منضرها كيقطع القلب .. عنقها كيبوس فراسها ويسكتها وهي كتشكي

- اوليدي ياااوليدي سهرت عليك وماكبرتي حتى شرفت وبغاو يرزينوني فيك اااااااهأ..

الحاج : نعلي الشيطان الحاجة ماوقع والو .. نعلي نشيطان خرجتت سلمى وربي طول ليه فلعمر

ناض محمد طه وقف وجلسها بلاصتو كتشهق وتنخصص وترعد .. ناض ولدها لكبير " اسماعيل" خوا ليها الماء شربات وبدا يهضر معاها على الله تسكت . تحنى محمد طه جلس القرفصاء قدامها وباس يديها وقال عينيه حومر ووجه صفر

- هانا قدامك .. الحمد لله ما وقع والو .. صحا سلام

جراتو عندها وتحنات براسها على راسو كتبكي بحرقة

الحاج: لا حولة ولا قوة الا بالله .. نعلي الشيطان الاللة .. هاهوا حي رديه لكرشك وتهناي

هزات راسها شافت فاحاج وقالت: نردووووو نردووو .. نردهم كاملين علاه ماشي ولادي ... ماشي من كرشي

تنهد الحاج وقال كيدور وجهه: ايوا جمعي ورديه هادشي اللي بقا

ناضت وقفات كتجرو وقالت : اجي ترتاح ... اجي ترتاح اولدي يا لحبيب وجهك صفر

جلسها وقال : جلسي رتاحي نتي انا مزيان ... (باس راسها ) غنخرج صافي وليت مزيان

وقف الحاج بعصبية : فين غتخرج ونتا شوف حالك كي دايرة

اسماعيل: جلس جلس راه باقي الوجع كيشدك .. الطبيب قالك خاصك الراحة

رد بتمرد وصوت تقيل متعب: صاافي باغي نخرج ... كاره الجلسة هنا

تكلم الاخ الوسطاني عمر: لخاطرك زعما ! جلس اصاحبي راه التسمم هادا ماشي اللعب

سلمى : صافي خليوه يخرج كنكره ريحة السبيطارات حتى انا ... يرتاح فالدار حسن ليه من هنا

الحاجة : سكتي نتي واش نتي حاسة بيه !! ايواهااك!

تنهد محمد طه وقال: لا خنخرج ... جمعي داكشي مافياش اللي يجلس هنا

عياو يحاولو معاه مابغاش وناضو جمعو ليه حوايجو خرجوه بزز منهم .. الطريق كاملة والحاج كينكر عليه حتى للدار


حل السترة ديال السورفيت وناض جلس بشوية حيدها للجنب وتكا بالبوكسر كحل مطراسي عليه وهز راسو لفوق كيتنفس بشوية
بقات اشراق غير واقفة فالجنب كتشوف وحشمانة كتحس براسها غريبة مزال متأقلماتش مع الوضع ويالاه عروسة جديدة كفاش غادي تصرف مع زوج مكتعرفوش مزيان والحدود بيناتهم

شافت فيها سلمى بابتسامة وقالت: كفاش بقيتي ؟ داز عليك الحال شوية

حول النضر جهتها شاف فيها وطلع وهبط .. كانت بقميص جوهرة ابيض ناعم وتقاشر رقاق كتصلي بيهم والشعر كان محلول جمعاتو بالزربة

اشراق: الحمد لله مزيان على سلامتكم (وشافت فيه)

حرك راسو بالايجاب بابتسامة خافتة عينيه تقال ويدو مور راسو وشاف فسلمى وقال

- سيري جيبي ليا كاس دالماء

مشات سلمى كتجري هبطات والحاجة كدور وتجبد ليه حوايجو واشراق غير كترمش وتلف

اشراق: نعاونك الحاجة ؟

الحاجة : حطي ليه هاد الحوايج ابنتي فالبلاكار ... وهادو غنهبطهم يتصبنو

هزات اشراق الحوايج والحاجة هبطات معاه اللي غيتصبن وخلاتهم .. عطاتو بالضهر كطوي وتحط فالبلاكار وتكتاشف خصوصياتو .. حوايجو تقريبا كاملين رياضين .. اللبسة ديال القضاة معلقة بوحدها باقا جديدة باينة يالاه جات وحداها لبسة اخرى ديال التخرج وطربوشها .. فوق منهم رف عامر ملفات وكتب وحداهم الكادو اللي جابت ليه باقي مغلف ما تحلش.. تقرصات فاش شافتو باقي كما هوا . شنو زعما ماعندوش فضول يحلو حتى يشوف شنو فيه !!! علاش زعما مداهاش فيه يكون تشطن ونساه !
كملات طويان الحوايج وستفاتهم وردات الباب وتلفتات شافت فيه لقاتو متكي راسو لفوق وساد عينيه .. سخف غتكون خرجات منو نيت فهاد المرضة


بقات واقفة كتشوف فيه .. ندير المبادرة انا .. ياك مراتو وهوا طايح مريض .. منبقاش هاكا مكتفة كنتفرج فيه .
قربات منو بابتسامة وجلسات على كرسي بجنبو وقالت بهدوء ونضرات حب وحنان

- كي بقيتي ..؟

حرك راسو وهوا على نفس الوضعية بالايجاب طمنها .. ابتاسمات وعاودات سولاتو وقربات يدها حطاتها فوق الغطا اللي مغطي كرشو وقالت

-باش كتحس دابا ؟

حيد يدو اللي تحت راسو وحطها على يدها وقال بصوت غامق باح

- دازت الحمد لله (حرك صبعو بحنان على يدها وشاف فيها ) ماعندك علاش تخلعي


جاها ارتجاف من لمسة يدو دايت وجمدات فلحضة وحدة وفرحات من ردة فعلو ... يعني طبعو هاكا خاصني غير نتفهمو ونعرف نتصرف معاه .. يعني هوا حدودي ومع الوقت غادي يتطلق ! حتى الطريقة باش تزوجنا فشكل وكولشي جا مزروب ومابقاش لينا الوقت فين نتعارفو ويعرف طبعي حتى انا ونفهمو بعضياتنا .. ولاكن ماشي مشكل كلشي فلحلال زوين
ابتاسمات ويدها على نفس الوضعية وقالت بحنان صوت كيدوب الثلج

خاصاك شي حاجة ؟

حرك راسو وقال على نفس الوضعية : لا ماخصني والو ... نتي مزيانة ؟ رتاحيتي شوية؟

قالها وهوا كيشوف فيها بابتسامة تعبانة ونضرات تقيلة .. حركات راسها وردات زعبة لور على وجهها وقالت

- كن مخلوعة عليك بزاف ... كولشي داز الحمد و غترجع صحتك حسن من الاول ...

