القائمة الرئيسية

الصفحات

قصة الحلم الأسود .الحلم الأسود . قصة الحلم الأسود  بالدارجة , قصة الحلم الأسود بالدارجة المغربية , قصة الحلم الأسود بالمغربية

مرحبا بكم من جديد قصة جد رائعة نتمنا تعجبكووم لنبدأ 

قصة الحلم الأسود  

قصة الحلم الأسود بالدارجة

قصة الحلم الأسود 

جالسة فغابة مضلمة مضوي عليها ضوء القمر فقط .. لابسة قفطان طويل وشعر مطلوق وكتستف الحلوى فالطاوة ... حلوى خضرا ناوية طيبها ! وكفاش غدير طيبها وهي وسط الغابة بوحدها ؟ سمعات صوت الارض كتهتز وتلفتات موراها .. فجأ شافت مجموعة من الكلاب المفترسة دايرة بها وريوكها سايحة ... تنفض قلبها وناضت بالخلعة هزات الطاوة لقاتها كتحرق سخونة ... تشوطات فيديها وصبرات مع الخلعة هزاتها سخونة وهربات بيها وسط الغابة ولكلاب تابعينها كيجريو ... بدات تجري تجري تجري وتقول ما جريتش .. وعقلها يقول واش الكلاب شمو ريحة الحلوى وجاو!! الكلاب كيشمو ريحة اللحم ماشي ريحة الحلوى ! ...
وهي كتجري ودور كتلقاهم موراها .. شافت راسها مقادراش تبعد .. لحضة ! لقات راسها كتجري فبلاصتها وتحاول بكل قوة تبعد لاكن مقادراش ... شوية بدات تحرك لاكن ببطىء واخا كتجري وتخرج فروحها ! بغات دور تشوف واش وصلو عليها الكلاب وهي تحس بالطاوة تهزات من يديها ! شافت قدامها لقات ختها لكبيرة كتقول معصبة

- فينك تعطلتي ؟؟؟

ردت وهي غتموت لالخلعة ومزال كتجري فبلاصتها

- الكلاب تابعيني ... لكلاب ... لكلاب شديني شديني

شداتها ختها الواقفة حداها وجراتها لاكن غوتات بحر جهدها بسبب العضة اللي عضها الكلب .. يالاه بغات طيح طاحت وسط فطوي ديال سيارة وسط داك الضلام القاتم والجو المخيف ... هزات راسها ويدها على رجلها المعضوضة لقاتها ختها حداها جالسة هرباتها فسيارة

- فين حنا فين غاديين ؟ فين لحلوى ؟

الاخت بخوف: طاحت ليا طاحت صافي خليها

هزات عينها تشوف شكون سايق السيارة بان ليها غير خيال ...

-اشراااق..شاراا

ااق!!... اشرااااق فيقي اشراااق فيقي راك كتحلمي...
حلات عينيها والهضرة فمها كدخل وتخرج . عرقانة ومخلوعة وقلبها غيسكتها ...حطات يدهاعلى قلبها وناضت جلسات فوق الناموسية كترعد.. اخيرا كان حلم .... حلم فاقت منو خايب . لقات راسها فبيتها الزوين هي وختها والدفئ والحنان مكاين مناش تختاف.. رجعات النفس وختها كتسول شنو حلمات لاكن مادراتش تهضر وتكات على ضهرها كترجع الروح وكاس دالماء فيدها

اشراق : يا ربي على حلمة .. يا ربي اش هاد الحلمة مافيها مايتشاف .

الله واكبر . الله اكبر.......

الاخت: غير كنتي كتحلمي وصافي.. نوضي نوضي توضاي وصلي ها الفجر كيأدن ورجعي تنعسي

تنفسات اشراق الصعداء وناضت بتعب خرجات من البيت خلات ختها الحائض رجعات فالنعاس .. مشات تحنات توضا قدام المرايا ويالاه بغات تشهد ضربات جبهته مع جنب واحد الزاجة دالمرايا فين محطوطين الشيتات سنان وكلاتها ديال بصح وكمداتها .. شافت فالمرايا لقات الدم كيسيل من الجرحة وغمضات عينيها كتكمدها وتندب حضها حتى بردات وخرجات لبسات جلابتها ديال صلاة غطات جسها الانثوي كامل وخبات رجليها البيضاء الجدابة بالتقار بيضاء وغطات بالحجاب اخضر شعرها الناعم الاشقر الطويل من بعد مالواتو سفنجة و توجهات للقبلة مباشرة كبرات.

فتاة من اجمل خلق الله قلبا وقالبا .. نور ساطع على وجهها المستدير .. بشرةصافية وشفايف وردية واسنان بيضاء وعيون لوزية بنية ..بريئة الملامح وخجولة .. دائم لون الخجل على وجنتيها .

سلمات و دارت الدعاء وناضت رجعات لغرفتها هي وختها وتخشات حداها من بعد ما دارت فاصمة لجبهتها وطفات الضوء و غطست في في نوم عميق ..

