2- قصة الحلم الأسود
تتمةناضت اشراق مخلوعة ماعرفات باش تبلات ماعرفاتش راسها واش كتحلم ولا حاللة عينيها .. تخلعات وكتشوف فمها كتبكي وتشوف فيها بنضرات الحزن
اشراق: ماما مالكي شنو وقع ؟ مالكي ؟
سمعات الغوات برا وصوت الكيسان تهرسو مافهمات والو .. ناضت مها كتجري بقفطانها جوهرة سدات الباب بالزربة بالساروت والشال كيطيح على راسها وكترضو .. ناضت اشراق بالبيجامة مخلوعة وشعرها محلول وبنت عمها اللي باتت معاها فالبيت حتى هي قفزات معاها كتسول شنو واقع .. هما كيسولو شنو واقع ومها متكية على الباب ومغمضة عينيها
فشلو ركابين اشراق وبدات تفتف هي وبنت عمها
- شنو واقع ؟ باك لابااااس اشنو كاين
بنت العم: شنو واقع
بدات تهضر لاللة نزيهة بالريفية ودفع الباب .. حطات اشراق يديها على فمها مخلوعة وقالت
- علاااش؟ علاااش؟ شنو درت شنوو
بنت العم : اويلي وعلاش باغيين يقتلوها شنو دارت كااع
عضات نزيهة على شنايفها وقالت: الفضيحة ..الفضيحة ... شداااك اااشراق لشي شطيح شداك .. خوالك وباك وجدك حالفين حتى يقتلوك
رجعات اشراق للور لاسقة مع الحيط اول ما طاح فبالها هي ضحكها مع محمد طه وعلى داكشي جاو ليها
اشراق: بالدموع) والله مابيني وبينو شي حاجة ..
لغوت برا وصوت الرجال كيتهز ويتحط ونايض الصدع بين العيالات شي كيهضر العربية شي كيهضر الريفية اللي قدرات تفهم هوا جداتها كتغوت بزز وتقول بالريفية وصوت باها تبحح بالغوات
- قتلوووني عاد دوزو ليها ... قتلوني فهاد الباب وعاد دخلو
غمضات لاللة نزيهة عينيها وقالت لاسقة مع الباب وهوا كيتدفع عليها
- عااارفة عائلتك كي دايرين .. عارفة خوالك كيطيحو الروح على العرض ...
بنت العم : وشنو دارت هاد البنت اويلي شنو كاااع دارت !
لاللة نزيهة : هي عااارفة ... عارفة خوالها ريافة قباح وعمومها متسلمش عليهم اليد ميحنوش فيها ومشات كتشطح وتصور
غوتات اشراق بصوت عالي وقالت: اشنووووو درت شنووووو شنووووو
تفرع الباب بالجهد ودخل خالها هايج عليها
- كتغوتي .. وكتزييييدي تغوتيييي
قبل ميصول ليها وقفات ليه نزيهة وسخفات الجدة فالارض وبدات ترعظ ليهم دارو بيها غير العيالات اللي جاو من جيهة اشراق كيفكوها .. دخل عنها باها ودفع نزيهة وهز يدو حتى للسما طرش اشراق حتى جات فالارض .. ناضو ولاد العم والخوال حتى واحد ماعجبو الحال كلشي كيغوت بغاو يقتلوها لو لا خوالاتها وعماتها اللي طاحو عليها كيفكوها منهم .