طبطب على يدها وقال : نشاء الله ..

دقات سلمى ودخلات قالت: اشراق لا فامي ديالك جات

تلفتات اشراق : واخا هانا جايا

شافت فيه بحنان وقالت: الى بغيتي شي حاجة عيط ليا انا غير لتحت

حرك راسو بالايجاب وناضت دارت شال على راسها وهبطات ردات عليه الباب


استقبلات عائلتها اللي لقات لتحت كتسناها بالفرحة وجلسات معاهم بسعادة .. باباها وماماها وختها وعماتها وبنات العائلة .
لاللة نزيهة : كي بقيتو ابنتي ... كولشي مزيان ... كي بقا محمد طه

اشراق: الحمد دازت على خير

الحاج عبد الغني : لا الاه الا الله محمد رسول الله .. شوف الناس كفاش مكتخافش الله ... منين جا دابا هاد التمم هادا يالاه

الحاج الناجي: نحمدو الله اللي دازت على خييير .... انا بان ليا الشغل دار لإشراق ... وجات فسي محمد ... هادشي اللي بان ليا

قالت لاللة نزيهة بأسى وحيرة : وشكون هادا اللي عيكون حط ليها هادشي ؟؟؟ ويلي اشتغفر الله العضيم

تنهدات الحاجة : ماعرفناش... الدعوة بيه الله وهاد الليلة ديال الجمعة كما بغا يرزينا فوليداتنا يترزا وحبابو ... حسبي الله ونعم الوكيل خلانا هاد السيمانة فالسراط ...

بقاو كيتجمعو ويتنهدو من المأسات اللي عاشوها .. تعشاو مجموعين فجو عائلي واخا ماقدروش ينساو شنو وقع وناضو ودعوهم وخرجو . تلفتات الحاجة شافت فأشراق وقالت

- سيري ابنتي لبيتك ترتاحي ... و شوفي راجلك عنداك يبغي شي حاجة ميلقا حتى واحد حداه .

ناضت اشراق وقفات وقالت: شنو غيتعشا؟؟

الحاجة : راني صاوبت ليه الصوبة يشربها .. عنداك ينسا الدواء ديالو

مشات اشراق هزات البلاطو من لكوزينة وطلعات فالدروج .. وقفاتها الحاجة وقالت بخجل

- دابا اللي داز داز ... صافي بدلو الجو شي شوية و بدلي حويجاتك .. دوشي ورتاحي ... ياك فهمتييني ابنتي

ضحكات اشراق بخجل وطلعات للبيت حلات الباب بشوية مدخلة البلاطو .. هزات راسها فيه لقاتو طار مابقاش فبلاصتو .. غير الفراش مكمش اللي كاين


بقات مخرجة عينيها .. اويلي فين مشا !!! .. سمعات صوت الماء فالحمام عاد فهمات وحطات البلاطو بشوية ومشات للبلاكار جبدات ليه بيجامة ديال النعاس حطاتها ليه فوق الناموسية .. مشات للبلاكار اللي حطات فيه حوايجها وبدات تقلب على فاش تنعس... كدور بين ليسوميج دو نوي وتشوف اينا وحدة تلبس .. جبدات وحدة ديال العرايس كريمي بالدونتيل من الصدر وقصيرة لبساتها منها للحم ولاحت عليها بينوار ديال سوميج فنفس اللون فوق الركبة وسداتها باحزام .. بانت الشقة ديال الصدر ابييض ودارت سنيسلة فعنقها وخلخال رقيق فرجليها وصبغاتهم بالاحمر .. هزات عطر كستعطر بعود رقيق دوزاتو مور ودنيها وبين الثديين والمعصم وسرحات شعرها بمشطة وحطات مرطب الشفاه مع تكحيلة خفيفة و اسيسوارات ذهبية خفيفة فيدها ... وقفات كتشوف فراسها بكل ثقة ودور قدام المرايا ياكما ناقصاها شي حاجة .. واخا حتى حاجة مناقصة بلعكس كتصرخ بالانوثة والشعر ناعم متموج منشدل مع كتافها ... جبدات مبيخرة دارت فيها عود اصيل عطرات بيه الغرفة وناضت خشات رجليها البيضاء فبانطوفة بيضاء وبدات كتحرك فالبيت والمؤخرة كتلعب والصدر كيتمايل . رجيلات كيشعلو وشط البياض ديال الثوب اللي لابسة وكأنها انسانة تحولات الى حورية .. سمعات صوت الماء وقف ومشات شعلات التلفازة وجبدات توب ابيض ديال الصباح حطاتو فالمجر حدا راس النموسية وجلسات دارت رجل على رجل كخوي العصير ديال الليمون فلكاس ليه وزادت عليه معلقة ديال العسل الحر باش يفوتو الوجع وودنيها معاه سمعات الباب ديال الحمام تحل

سمعات حسو وبقات على نفس الوضعية .. حطات المعلقة حدا العسل وهزات راسها شافت فيه لقاتو واقف عريان لاوي عليه الفوطة وكيشوف فيها .. يا صدمتاه باينة مكانش متوقعها .. ويا صدمتاه ليها محسابش ليها غيخرج ليها هاك بالصدر عريان والماء كيهبط من شعرو ! فعفعها بديك الفورمة .. واخا باينة خادم عليها مزيان من تحت الحوايج ولاكن ماشي بحال مباشرة ما عليه حتى شرويطة
.: تناسق جسدي وبنية قوية مع عضلات مفتولة وصدر وكتاف عراض .. شعر كحل نايض في الابطين والصدر مغري ، كرش مسطحة مشتت عليها الشعر سيقان طويلة رفيعة بعضلات قوية وصليبة صدمها وكيشوف فيها بعيونو ذات الشكل العطوف الداكنة اللون .. واش العطف فعلا طالع من القاب ام غير شكل فقط وما كدل على حتى صفا من الصفات اللي كمتاز بيها ؟ حواجب حادة وفم صغير جامع جميع الصفات الرجولية .. ارتابكات لحضة لاكن تراجعات .. مالو ! راجلي وحلال عليا فين كاين المشكل خاص هاد الحاجز يتحيد والى مابغاش غنحيدو بزز منو

ابتاسمات فوجهو ابتسامة لطيفة قالت بارتباك

- بالصحة ..فاتك الحال شوية؟

هبط عينيه وقال: صافا مزيان ...: ناضت وقفات كتمشا قدامو وتلعب بشعرها وهي كتركب تيليفون يتشارجا . خدا رحلة قصيرة فجسد اجمل ما في الدنيا ... وهم الاناث .. الانوثة كتنبع من كل جزء فيها وهي كتحرك قدامو بحال الى كتعرض نفسها عليه وكتجدبو ليها بطريقة غير مباشرة .. حكات ثديها وما ادراك ما الثدي .. منبع الشهوة مبعد الساقين الناعمتين . الرقبة الناعمة ككتلعب فيهاالسنسلةكأنه

ا كتعلب فوق توب من الحرير .. كتدحرج على النهدين بهداوة بحال الى كتعيط عليه يلاعبها . ردات شعرها اللور بلطافة داز سلم على المؤخرة بلطافة واستقر فوق الثوب الناعم بارتياح . تعمدات تبقا شادة تيليفون فيدها وهي واقفة وزادت تاصلات بخليج باش تكسر خجل الجو وتخرجمنو بسلاسة وتحط جو اخر على طبق من الاعتياد
ردت بصوت ناعم على الخط ويدها كتلامس السنسلة وحرير صدرها مرة مرة متحررة مع نفسها وقالت

- الو .. خليج .. الحمد لله اكبيدة ديالي وصلتو مزيان
اشراق: الو خليج ... الحمد الله اكبيدة ديالي وصلتو مزيان ؟... كولشي بيخير . . . ماما لاباس عليها ... بغيت نسول فيكم كي وصلتو وصافي ... (تنهدات ) يالاه .. سلمي على ماما .. تصبحو على خير
حيدات تيليفون من ودنها شافت ومع القطعة حسات بيد دازت مور ضهرها كهرباتها وقال بصوت لطيف كيحيد ليها تيليفون

- تشارجا ليك شوية

ابتاسمات بخجل وقالت : باقي بغيتي تشارجي تيليفونك

قال ويدو مور ضهرها : وي الى مكان غيعيط ليك حتى واحد

حيداتو وقالت: لالا صافي .. غير خود .. عطيني تيليفونك

مدو ليها ركبات فيه الشارجور وتحركت من حداه مشات جهة التلفازة بعفوية مسطنعة مع حركات انثوية نقصات فيها وشافت فيه بنص عين .كان لبس الشوط خفيف قطني بالسيور وبقا شاد تيليفون فيدو وساهي فيه

جلسات حدا البلاطو ودارت رجل على رجل حدا الطبلة وقالت

- غتبرد ليك لاسوب

حط تيليفون وتلفت بابتسامة مشا مشا نيشان جلس جنبها وقال بلطافة

- لاسوب صايبتيها نيت؟

حركات الكاس دليمون بالمعلقة و قالت

- صايباتها الحاجة .. انا صايبت ليك الليمون ... فيه العسل باش تبرا دغيا

مداتو ليه شدو وقال : ميغسي (ودوز يدو على ضهرها بلطافة)

بدا كيرشف ويتناقش معاها وجبدو موضوع التسمم

اشراق صوت حنون : الحمد لله اللي رجعتي سالم ... خليتينا مخلوعين ... شكون يقدر يدير بحال هاد الفعلة ؟؟؟

حط الكاس وشاف فيها بابتسامة كيتأمل ملامح وجهها وحط يدو بلطف على وجهها وقال

- كل واحد عندو حسادو .. وكولشي كيمشي بالمكتاب (لامس صبعو مع خدها) تخلعتي؟

حركات راسها بالايجاب وقالت بدلع
- بزاااف

تأملها بعطف و رد يدو مور ضهرها جبدها عندو ضمها لصدرو .. ياااه على احساس ... احساس عمرني حسيتو من قبل .. كنت حاسة باللي وسط هاد الشخص الصارم شخص اخر عطوف .. واخا الزواج جا بالزربة حتى الولف والتفاهم غيجيو بالزربة

وهي على صدرو مغمضة عينيها رن الهاتف وبعد شوية بغا ينوض لاكن تسابقات وقالت

- غير خليك ... انا غنجيبو ليك غير رتاح

مشات كتجري عندو حيداتو من الشارج ورجعات بالزربة بغات تعطيه ليه لاكن تصدمات شافت صورة ليلى طالعة كتصوني.. خفق القلب وتغيرات النضرة وهي كتقرا على الاسم "baby" طلع خنجر مع صدرها وقربات عندو وهوا جالس كيشوف فملامحها اللي تبدلات .. مدات تيليفون وصدرها كينهج وقالت

- ليلى ...

تغيرات نضرتو حتى هوا وتفاجأ وشد تيليفون قطع وحطو فالجنب وهز راسو لقاها واقفة كتشوف فيه بغيرة وغضب وقالت

- جاوب

تنهد ونفخ فمو وساط بهدوء وقال : جلسي..

قاطعاتو بصرامة : جاوبها

غمض عينيه ودور وجهو للجنب كيزفر .. ها المشاكل بداو .

- جلسي ا اشراق

شافت فيه باستغراب وقالت : جلسي ا اشراق !!! كفاش كلسي يااا اشراق بهاد البساطة ؟؟ ليلى علاش كتعيط ليك ... و " baby " شنو مزالة كدير تما ؟

هبط راسو وحط يدو على جبهتو ساكت اما هي خرجات عينيها صدماتو بقا غير كيشوف فيها وعلى الجرأة ديالها

- جاوبني.... علاقتك القديمة شنو مزالة كدير عندك ...

ما هضرش .. ولا يمكن الجرأة ديالها سكتاتو بقا غير كيشوف مصدوم

قربات وجهها عندو مكمشة فمها وقالت : عنداك يحساب ليك هادي غيرة ...هادا تقدير واحترام داتي وقيمة ومهر اللي كنتسالك وعلى رقبتك .. وانا مراة مزوجة بيك ماشي عشيقة ومنسمحسش لهادشي يوقع فحياتي ولا تمسح بكرامتي الارض

زفرات ليه فوجهو بغضب وغيرة ومشات هزات بينوار وتليفون بالزعفة ودازت جهة الباب وهوا متبع ليها العين مشوكي مخنزر و خرجات وزدحات الباب

مشات لبيت سلمى كتلبس فالبينوار وتبكي ودقات عليها حلات سلمى الباب و لقات اشراق واقفة كتبكي وحالتها حالة بالدموع .. شهقات سلمى وقالت
- اشراااق!!! مالكي ؟؟ شنو وقع ليك

ترمات فأحضانها اشراق كتبكي وتشهق خلات سلمى فحيرة غير كتشوف .. باينة رونوها فالبيت وخرجات ولا خرجها ، دخلاتها للبيت كتهدنها وشرباتها الماء وجلساتها كتستفسر ... حكات ليها اشراق كولشي بحزن وقالت