ناضت شادة فحنكها مخلوعة .. القلب طاح فالارض وكتشوف اخرتها فيدين باها اللي ما خلا ما قال
- اش خااااااصك ... اللي بغيتيها نجيبوها ليك ... عمر شي واحد هرس ليها الخاطر .. اشراق ديما هي اللولة ... طيحتي وجهي فالتراب وشوهتيني قدام العائلة
اما هي مافاهمة علاش كيهضرو غير كتمتم وتشوف فيهم ماقدراتش طلع الصوت .. ماحساتش بالضربة بواحد البزيم ديال السمطة من يد عمها حتى جاها فجدارة الودن وطاحت ليهم طيحة وحدة الوسط وطاحت مها عليها كتغوت وخوالاتها وكلشي مخلوع الا الرجال اللي كانو باغيين يكملو عليها واخا طايحة فالارض
سخفات لاللة نزيهة حتى هي وبالكشايف باش خرجو الرجال بدمهم حامي وبداو يشمو ليهم الريحة .. فاقت الحاجة و الجدة وبقات اشراق هاكاك .. ناضو كيتجراو بالزربة دارو ليها الزيف على راسها وهزوها فطموبيل خالتها داوها لكلينيك ومعاهم بعض الرجال من رجال العمات البرانيين اللي كانو كيفكو . دخلوها هاكاك باقيا بدبالجها والشفار مركبين من الليلة دلبارح كيجريو ... حلف الحاج عبد الغني على لاللة نزيهة الى تبعاتهم عمرها تعتب الدار مرة اخرى وخلاها جالسة كتاكل جنانبها .. مشات الجدة معاهم على سعدها ووعدها لسبيطار وجلسو كيتسناو مخلوعين ياكما ماتت .. كلشي واقف على اعصابو ولعيالات كاملين بالحناني باينين جايين من العرس .. تسناوها حتى فاقت ودخلو عندها لقاو حنكها منفوخ وعاد بداو يعاودو ليها وهي مصدومة ... دخلات عليها خليج بجلابة بيضاء كتجري مخلوعة وطاحت عليها شدات ليها فيديها
خليج: واش لاباس .. المسخوطة غادي يقتلوك شكون حط الفيديو شوفي فين كنا وغيت وصلنا
بدات اشراق كتبكي : والله انا ماحطيت شي حاجة واش بوحدي اللي شطحت راه كلنا شطحنا وحتى نتي شطحتي صوروني غير انا ... عطيوني نشوف داك الفيديو المنحوس ... عطيوني تيليفوني
عمتها: واش حنا دابا فتيليفون ديالك راه كانو غيقتلوووك وغاادي يقتلوك بلا مترجعي للدار حالفين فين حتى يدبحوك ... جدك قال لباك الى رديتيها ما نتا ولدي مانا باك
زادت حسرة اشراق وبدات تندب وخليج كتشد ليها فيديها
- زيدي غتمشي معايا فين ما مشيت غتمشي ... (بدات تغوت هي وبنات عائلتها ) ماااالها غير هي اللي شطحات
بنت الخالة : كلناااا شطحنا اش هاد القاعدة ديال الزفت ميفرح حد
اشراق: بنااااقص كن حسابني هاكا كن درت الخمار وجلست فخطرة مانطلش ناري هادشي حلمتو .. حلمتو غير هاد السمانة ياربي
خليج : نوضي صافي .. يالاه تمشي معايا مغتبقايش هنا يمشي يجي عندك شي واحد فيهم حتى لهنا .. لحمد لله جات هاكا كن دابا قتلك .. الله يعطيهم القطاع لدوك ليدين
نوضاتها من البياص دارو عليها عباية ولواو عليها الشال على راسها وناضت خرجات معاهم كتبكي .. يالاه وصلو للباب لقاو باها واقف حدا لكلينيك هوا خوتو كيتسناوهم يخرجو .. شافتهم اشراق بردو ليها الماء فالركابي وشدات فخليج .. خزر باها فيها وقال
- طلقي منها
لسقات فيها خليج وقالت: راه كولشي شطح صوروها غير هي
السي عبد الغني: طلقي منهااااا
تزعزعات خليج من خوفها حيت عارفة باها قبيح وعائلتها ومركبين فيهم الخوف طلقات منها خليج وكترجاهم بعينيها لاكن حتى واحد ما حن .. جرو عمومها عائلتها للطموبيلات ودفعها باها وقال