- واش هوا ماقطعش علاقتو بيها ؟؟؟

زفرات سلمى بغضب وقالت : قطع .. وكن ماقطعش مغيتزوجش بيك ... صافي ماتبكيش وماتجبديش المشاكل لراسك ياك هي اللي معيطة ليه ماشي هوا .. راكي عارفة البنات ميتهناو حتى يفرتكو العش

شافت اشراق قدامها بغيرة ودموع وقالت : الااا .. هوا كاتب ليها " baby" وحاط تصوريتها .. مخافش تصوني عليه زعما قدامي ولا انا نشوفها ؟ شنو زعما مادايرش ليا اعتبار ولا شنو ؟ وكيحط تيليفون قدامي عادي .. شنو زعما واخا نشوفها غادي نسكت ونحني راسي

هبطات سلمى راسها في حيرة مالقات ماتقول .. سكتاتها اشراق مالقات حتى مبرر من غير

- انا غدا غنهضر معاه ... وغنشوف هادشي كوني هانيا ... دابا راه مريض خليه حتى يصح ونتفاهمو

تنخصصات اشراق وقالت : وماعطاني حتى مبرر ... بحال الى زايدة ناقصة .. بقا غير كيشوف فيا واش انا شايطة (تنخصصات) حطي راسك بلاصتي .. لبستي لراجلك وتقاديتي على كحل عيونو و درتي مبادرة من عندك كاع اللي من المفروض يديرها هوا (كتنخصص) قلت راه مريض اللي فيه يكفيه ماعليش من واجبي نوقف معاه فمحنتو واخا باقا عروسة .. وهوا شنو؟؟ طيح من قيمتي فدقة وحدة ولا على بالو

جلسات تنخصص وتشهق تحولات من امرأة لطفلة صغيرة .. نيفها حمار والدموع وكتقطع فالقلب قطعات لسلمى شراين قلبها خلاتها كتفقص من لداخل بوحدها وتسكتها وتبرد عليها

سلمى: صافي احبيبة صافي ... صافي حنا غدا غادي نتفاهمو .. ماتقوليش هادشي لداركم صافي ... خليه غير بيناتنا حنا غنعرفو ليه انا غدا غنصبح عليه .. بلا منوضو الصدع فهاد الليل ... اجي نعسي حدايا يالاه وسكتي خليه يعنق المخاد دابا

جراتها نعساتها حداها وغطاتها وكل شوية تنهد وتسكتها واشرق كتنخصص .. اصعب احساس فاول يوم ممكن يوقع لعروسة حديثة الزواج خناجير حادة كتلعب فصدرها ومعنقة المخدة بقات كتبكي بحرقة وسلمى معاها كتواسيها حتى نعسات والصباح صبحات على الحاجة فوسط الدار بنفس البينوار لابساه طويل وجامعة شعرها وكتشكي عليها وتبكي والحاجة كتجرها عندها وتعنقها وتسكتها

- صافي ... صافي ابنتي والله ماتبقا فيه الا بقات فيه تبقا فيا ... والله مندوزها ليه ... مسحي دموعك الله يرضي عليك وفطري

بعدات اشراق وجهها كتنخصص وشنايفها حومر كيترعدو ورموش عينيها بالدموع ميقطرو بغات تسخف بالبكت

- مافياش .. مافياش غير... غير خليني

الحاجة : شربي .. شربي الماء الله يرضي عليك ..شربي

شدات الكاش كتشرب وسنانها كيتقرقبو .. اما الحاجة كحال وجهها ماعجبهاش الحال ويدات تسوط .. سمعتت الحس فالدروج وتلفتات شافتو لابس نفس الشورط باش نعس وتيشورط وبانطوفة ونازل مع الدروج كيشوف فيهم .. تلفتات اشراق بعفوية حدها شافتو بدات تمسح دموعها بالزربة وناضت كاع من الطبلة مشات طالعة ودازت من حداها شدها من يدها وقال .

- اشراق...

نترات يدها وشافت فيه مكمشة فمها نيفها حمر وعينيها كيبريو بالدموع

- بعد منييي ... اخر مرة تقيسني

الحاجة بصوت خافت : هااح ياااالاه
دورات وجعها زعفانة وطلعات لفوق خلاتو كينفخ .. هبط عند الحاجة وقال
- صافي ؟ .... عاجبك الحال دابا ؟ رتاحيتي؟

شافت فيه الحاجة بغضب: فاش غنرتاح ؟ كترد ليا اللومة حيت زوجتك بنت الناس ؟ ها ؟ حيت جبت ليك لااااااللة البنات ... (صغرات عينيها) عرفتي اشراق ... يتمناها اي واحد ... اي واااحد كيتمنا مرى بحال اشراق تصونك وتصون العرض ديالو ...محتارمة راسها وغزالة مالها شنو ناقصها؟ غزاااالة الصلاة على النبي ... كتسمحو فالماكلة الدار وتمشي لديال الزنقة ... تموتو على الحلوى لمكجكج عليها الدبان

دار يدو على نيفو حشم وكما كتعرف الحاجة فولدها .. احترام الواليدين و الحيا من الميزات اللي فيه هوا وحى فخوتو ... الواليدين خط احمر وهاكت رباوهم من الطفولة يحنيو الراس مهما بلغ الامر . سكتات الحاجة شادة يديها عندها كتزفر وتشوف فيه بنص عين وقالت كدور راسها
- اممممم ... علاش عيطات ليك ليلى ؟ شنو بغات ؟

جر الكرسي بنرفزة جلس كيسوط مجاوبهاش . جلسات قدامو كتشوف فيه عاقد شوكتو وكيدور فعينيه وبغات تعرف بأي وجه كان

الحاجة : علاش معيطة ليك فنصاص الليل؟؟ مالها

شاف فيها مطولا بجدية وقال : ليلى فالكلينيك الحاجة .. راه بغات تنتاحر

شافت فيه الحاجة بصرامة وقالت: تنتاحر .. وعلااش غتنتاحر

ضحك بسخرية وقال : هه علاش غتنتاحر ....

الحاجة خرجات فيه عينيها : شوف السي .. نتا راك مزوج دابا ... وعندك مرة مابقيتيش ديال راسك ... غادي تشد الطريق مع الله ولا راه غيصرف فيك شي موصيبة ماتعرفها منين تجيك ... بااااركة عليك هادشي اللي كان غيوقع ليك .. السم تحط للعروسة وشربتيه نتااااا ... باش تعرف راسك متقل وربي عطاك اندار .... لحرام ديالكم راه مايرضى عليه لا ربي ولا عبدو سمعتي ... حراااام هي حرااام وسالينا ماتقول لي لا ليلى ولا لولو

هضر بهدوء وصوت خافت : تفاهمنا من الاول ... تفاهمنا على هادشي(هز حاجبو ) نتي بغيتي اشراق وكنتي غتموتي ليا كن ماجبتهاش ... وهضرت معاك الحاجة والحاج كيسمع .. هادي حياتي وانا ندير فيها اللي بغيت .. وضحيت على قبلك ودرت شنو بغيتي نتي والحاج .... دابا ميكو عليا شوية وخليييونا هانين ...