- سيري علينا دابا ماتعاوديش تورينا وجهك
بقا فيها الحال والكل كيشوف كفاش دفعوها .. بدات كتبكي ومشات جهة الشانطي كتجري تعرضات للطوبيس ووقفات .. غوتات خليج بأعلى صوت " اشراااااااااااا
كلشي تخلع لاكن الطوبيس قلب الاتجاه بسرعة ووقف .. خرج عبد الغني عينيه مفزوع وشار براسو بسرعة جهة خالها
- سير جيبها سيير
تلفتات اشراق شافت الطوبيس عكس الاتجاه وخالها جاي جهتها وهي تهرب قاطعة الشانطي كتجري .. تبعوها خوالها كيتجاراو موراها وولاد عمها ... كتجري وقلبها غيسكت الى مشا حتى شدها شي واحد غادي يديها لباها ميتة ... هي تجري وهما يجريو والجرية عندها على قد الحال لاكن دغيا تعرضات لواحد الطموبيل بسرعة كدق مخلوعة وحلات الباب طلعات وبدات تغوت
- سير سبر سير ... سير دغيا
قلعات الطموبيل بسرعة وبدات تشوف موراها فوجهم شاعلين ورجعو كيجريو للطموبيل لاكن فيين غيوصلوها .. ردات الروح كتشهق وتبكي ومول
الطموبيل كيسول مخلوع : مالك اختي شنو واقع ليك علاش هاربة
اشراق : بتورثر كترعد * الله يرحم ليك الواليدين الشريف غير بعدني من هنا ... بعدني الله يخليك
كان راجل كبير فالسن ماعرفها منين بعتات عليه .. كان واقف فالسطوب حتى دخلات عليه فجأة وبدات ابكي... هوا كيسول وهي كتشهق
اشراق: عطيني تيليفون ... عطيني عفاك نعيط
عطاها تيليفون ربطات الخط بخليج وقالت كتفتف
الو خليج
ردت خليج فدهشة : الو .. الو اش.. الو نعام احنان
اشراق: انا هربت ... ماعرفتش فين غنمشي ... فين غنمشي (بالدموع)
خليج: بصوت خافت) ماترجعيش هربي راه تبعو ديك الطموبيل .. سيري عند طه مكيعرفو حتى واحد ودوزيه ليا نهضر معاه
اشراق: شنو ؟؟؟!! اويلي نمشي عندو نظير ليه المشاكل
خليج: غير سيري ودوزيه ليا ... واصلا عندمن غتمشي حتى واحد ما فيه الربح هانتي شفتي وسط الدار وصوروك ... ماتيقي فحد وعنداك تمشي عند شي كلبة من البنات راه يجيبو ليك بابا حتى للدار
غمضات اشراق عينيها وهبطات راسها كتبكي وقالت: صافي...
قطعات ومدات تيليفون للسيد اللي كيسول مالها .. بدات تعاود ليه وتشهق وهوا كيتأسف
- لا حولى ولا وقوة الا بالله ... يالاه نديك عند المدام الى بغيتي حتى تعرفي شنو ديري؟
شافت فيه وقالت بحزن : الخير اللي دير فيا وسمح ليا غادي نعيق عليك ..
بغيت غير شي لتام الله يرحم ليك الواليدين وحطني فسونطر فيل الله يجازيك بلخير
تنهد الراجل وقال : هاكي هاد البركة والله يسهل عليك ابنتي
مد ليها 200 شداتها ومارضاتش تحط فوقف بحال هادا.. قربها من واحد القسارية ونزلات كتجر بانطوفتها والعباية فوق البيجامة والفولار .. مشات مباشرة عند مرى كتبيع حوايج محجبات وبدات تهضر معاها .. دخلات تقيس فواحد الركينة وخرجات بحللة اخرى .. الخمار نازل عليها اسود كيبانو غير عنيها فقط والخط رقيق فوق نيفها وليكات فيديها كوحل خبات الذهب حسن مايكشطها شي واحد .. هاكا احسن مايعرفها حتى واحد ومايعقلها حتى شي حد من الناس اللي شافوها فالفيديو ... لقات راحتها فيه وتهنات مللي خبات وجهها ومشات شدات طاكسي مباشرة لمحل "الناجي" ترددات فالاول وحشمات تدخل لاكن زعمات فالاخير ودخلات عندهم .. حتى واحد ماعرفها كيشوف غير عيونها فقط .. قالت بتردد