قالت الحاجة في حيرة : شنو بغات منا هادي شنو ... بغات تلسق فينا بزز اش درنا حتى يوقع لينا هادشي ... صافي تزوجتي تمشي الله يسهل عليها ... الله يجيب ليها ولد الناس اللي يبغيها وتبغيه

حرك راسو بميوعة وقال : اري ليا كاس دالقوة اااري

الحاجة : وعندو منين يدوز ليك !!!!! (هزات يديها ) باااااز ليك اسيدي باااااز مرتك بايتة كتبكي فعوض ماتصبح فرحانة فبيتها بايتة الليل كامل بلا نعاس.... شد ... ها تيرموس شربو كولو

حطاتو ليه بالزعفة تا بغا يميل شدو وناضت خلاتو كينفخ وحط التيرموس بالزعفة وبدا يردد

- صبحنا على الله .....

جالسة اشراق فالبيت دالنعاس ديالها كتهضر مع خليج بابتسامة مسطنعة مابغاتش تبين شنو واقع ليها وشنو عايشة لحد الان .. حسن باش ميتخلعوش عليها ومارضاتش تعاود مشاكلها ليهم وهي يالاه فمشوار الطريق.. وكما كانت مفتاخرة بعائلة راجلها وراجلها قدامهم مابغاتش تلوت الصورة وسكتات كتهضر كأن شيءا لم يكن .. شدات الخط تاني مع لاللة نزيهة
- الو ماما ..... الحمد لله كولشي بيخير ... سول فيك الخير .... كولشي مزيان

لاللة نزيهة ؛: واش كولشي هوا هداك ... نجي تعطيني داكشي؟

قالت اشراق بتردد : وعلاش بغيتوه ؟

لاللة نزيهة : هأ!!! العادة ابنتي راه مك لالاك غير كتسول عليه وباك سيدك كل شوية يحشي لينا الهضرة ... والى متشافتوش بعيينيها غتخرج فينا العجب وتبقا شاداها فينا

تنهدات اشراق بعمق وقالت : صافي .... واخا اماما .... اجي

لاللة نزيهة : الله يرضي عليك ابنتي

قطعات اشراق وبقات جالسة كتفكر ويدها على فمها ودور عينيها فبيت النعاس ... باقي كما هوا كما خلاتو الليلة الماضية .. وقفات بأسى مشات لداك المجر اللي حطات فيه توبها وهزاتو كتشوف فبياضو وتأسف ... دخلات للحمام سدات عليها وحطاتو قدام المرايا وبدات تقلب فالمجورة وتجبد وتحط حتى طاحت على ادات حادة وشداتها كتشوف فيها ووقفات شافت وجهها فاامرايا بعزيمة ... زيرات على سنانها وشافت فيدها ودزات على صبعها الصغير بجرحة كتألم مغمضة عينيها وبدات تعصر الدم فوق التوب مزيان حتى عمراتو مزيان .. تحل عليها باب الحمام على غفلة وتلفتات مفزوعة شافتو واقف كيشوف فيها مصدوم وتدخل بسرعة حساب ليه محاولة انتحار نتر ليها الادات وشد ليها يدها

محمد طه : شكاااديييري ؟؟؟؟
شد ليها فيديها بخوف كيشوف شنو دارت وهي مزنكة عينيها كيلعبو وحناكها حومر .. خلعها وبقات غير كتفتف .. شوية بقات كتشوف وجمعات راسها وكمشات فمها ونرتات يديها وقالتها ليه فوجهو
- طلق منييي.... ماتقيسنيش وماشي شغلك فيا

جر ليها يديهت بجوج شدهم بقوة وزعزعها من بلاصتها بصوت قوي

- واش حمقااا؟؟؟ مريضة فراسك نتي

نفضات يديها وقالت كتسممو بطريقة الاناث

- بززززززاف عليك ... واخا باغي تشوف شنو كندير ... شوف

رجعات لشغلها قدامو كيشوف جمعات داك التوب بالزعفة طواتو ولوات على صبعها فاصمة بالزربة وهوا مستغرب كيتسارا معاها بعينيه .. دازت من قدامو بالنفخة درباتو بكتفها وخرجات وهوا تابعها كيشوف اش بغات دير ..

خرجات من البيت بالزربة وتبعها كيستفسر مع راسو مالقا حتى تفسير لشنو بغات دير .. كانت الحاجة شادة ولد بنتها وجالسة لتحت .. مشات عندها اشراق كضحك جلسات حداها وجبدات التوب عطاتو ليها وقالت

- اشراق: الحاجة....

شافتو الحاجة حساب ليها بصح وشداتو شافت فيه فدهشة حساب ليها بصح وناضت بالفرحة حطات الولد فوق الكنبة وبدات تزغرت واشراق كتبتاسم بزز

اشراق: ماما جايا دابا على قبل هادشي ... عطيه ليها نتي

الحاجة : مبروووك عليك مبرووووك عليكم ايوا هاكا نبغيكم الله يتاويكم ...

ندافع بسرعة مارضاش وماعجبوش الحال وطيرو من يد الحاجة بغضب وشاف فوجه اشراق لأول مؤة بصرامة وغضب شديد مخرج عينه فيها كيشالي بيه

- اش هاااادشييي؟؟؟؟ شهاد لخرااااا هادا اللي درتي واش عارفة راسك شنو كديري ولا لااااا

خلعها متوقعاتش ردة فعلو ورجعات اللور .. تدخلات الحاجة بسرعة بيناتهم وقالت بهلع

- الله ينعل الشيطان اولدي ... هادو التقاليد عند الناس ك ...