- مسيو محط طه كاين؟
ردت المساعدة اللي سبق وهضرات معاها
- لا كاين غير الحاج
اشراق: امم .. بغيت مسيو طه الى كان ممكن
نفس تكرر مرة اخرى .. هبط عندها الغيسبونسابل كيسولها واصرت تشوف (محمد طه ) وهاد المرة الامر مستعجل .. كان الحاج ملهي مع الزبناء فالمكتب والمحل عامر .. جلسات كتسناه كالعادة بلا متعطي اسمها حتى دخل مع الباب بسورفيت تيشورط رمادية وسروال رياضي وكويرة ن لفوق محلولة كحلة باينة جاي من لاصال مباشرة شعرو باقي فازك . غير دخل وقفات عليه فاجآتو وقالت بتردد كتشوف فيه
- مسيو طه
استغرب كيشوف فعينيها مكمش حواجبو كأنو كيعرف هاد الصوت .. بقات ساكتة وغرغرو عينيها وقالت
- انا اشراق
تصدم وبقا كيطلع ويهبط فيها شحال مفاهم والو وشافها كتمسح دموع من عينيها بيدها فيهم قفازات كحلة .. بقا ساكت شحال غير كيشوف وقال بصوت منخفض
- اجي معايا
مشات معاه طلعو للطابق العلوي .. كان كبير راقي وفيه غرفة معزولة فيها مكتب كبير فالفوطويات فالجناب كيستد عليه الباب.. حل ليها الباب بالساروت دخلات ودخل موراها وسد البيبان ديال الزاج ودوز الريدو من لداخل .. جلسات فوق الكنبة وحيدات القفازات بانو يديها الجميلتين وطلعات السدل على وجهها لفوق وشافت فيه بعينيها حومر
قرب الكرسي قدامها وجلس كيشوف فيها ويتسنا تفسير
خرجات تنهيدة مرعودة وقالت : سمح ليا هجمت عليك بحال هاكا
حرك راسو بالنفي : لااالا مكاين حتى مشكل غير هضري شنو واقع ياك لاباس(ميل وجهه للجنب جاف الطرشة وقال فأسى ) مالكي فحنكك شكون ضربك
جمعات النفس كتهضر بزز وقالت : بابا (بالدموع ) ضربني بالطرشة...
تأسف فصدمة وقال : علااش ؟ ضربة خايبة عطاك نفخات ليك الحنك كاع
قالت كتشهق: وكن غيير درت علاش ... لدابا ماعرفتش علاش كيهضرو على فيديو ما فيديو كنشطح فيه ... ماعرفت حتى هاد الفيديو اللي شافو كي داير
هز راسو من بعد مكان متكي على رمابيه كيسمع ليها وسرح رجلو جبد تيليفون وقال
- اااه... بقا ساكت كيقلب فتيليفون وهي كتعاود على شنو وقع ليها من الاول حتى للآخر حتى فاجأها وعطاها تفرج وقال
- هاهوا الفيديو
شدات تيليفون كتفرج مصدومة ويدها على فمها حتى سالا الفيديو وقالت
- وصلك حتى نتا !!!
حرك راسو بهدوء وقال : فالبلاصة
عضات على شنايفها وقالت : والله انا ما لحت هاد الفيديو ..اصلا ماصورتش ومنقدرش نحط بحال هاكا مارعرفتش شكون صورني
هبط راسو كيشوف فالتيليفون ويجبد الصفحات ويوريها
- المشكل هوا الفيديو ديالك منشور فين مادرت كنلقاه .
مارضاتش وقالت : ماشي غير انا اللي كنت كنشطح وكانو اصلا غير العيالات مكاينيش الرجال وكلشي شطح
هز حاجبو فيها وقال : ولاكن راك شطحتيييييي
دورات وجهها للجنب كتزفر ساكتة وقالت
- خاصني غيييير نعرف شكون اللي صورني
بقا ساكت كيشوف فيها وقال : دابا اللي عطا الله عطاه ... الفيديو دار بوم طلبي تبان شي حاجة تخرجك من البوز باش ناس ينساو هاد الفيديو ... مرحلة وغدوز عادي
شافت فيه بأسى: مرحلة وغدوز ولاكن انا عائلتي مغدوزهاش راه يدبحوني ... بابا اصلو جبلي وماما ريفية راه عائلتي مخلطة وصعيبة ميدوزوش بحال هادشي... حنا ماعندناش عادي راه ممنوع يقتلوني ...
بقا ساكت مالقا ميقول وحسات براسها بحال الى تقلات عليه ودخلاتو بمشكل .. سكتات شوية وبدات كتلبس لقفازات وهبطات السدل على وجهها وقالت
- سمحي ليا مسيو محمد طه ... دخلتك فمشاكلي انا اصلا ماكنتش غنجي خليج اللي قالت ليا سيري تسنايني تما . شكرا وسمح ليا مرة اخرى
ناضت حطات الكاس ديال الماء
حطات الكاس ديال الماء فوق الطبلة وبغات تخرج لاكن منعها وقال
- فين غتمشي ؟ لا جلسي حتى نشوفو شي حل ..
قاطعاتو بتعب فالكلام وقالت : غنمشي غنمشي ... عفاك الى كان ممكن (حيدات القفازة وبدات تجر فالبراسليات اللي شرات من عندهم وقالت) بغيت نرد هادو محتاجة دابا فلفلوس ديالهم .. والله تحزيت ومحتاجة ليهم
شد ليها يديها ماخلاهاش تحيدهم وقال
مغترجعي ما والو ومغتمشي حتى لشي بلاصة حتى نلقاو حل ... غتجلسي دابا وترتاحي وميكون غير لخير نشاء الله ..(جرها جلسها )يالاه جلسي خلينا نشوفو شنو كاين
جلسات في حيرة ورجعات طلعات السدل وحيدات القفازات .. دارت رجل على رجل هبطات راسها كتبكي وهوا ساكت غير كيخمم ويشوف فيها ... مد ليها الماء تشرب وقال
- لبكا ماعندو باش ينفعك دابا وهادشي كيوقع عادي... راهم مزوجين وكيشطحو ويصورو راسهم هادشي رجع عادي
اشراق : حنا عندنا عيب وموصيبة ماشي عادي
حرك راسو : فهمتك راني فااهمك ..
قاطع الحوار الدقان فالباب ودورات وجهها هبطات السدل عليها .. ناض فتح الباب ودخلات بنت شقرا انيقة كضحك لابسة لباس كلاسيكي وشعر مطلوق .. جميلة فوجهها حتى هي وحاطة مكياج خفيف
- فينك تعطلتي خليتيني جالسة فطموبيل كنتس....
تفاجأة مللي شافت اشراق جالسة مخبيبة كيبانو فيها غير العينين .. كانت يدها على كتفو كضحك معاه وهبطاتها وقالت بابتسامة
- سحاب ليا بوحدك .. سلام مدام
تنهدات اشراق وردت السلام بصوت خافت مبحبح
- عليكم السلام
تلفتات البنت وشدات فدراعو وقالت بابتسامة
- تعطلتي عليا وكنصوني مكتجاوبش ..
ناضت اشراق فديك اللحضة بدات كتلبس القفازات قدام عينين البنت اللي شافت يديها . وكما يقول المثل .. جمال "الحمام يبدأ من الجنحة والاقدام "
اشراق: شكرا مسيو طه .. خليتك على خير
كانت غتفوت الباب وجرها من دراعها لور وقال
- جلسي بلاتي (حل فيها عينيه باش تفهم راسها ) لاكن مابغاتش وقالت
غنتعطل .. لعشية هادي .. نشوفك على خير
رد الباب ومابغاش يطلق من دراعها بقات البنت الاخرى غير كتشوف باستغراب ..
تدخل وقال : ليلى تسنايني هنا هانا راجع
ليلى : فين غادي؟
محمد طه : هانا جاي دابا .. (شاف فأشراق) يالاه
هبطات قدامو وهبط موراها وبقات ليلى واقفة معبسة منبعة ليهم العين
نزلو لتحت غادي حداها وكيبركم بشوية
- مكتسمعيش راسك قاصح
مارداتش عليه وخرجات حتى لبرا وقالت
- بسلامة عل...