قاطعها بانفعال وغوت : اااشمن تقاليد ... اشمن نااااس ((شافت فأشراق وقال كيزفر تحت سنانو وعينيه خارجين ) واش عاااارفة هادشي اللي درتي شنووو كيعني .... (غزز سنانو)

خافت بقات كتشوف فيه ولحسن الحظ دخلات لالة نزيهة فديك اللحضة هي والجدة وبسرعة تعرضات ليهم الحاجة واشراق دارت ومشات كتجري عند مها عنقاتها وترمات فحضنها كتبكي

لاللة نزيهة : امالك كتبكي ههه

الحاجة : بارتباك ) توحشاتكم ههه زيدو زيدو مرحبا بيكم

تلفتات لور جيهة الكنبي مالقاتش محمد طه . . هبطات عينيها لقات الشرويطة مرمية فالارض ومشات بالزربة هزاتها بسلاسة خباتها

جلسو بطبيعة النسا كيزغرتو واشراث كضحك ومرة مرة تهرب عليا الضحكة ومها كترضي عليها والحاجة فرحانة .. ضايفهم بكاس ديال القهوة وحطو ليهم الحلوى ورحبو بيهم حتى مشاو وجلسات الحاجة حدا اشراق كدوز يدها على ضهرها بلطف
- ماعجبوش الحال حيت وريتيه لينا ياك ؟؟

هبطات اشراق راسها بأسى ساكتة وكتنهد

الحاجة : ماشي مشكل .. راك عارفة ولاد اليوم ... غير العصبية على اتف حاجة ... ( ابتاسمات) كفاش كان معاك مزييان ابنتي ... ياكما كان خايب معاك ؟

حركات اشراق راسها بابتسامة حزينة وشافت فيها

- كان مزيان ... المهم ادينا الفريضة هادشي اللي مهم

طبطبات عليها وقالت : صبري الله يرضي عليك مع راجلك ... سايسي معاه راه دابا مابقيتوش اصدقاء ... راك وليتي مراتو ... سري طلعي عندو شوفيه و راضيه ماتخليهش مقلق منك

دورات اشراق عينيها فبلاصتهم وناضت بتتاقل طلعات لبيتها ... حطات يدها على البواني بتردد وعضات على شنايفها خايفة تشوف وجهه وتواجهه .. حلاتها بشوية طلات كدور عينيها مالقاتش حسو ... دخلات بصمت كدور ومشات جهة البالكون شافتو واقف وخرجات عينيها !!! اوااه !!! كيكمي !!! كاع مباينة فيه كماي ! عمري شميت فيه ريحة الكارو !! هأ! وانا امتا قريت منو باش نعرفو واش كماي ولا ماشي كماي ... مزاال الايام توريني العجب معاه هادي غير البدية .

قاست واحد الفاز بيدها بلا متحس وتلفت شافها لاح الكارو من يدو ودخل عندها
تخلعات وهزات الفاز بالزربة وماجات فين توقف حتى لقاتو حدا راسها كيخزر فيها ويزفر بحال التنين
- مزااال ماسخنتيييش بلاصتك بديتي كطيري هاا؟؟؟

بعدات اللور معصبة وردت : كفاش ماسخنتش بلاصتي؟ شنو بغيتي مني دابا ؟؟؟ عائلتي كيسولوني... وسيمانة وانا هنا شنو باش غنجاوبهم ؟ نهز التهمة راسي !!!

كتهضر وترجع باللور وهوا كيزيد قدامها بغضب هز جوج صبعانو فوجهها وقال

- حلي ودنيك مزيااان.... غنكول لك جوج كلمات ابنت الناس مغنعاودهش .... راك داخلة سخونة ومجهدة مع راسك .. ومزال مكتعرفي معامن نتي ... غتهبطي كواريك للارض ولا غنكحل عليك عيشتك سمعتيني

ماعجبهاش الحال وبقات مصدومة كتشوف فيه .. لسقات مع الحيط واقفة وقالت بقوة مخرجة عينيها بتسمم

- ماشي عبدة انا ... سمعتي ... بديت بالسلم وماخليتيش السلم يكمل وماشي انا اللي تهز عليا صوتك ... انا ماشي هي ليلة وليل...

قاطعها : نتي هناااا فداااري ... فبيتي ... وجهدك هادا خليه فدار باااك ... جارحة صبعك زعما دايرة فيها واعرة

قالت كتدعي القوة : انا ضطريت ... ضطريت نوريه

هز يدو على غفلة حساب ليها غيضبها لاكن جات فالمرايا اللي مراها عطاها لكمة حتى تهرسات ورا ضهرها .. جات تهرب ردها لاحيط اللي بقا بلا مرايا وقال مخرج عينيه

- غتجمعي راسك معايا هوا هاداك ... مغتجمعيش الدقة الجايا غتجي فهاد الوجه ... ومغندوزهاش ليك بالساهل هاد الفعلة

غرغرو عينيها وقالت كتجابه : كتستقوا عليااا ... ااا ؟ كتستقوا عليا حيت ماعنديش هاد الصحة اللي عندك .. حيت انا مرى ضعيفة منقدرش عليك ..

قرب كيغزز سنانو : خشي هاد الهضرة فين ما بغيتي ... دابا غيبي من قدامي منشوفش وجهك

بعد كيسوط لاكن طول الوقت ماقسهاش واخا بصبع والدقة اللي عضا للمرايا خلات ليه اثار الدم فيدو لاكن ماعاروش اهتمام .. مشا جهة البالكون شوية سمع الهرس موراه وتلفت لقاها كتبكي ومخرجة عينيها كتهرس فأي حاجة قدامها وتغوت

- علااااش تزوجتييي بيااااا .. علاش جبتيني لهنااااااا ... علااااااش

هزات واحد الفاز شيرات عليه بغضب خوا ليها جا فالبالكون وتم غادي ليها لاكن دخلات الحاجة كتجري مخلوعة وقفات بيناتهم كترعد

الحاجة : اش واااقع ..ياك لاباس اش واااقع (شدات فيديه محمد طه كترغب ) وجه الله اولدي ... وجه الله برد برررد
موراها اشراق كتغوت وتنهج : مجااايبنيييش من الزنقاااااا .... جايبني من داار باااا ... وكن كنتي راااجل متسقواش عليا

حل عينيه فيها وبغا يطير عليها لاكن ردعاتو الحاجة اللي كانت غطيح

محمد طه : مغنتعاطاش معاك بخال العيالات... اجي نوريك الرجلة فين كاينة .. رجعات اللور تخبات مور الحمام كطل وتسب وتشهق

ستقوااا على اللي قدك وبحالك ... انا مرى ماعنديش قوتك نواجهك بيدي سمعتي ..

شد فالحاجة ثاير بغا يدفعها وقال: واش سمعتيهااا ... حيد الحاجة ماتشدينيش ... كتغوت واش باغا نقتلها

الحاجة كترغب وتشراق كترد : تقتلني هه!!! حساب ليك انا رتيلة تزطم عليا

تلفتات الحاجة : اشرااااق ... خرجي من هنا خرجي

مشات هزات باليزتها وهوا هايج مو حابساها وهي عاد بغات تجمع حوايجها

طلقات الحاجة منو بالزربة وجراتها من يدها بغات تخرجها لاكن اشراق نترات يدها وقالت

- غنجمع حوايجي ...