جرها من دراعها وقال : اجي هنا فين بسلامة (فتح ليها الباب ديال الطموبيل ) طلعي
اشراق: فين غنطلع؟
محمد طه : غنخطفك .. طلعي يالاه
طلعات لور ركبات وسد عليها الباب ورجع لامحل
بقات جالسة كتسنا شوية تم جاي هوا وليلى جهة الطموبيل .. طلعات ليلى لقدام وتلفتات شافت فأشراق بغيرة ورجعات شافت قدامها .. طلع محمد طه لقدام وتحركات السيارة .. غادي فالطريق وكيهز عينيه فالمرايا ويشوف فيها وهي عينيها تحت اللثام كتشوف فليلى كضحك وتمد يدها عليه وكيتعاودو على شي واحد ومرة مرة كيضحك معاها ويمد ليها يدو كترشق عليه .. حسات اشراق براسها زايدة عليهم بالتقل ومتسلطة عليهم .. كرهات نضرات الشفقة ليها وبقات كتشوف فالزاج ساهية والضلام كيطيح ودموعها كطيح من تحت اللثام مكيشوفهم حتى واحد . وقفات الطموبيل فباركينغ ديال السيارة وتلفتات اشراق عندهم ..حلات ليلى الباب كضحك وقبل متنزل باستو فحنكو ودوزات يدها على خدو وقالت
- يالاه بب حتى لعشية ...
بعد وجهه شوية وقال كيشوف فيها : هنا خليتي طموبيلتك ؟
ليلى : اه هنا ... غنمشي للدار حتى تجي .(تلفتات شافت فأشراق ) بسلامة حبيبة ... الله يدير ليك شي تاويل ديال الخير
ردت اشراق بزز والدهشة: بسلامة اختي شكرا
نزلات ليلى وبقات اشراق كتغلي فبلاصتها مارضاتش .. صافي مشاا السيد عاود ليها ولا شك غتكون سولاتو وطبعا غيعطيها مبرر راه باينة شكون تكون . ماحملاتش راسها فديك اللحضة وبقات غير ساكتة .. اش دير .. عائلتها اللي طيحاتها فهاد الموقف وخلات الناس يشمتو فيها . حدها نزلات ليلى طلبات التيليفون بجدية من طه وقالت
- عفاك عطيني تيليفون نعيط لخليج
مد ليها تيليفون دوزات الخط ومع الهضرة خرجات ليها البكية وتفركعات
- الو خليج
خليج : فينك .. خلعتيني عليك فينك
اشراق: مع السي محمد كما قلتي ليا فينك اجي عندي دابا
خليج : بابا راه طاح تفقص راه هزينا للكلينيك
تخلعات اشراق وقالت: اويلي ياكما وقعات ليه شي حاجة .. شنو وقع لبابا هضري بغيت نشوفو
خليج : راه طاح بالفقصة ماما طاحت ليهم فالدار وهوا هزيناه لسبيطار .. انا معاه غير يفيق نجي عندك
اشراق: نجي انا ..
قاطعاتها : لا كلشي كيحملك المسؤولية ماتجيش دابا حتى ينوض بابا بقاي مع طه دوزيه ليا
بلا متشعر قالت: لا منبقاش هنا اجي ديني بغيت نشوف بابا اجي ديني
خليج : واخا واخا غير يرجع لاباس هوا غيهضر راه طاح لينا فالزنقة والعائلة باقا مابغات تمشي وحالفين عليك ...