الحاجة : واش حنا دابا فالحوايج دابا

اشراق: مالو غيخلعني !!!! غنهز حوايجي ويتشق هوا وبيتو

جرها من يدها بقوة وقال : الخاجة خرجي ... خرجي من البيت غنهضر معاها

نترات يدها : طلق مني ... حساب ليك خايفة منك !

عاود شدها وزير عليها بقوة وقال للحاجة كيسوط من مناخرو

- خرجي الحاجة ... غير غنهضر معاها

الحاجة : الله يرضي عليك اوليدي نعل الشيطان .. الله يرضي عليك

اشراق : صافي .. خليه بغا يهضر انا غنسمع اش غيقول ..هضر قدام الحاجة

جر مو وطلق من اشراق وقال : خرجي ... ياك انا ومرتي ... علينا نفضيو هادشي ليوم

خرج الحاجة وهي كترغبو وتسول ليه وزدح الباب سقطو
زدح الباب ودار لقاها دايرة يدها على جنبها وكتشوف فيه بدون خوف ... شاف فيها بتكره وتقزز ودفعها جلسها على الناموسية
اشراق: مادفعنيش ماخداماش عندك ... اخر مرة تحط يدك عليها (هزات حاجبها )

جلس قدامها بتكره وقال مصغر واحد العين : انا غنجيك من اللخر ...

قاطعاتو : يالاه جيني (كمشات فمها بميوعة ودارت رجل على رجل بتكبر)

تكره بنضراتو وقال: شوفي كي دايرة شوفي...شوفي وجهك فالمرايا

ضحكات بسخرية وقالت كتلعب بشعرها

- مااالي كي جيتك ؟ شوف نتا راسك فالمرايا (هزات حاجبها بميوعة ) اما انا للاااااك بنت سيدك مني وحدة هيا اشراق ... ماشي بحال اللي مولف بيهم

بقا غير كيشوف وقال باشمأزاز : دابا فيا ميحد ليك عياقتك ولاكن جيتيني مرى ...

قاطعاتو كضحك وقالت : بصاااح حساب ليا جيتك راجل ... مللي جيتك مرى ماشي راجل مالك درتي هاد الحالة على شرويطة !

هز حاجبو كيشوف فيها متوقعش ابدا يخرج منها العجب وقال

- واش كتقلبي على شي حاجة ؟ ... لا بنتي ليا كتقلبي نهز ليك رجليك فالسما المدينة كاملة تسمع غواتك !

جمعات فمها مارضاتش وخزرات فيه كتسوط ودفعاتو من صدرو وقالت

- لهلااااا يحيك حتى تقيسني باقي ماخلقش هادا اللي يحط عليا يدو

تلاح عليها بوحشية شد ليها يديها حتى خرج حلقها والحاجة كتغوت ودق فالباب .. تخلعات اشراق وبدات تغوت وتردد

- كتستقوى علياااااا ... الشمااايت اللي كيستقواو والرجال كيواجهو الرجال ماشي العيالاااااات

زير ليها يديها لفوق وقال : وا سدي فمك ... وخافي على راسك وجمعي ك***** معايا

طلق منها رجع لبلاصتو جلس كيشوف فيها ويطلع ويهبط وهي فالقفطات دجوهرة كتغطي رجليها وجلسات حاطة يدها على صدرها مخلوعة كتشهق

- هضر بفمك ... خلي القوة للرجال عارفني منقدرش عليك .

رد بتسميم : اااصلا انا متزوجتش بيك باش...

قاعاتو بصراخ فوجهو : كاااااع لا تزوج السي كاااااع

هز يدو بغضب : راه غننننن...

عطاتو وجهها : هاااا يالاه ضرب . ضرب نشوف .. اااالحكااااااار


جمع الصفعة فيدو على شكل قبضة كيشوف فيها وقال كيسوط وخفض من حدة الصوت

- راه ماباغيش نتكرفص عليك ا اشراق .

شافت فيه كتنهج مصغرة عينيها : شتي نتا حكااااار . . . سمعتي واللي كيضرب المرى راك عارفو اش كيسوى ... زيد زيد كما ماتزوجتيش بيا باش شنووو؟ ها؟

حل فمو باغي يهضر وكيغزز سنانو ويشوف فيها ورجع برد وقال

- باش نتكرفص عليك

ضحكات بسخرية وقالت : سبحااان الله .. وشنو درتي دابا ... هادا ماشي تكرفيص؟

رمش بتتاقل كيشوف فيها : لا ... ماشفتي فالتكرفيص والو

قالت بسخرية : والله يعطيه لعدويا واللي ميبغيني . .. غنخلي ليك هاد الزواج وهادشي كامل ... انا مشايطاش اسعادة القاضي ... وتبارك الله على اللي غيحكم ويعدل

جمعات فمها وناضت من حداه خلاتو جالس متبع ليها العين وساهي وهي غادية كتعوج بكل تقة فالنفس . وصلات حتى للباب وتلفتات عندو لقاتو كيشوف ويطلع ويهبط بنضرات هادية وضحكة فعينيه مخفية وقالت

- وا شوف فيا !! (زدحات الباب) ..
لقات الحاجة واقفة حدا الباب صفرا كتسول مخلوعة
- اش وقع شنو كاين ؟

هبطاتهم اشراق حجر وقالت: غنمشي بحالي .. صافي غنمشي لدارنا

شداتها الحاجة : لواه لواه ابنتي هادشي كيوقع حشونة ترجعي لدر باك ونتي باقا عروسة

اشراق: بناقص من هاد الزواج كن حساب ليا هاكا كاع منقبل بيه الصراحة

شداتها الحاجة كترغب: نعلي الشيطان ابنتي والله ماتمشي لشي بلاصة ... هادي حتى داركم بزز من اللي مايبغي ...

اشراق: لالا الحاجة غير خليني نمشي ... منقدرش نبقا هنا غير خليني

الحاجة : غتمشي تخلعي ماماك وباباك وتمرضيهم ... فكري فيهم هما اللي غيتعصبو ويمرضو ... الله يرضي عليك ابنتي نعلي الشيطان واجي معاك انا ماماك مريم

بقات الحاجة كترغب ماخلاتهاش تمشي وداتها لغرفة سلمى جلساتها وبقات تنصح فيها وتبرد وتبوس حتى بقات على خاطرها وخرجات مشا لبيت ولدها حلات عليه الباب لقاتو كيلبس حوايجو خارج ووقفات عليه

- بدييييتو ب الصدع من دابا ؟؟؟

دار عندها وهوا كيسد عقاد القميجة وقال بصرامة

- الحاجة سدي عليا هاد الموضوع ماباغيش نسمع حسو مرة اخرى سينو مغنبقاش نجي لهاد الدار ... جبتها ليك هاهيا منك ليها وماعندي فين نزيد شي مشكل اخر

تنهدات الحاجة : دير شوية ديال الخاطر ... لعروسة جديدة ..