حطات اشراق تيليفون لطه وهبطات وجهها شاداه بيديها وطه كيهضر
طه: ميكون باس عند باباك ... مكاين حتى مشكل مرحبا .. صافي غير كوني هانيا
اشراق: بتدمر وبكاء) كنت فدارنا معززة مكرمة شوف شنو وقع ليا حسبي الله ونعم الوكيل حسبي الله ونعم الوكيل
قطع وتنهد كيشوف فيها وقال : صافي هادشي كيوقع عادي غتبقاي معايا حتى يصح باباك نشاء الله ونشوفو شنو غيوقع
بقات ساكتة كدمع للور وهوا غادي سايق حتى دخلها لواحد الفيلا كبيرة وسكت طموبيل وهز عينو فالمرايا بابتسامة مجاملة
- مرحبا بيك
دورات عينيها وقالت : فين حنا؟
هبط راسو كيهز التيليفون والسوارت وقال
- فالدار
خرجات عينيها وقالت : فالدار!!!
نزل وفتح عليها الباب وقال : كاينة الواليدة لداخل ولافامي غير نزلي
بقات ساكتة كتشوف فيه بعينيها وقالت بتردد
- عفاك .. ماتقولش ليهم شنو وقع .. صافي براكة غير نتا وديك البنت ديال قبيلا عارفين
ضحك بسخرية وقال: مغيعرف حتى واحد غير يالاه نزلي
نزلات كتقاد حوايجها وزيدها قدامو دخلات لفيلا عصرية جميلة دافية من لداخل لقات مرى دايرة فواطة على نصها لقات السلام
محمد طه : فين الحاجة ؟(حيد لافيست )
الخادمة : راها كتنعس اسحاق
محد طه : مكاين حتى واحد فالدار ؟
الخادمة : باقي مجا حد هاد الساعة (ابتاسمات ) مرحبا بيك اختي جلسي تفضلي
اشراق: شكرا
جلسات اشراق فوق الفطوي بخجل .. ابتاسم بمجاملة وقال : خودي راحتك .. الدار دارك
ردت بمحاملة : شكرا
مشا طلع مع السلالم خلاها مع الخدامة ضايفاتها وحطات ليها شاي وحلوى وخلاتها جالسة حتى وقفات عليها مرى كبيرة تكون قد مها تقريبا شعرها قصير شايب مزعرها ومن هضرتها كتبان فاسية
بابتسامة - السلام عليكم
تلفتات اشراق بسرعة وناضت وقفات شافت فيها .. كانت مرى لابسة بجامة نص كم بسروالها قصيورة شوية لاكن كيوت كتبان وبيضا البشرة سلمات عليها اشراق بالوجه وبدا الصواب . كيف نتينا كيف هي يماك الى اخره
من بعد الصواب جلسات الحاجة معاه فالصالون كترحب وتجمع معاها حتى نزل عندهم محمد طه لابس بانطوفة كحلة وهاز بيبي صغيور كيبوس فيها وجلس معاهم على الكنبة .. شافتو الحاجة وضربات فخدها وقالت
- ويلي فيقو ! غادي يحمي علينا السوق بزز باش نعس
وقفو محمد طه على فخدو كيلعب معاه وقال
- ابااركة عليه يالاه ينعس بالليل
الحاجة : هييه نعسو نتا انا قلب مجاجي
بغا الطفل يبكي وناضت الحاجة بالزربة
- هانا الحبيب هانا اراو بيبغو اراو حليب ولدي
مشات بالزربة للكوزينة خلاتهم بجوج .. شاف فيها محمد طه وقال
- صافي غير حيدي داكشي على وجهك مامعانا حتى واحد
علاتو اشراق على وجهها وحيدات القفازات وقالت
- راه تخلع مني يمكن
دورو محمد طه عندو وقال : باقي كاع مشافك راه دايخ بالنعاس
اشراق: شنو قلتي لماماك ؟
قال وهوا كيلعب مع الطفل: والو .. هاد الاسئلة راه عادية ... قلت ليها جا معايا ضيف وصافي
اشراق: عنداك تكون شافت الفيديو
ضحك بسخرية وقال: واخا تشوفو معتوقعش تشوفك مباشرة ...
جات الحاجة هازة الرضاعة شافتها فوجهها وضحكات معاها عادي وقالت
- ارا الولد اجاااا مسكتو دابا ... راه عاد دار الجلبة اللي قاصو كيغوت
دخل فديك الاثناء الحاج ولقا السلام من الباب .. بسرعة هبطات اشراق اللثام عليها ..