قاطعها كيشوف فالمرايا : لعروسة مجهداااا الحاجة مجهدااا وكتقلب عليا

الحاجة : الله يرضي عليك اولدي دير الخاطر راه باقا صغيرة يالاه عندها عشرين ولا واحد وعشرين باقي فالمراهقة وخاصها شوية دياا الخاطر .. راه واخا تشوفها هاكاك وافية تبارك الله راه العقل صغير وماعاشت بحال العرايسات ما لقات الراجل اللي يفششها

تنهد ودار عندها كيركب الساعة فاليد

- هانتي ... وها هيا فشيها ولا نفخيها منك ليها .. انا غنوصيك وصية وحدة ... هضري معاها تنقص من داك الغوات شوية ولا غندير معاها شي تصرف ماهواش . . . هاد المرة مهضرتش ... مرة اخرى مغنكتسش ... وحاجة اخرى ... مغنباتش هنا هاد الليلة ... ماتسناونيش للعشا

سكتات الحاجة كتردد " لا حولة ولا قوة الا بالله العلي العضيم " خرجات كتنفض يديها وخلاتو خرج وزاد مع الطريق .
تجمعات العائلة فالليل على العشا كيتجمعو ومعاهم حتى اشراق .. تعشات بزز فصمت وهما كيتجمعو وناضت طلعات لبيتها لقاتو تجمع من ديك الروينة اللي كانت فيه .. بدلات حوايجها لبسات سوميج دو نوي ناعمة ومشطات شعرها .. عجبها دور الزوجة واخا معايشاهش كما كانت كتحلم .. لاكن كتسمى زوجة كما كان الحال . . . خدات راحتها فالبيت من بعد ما سمعات من الحاجة باللي محمد طه مغيباتش فالدار وتقدر تبات فبيتها فلاول مرة . . . واخا بقا عقلها معاه فين غيكون مشا؟ ياكما دار مع ديك الموصيبة يتلاقاها فديك الدار ؟ ... ياكما خرج يدير شي حاجة ومامعبرهاش كاع واش كاينة ... ولا غضب خرج غير يبدل الجو ويبات فديك الدار بوحدو . ان بعض الضن اثم .. خليه حتى يجي ونشوفو الهيئة ديالو هي اللي غتقول فين كان .

عطرات البيت باش ترتاح فيه وتاخد راحتها وجلسات قدام المرايا سرحات شعرها وكتشوف فالجمال اللي عطاها الله وماقدروش معمي البصيرة .. شنو خاصني؟ شنو ناقصني مالي ناقصاني يد ولا رجل ؟ ولا لوني خضر ولا شنو؟ ولا هوا اللي مسحور ولا مالو مكيشوفش ؟

بدا كيدخل ليها الشك بفكرة السحور ياكما مسحور وكملات عليها الحاجة بهضرتها وتذكراتها

الحاجة : ماتعرفي ديك بنت لحرام تكون دايرا ليه شي حاجة وماشي لخاطرو ؟

معقول !!! تكون زعما دارت ليه شي حاجة وبصح ماشي لخاطرو؟ ياك هوا كان باغيني وعجبتو وخطبني وتزوج بيا ... يقدر بصح ماشي لخاطرو ! لبنات خطار ويقدرو يديرو اي حاجة وخصوصا السحور الاغلبية عاش غير بيه .

بعدات الافكار الشيطانية من راسها ودهنات يديها ورجليها ورشات ريحة خفيفة منعشة وناضت مسحات وجهها ودهناتو وتهلات فيه بحال ديما ومشات تنعس.. يالاه تكات فوق فراشو ضرباتها ريحتو وخفق قلبها بقوة وتكات معنقة المخدة ديالو وبدات تبكي عليها بوحدها .. دخلات عليها سلمى بالبيجامة على غفلة كضحك وسدات الباب وجلسات حداها بدلات عليها الجو وبداو يتجمعو ويتلفو حتى عياو . دخلات الحاجة على غفلة وهي تغطي اشراق راسها حيت كانت عارية غير بسوميج برونز خفيفة ومتكية

الحاجة : سلماا .. شوفي واش السوارت ديالو تما فالمجر

سلمى : اينا سوارت؟

حلات المجر وجبداتهم: هادو ؟

قالت الحاجة وهي تيليفون على ودنها

- اييه هاهما فين نسيتيهم ... واش عندك الدوبل؟ ... يالاه بسلامة(قطعات) حساب ليه طاحوليه... حيت فيهم سوارت البيرو والدار والمجورة .. ايوا تصبحو على خير

ضحكات اشراق بسخرية وقال فخاطرها. راهم عند صاحبتو ياخد سوارتو ايوا صافي

سلمى : الزين .. غنمشي نعس .. تصبحس على خير الزين
خرجات سلمى وتكات اشراق كتشوف فدوك السوارت حداها اللي فوق المجر مطولا و طفات الضو ودارت على جنبها نعسات وغرقات فالنعاس
صبح الحال وحلات عينيها بتتاقل حسات بحنكها محطوط على شي حاجة غريبة ونعسة مخربقة والتقل على جنبها وبدات تحرك بديق .. دورات وجهها وحركات يدها المحطوطة على حنكها حسات بيدهت كدوز على جسم غريب وشعر وهي تهز راسها بشوية لقات صدر راجل .. هزات عينيها مصدومة لفوق شافت صاحب العيون العطوفة وهوا ناعس ..اللي شاف دوك العينين الجدابين ورسمة العطف ديالهم يقول مولاهم ميقتلش دبانة .. وهوا قلبو قصح من الحجر ومن النهار الاول كرهها فالزواج .

اويلي!!! فين ناعسة انا ؟ شكندير معاه ففراش واحد انا اش طلعني فوقو !!!

سرحات عينيها فذهول شافت راسها عريانة السوميج طلعات للكرش والمؤخرة عريانة .. يدو تحت منها معنقها محطوطة عليها منها للحم ورجلها بين رجليه وهوا عريان لابس شورط قصير والشورط تحت منو جزء حي فايق ماشي بحال صاحبو اللي نااعس وغارق فالنعاس . تصدمات وهي تبعد بشوية حمرا مزنكة ... جاب الله ناعس مشافهاش .. ويلي فوقاش دخل ماحسيتش بيه!!! امتى جا واش بالليل ولا بالنهار !! بالزربة تسلات ناضت جلسات ولبسات بينوار ومشات كتجري للحمام سدات عليها ولسقات مع الباب ويدها على صدرها كتنهج

تعليقات

🟢 عيد مبارك سعيد عليك و كل عام وانت بخير ❤