الحاج : بصوت عالي) عمارت الدار ... ا فينك الاللة
ردت الحاجة : وازييد دخل زيد مرحبا ..
مشات الحاجة تعرضات ليه خدات من عندو لافيست وقرب للكنبة شاف اشراق ولقا السلام وتحية براسو وجلس شاف الولد كيبكي وقال
- امالو شكون قاصو .. مالو كيبكي عطيوه شنو خصو
باسو محمد طه بقوة فحنكو حتى غوت ونزلات عليه الحاجة للكتف
- يعطيك الدقة شفطتيييه شفطتيه
محمد : ههههه
الحاجة : ارا لي الدري يعطيك شي خير
خدات الولد من عندو خلاتو كيضحك .. تلفت الحاج بعفوية خز كاس د اتاي وشاف اشراق شادة فيدها كاس والبراسليات فيديها وقال
- هادو واش ديالنا واقيلا ؟
تلفتات عندو اشراق شافت فيدها وقالت
- اه من عندكم
الحاج : بالصحة والراحة .
اشراق : الله يعطيك الصحة
الحاجة : شنو قالك الطبيب مشيتي عندو
تنهد الحاج : الكوليسطيرول وصافي وبقا عليا زول هادي وهادي بزاف عليا هي غنبقا نشرب غير الدواء
الحاجة : قالك زول داكشي خاصك تزولو بغيتي حتى توقع فيك شي حاجة وتسكت ليا قلبي
اشراق كتسمع وشاداها الضحكة من تحت اللثام .. مغازالة من نوع خاص .. اما محمد طه خاشي وجهه فتيليفون
الحاج: الله يهديك ..راه غنديك معايا غير رتاحي لي مع راسك
الحاجة : زربان على عمرك اسيدي انا باقا باغا نعيش .. بلحق ماشي وحدانية
الحاج : الى مت تزوجي .. انا عااطيك لوردر باش تزوجي يالاه
هزات الحاجة كتفها وقالت : يموت عدوك واللي مايبغيك ... الله ينجيك لينا ويخليك تاج فوق راسنا ... ولهلا يحيي الزمان حتى نتزوج انا بشي واحد ... صافي القلب عمرتيه ليا
كحب الحاج كيضحك وقال: ايوا فاين هي ديك الهضرة اللي قلتي لي الصباح خليتيني مشيت زعفان وطاير لي منك
قالت بنرفزة: ايوا صافي حتا نتا كتشد ليا فاالتخربيق ... هضرة وحدة اللي كاينة راك عارفها ومكاينش من غيرها ... عصبتيني مابغيتيش تمشي للطبيب
الحاج : وتقولي لي ماشي نتزوج عليك ايوا بااااز ماحشمتيش مني زعما
هز محمد طه بعفوية راسو شاف فمو ورجع شاف فباه وداتو عينو لعينين اشراق لقاها كضحك بصمت .. ابتاسم بعفوية ورجع للتيليفون
الحاجة : واش انا حتى درت معك ربعة من هادا (شدات فكتف محمد ) وجوج ديال العزبات تبارك الله الله يحفضهم وعاد باقي نتزوج المسخ هادا
تنهد الحاج وقال : ماتعاوديش تقولي ليا ديك الهضرة .. راك طعنتيني الصباح
الحاجة : وصافي صافي ... صافي دابا بدل الساعة
دخلات مرى بجلابة قصيرة وصباط وشعر كحل كاري هازة الصاك وبدات تسلم عليهم فعجلة
- بابا لاباس عليك .. ماما..
سلمات على اشراق ومحمد طه من اوجه وهزات البيبي وقالت
- كان كيبكي ؟
الحاجة: شوية .. غطيه من البرد .. مكتعجبيش هاد الخرجة اللي كديري ليه فهاد الليل .. كل مرة كيطرشو البرد الحبيب ديالي
البنت : غنغطيه .. يالاه هانا مشيت .
الخاجة : اجي تغداو غدا الجمعة .. جايين خوتك حتا هما
البنت: نشاء الله يالاه بسلامة عليكم
تعليقات
إرسال تعليق