الزين اللي عطاك الله ... عمري ما ننساه ... دايما في بالي نهار وليااالي ....
مع النوسقى مطلوقة فالدار والدالدقان فالباب على ببت البنات. اصباااااح لخييييير ... نوضو يالاه واش باقي شي نعاس ؟ نوضو يالاه راه مشا الحال فوقاش غتشوفو شي حوايج وشي حلوة وشي نكافة واش حساب ليكم باقي عليكم الحال ... نوضو خرجو من هاد البيت نخملوه يالاه

ناضت اشراق بزز هي خليج ... اختها خليج طبعا وخرجو من البيت خلاوه للأم و عمتهم كيجمعوه ومشاو جلسو على مائدة الفطور مع الجدة ديالهم وخالتهم ... دارهم الدار الكبيرة عامرة حيت فرح خليج قايم والعائلة جات قبل تعاون فالشقا ديال الدار ... اشراق وخليج البنات والوحيدات عند السي الحاج عبد الغني والحاجة لاللة نزيهة ... السي عبد لغني معروف فالمدينة بمحل لبيع الاثات والافرشة وكيختار هوا و مرتو لاللة نزيهة غير المخيرة لدارهم عندهم الدوق فالبيع وحتى فالشرا ودارهم شهوة منها بالفراش والديكور وبناتهم اميرات فدار باهم عمر شي حاجة نقصاتهم ولا طلبوها ومالقاوهاش . ليوم تحضيرات لعرس خليج بشاب من جنسية قطرية .. كلشي فرحان وكيوجد لهاد النهار لكبير ديال خليج ويختارو ليها فير لحاجة لمخيرة و اللي طلباتها تلقاها .

جلسو كيفطرو والمساعدة ديالهم فالدار كتوجد ليهم وتحط وهما سادين ودنيهم من نكير جداتهم اللي جالسة وتنكر... مرى كبيرة بيضاء ناصعة البياض فيها وشمة عبارة عن خط هابط تحت شفاها وعلامة بين حواجبها ويديها بعلامة باهتة خضرا .. مشا الزين وبقاو حروفو .. كتشبه ليها اشراق بزااف والكل كيشهد بالشهبه عكز خليج صاحبة الشعر الاسود ولحروف السوداء فاتنة وجمال عربي بحال لاللة نزيهة .. فطرو بسرعة ونزلو كيجريو فالاسانسور لقاو ولد عمتهم عماد فالسيارة كيتسنا طالع ليه الدم وينكر... يالاه ركبو طلق الكاسيطة

- واش انا شيفور ديالكم ماعندي مايدار تفيقو ليا على خاطركم ونبقا انا كنتسنا تا تجيو!

ردت اشراق بتمرد : صافي صافي يا ربي السلامة ماديرش لخير بالسكات لعفو

خليج بدون تركيز كتحل الصاك وتسدو : وصافي صافي دابا يالاه مشا الحال

عناد : مشا الحال هي كن هبطتو بكري

ديمارا السيارة بنرفزة وكملات ليه خليج بقولها

- دوزني للويستر هي اللولة باقي مخرجتش الفلوس ولبارح وصلو ونسييت حتى لأخر لحضة عاد تفكتهم

زفر عماد ودار مع الرمبوان بسرعة بلا ميعلم وقال

- ولبااااارح تمشيو تيريو المرض

ردت اشراق بنرفزة كتقلب لور بوحدها وتقاد الشال اللي لاوية على راسها معصبة

- بشوية الزمر بناااقص من هاد السخرة المزمرة باغي تقتلنا ولا مالك

خليج : صااافي وقف ها الويستر قولها غير زوينة

شد الفران بنرفزة ونزلات خليج بوحدها شدات الفلوس ورجعات لقاتهم فلحرب بحال ديما ... هوا زربان مرتو كتسنا فيه يجيبها واشراق كتنكر عليه يسكت من النكير ... كملو الطريق بالدباز حتى لقدام متجر كبير مشهور لبيع المجوهرات "الناجي " ونزلو كيقادو جلالبهم ويتشاورو

اشراق: هادا اللي قلتي ؟

خليج : اه هوا اللي مشهووور مكاينش اللي مكيعرفوش

اشراق : وا يالاه ندخلو نشوفو شنو عندهم .. هازة معاك الفلوس بعدا

خليج : وعلاش غنجي الى ماهزيتش ... راه سيفطت ليهم المودل فواتساب قالو ليا غنصايبو ليك خوه ... يالاه

قبل ميدخلو رن الهاتف لاشراق ووقفات برا كتهضر بينما دخلات خليج طالقة شعرها الاسود بجلابة مودرن وصندالة وبقات اشراق برا حتى هي بجلابة وبليغة دايرة فولار مرخوف على راسها كتهضر والسر عليها

- الو ... اممم عاد تفكرتيني ... كن بغيتي تعرف فين انا كن عيطتي الصباح فاش فقتي... ايوا اسيدي انا مع خليج جينا ناخدو شي حاجة ديالها وصات عليها ... صافي اجي يالاه هه... يالاه اجي حتى انا بغيت نشوفك .

قطعات بسعادة ودارت تيليفون فالصاك ودخلات بابتسامة خفيفة لوسط المحل ... محل كبير داير بكوندوار ديال الزاج ومكتب كبير فالقنت .. راقي و الشخصيات اللي خدامين فيه كاملين بلباس موحد وكيقدمو المجوهرات بقفازات بيضاء ناصعة ورائحة العود الزكية مطلوقة فالمحل ... كان راجل كبير ابيض الشعر باين عليه الوقار وكيبان انه صاحب المحل من الهيئة المتولة ديالو وجلوسو على المكتب كيهضر مع الزبناء .

استقبلاتهم سيدة وضايفاتهم باش تعرف شنو المبتغى ديالهم ... بدات خليج كتهضر معاها على مسمع اشراق اللي كتسرح عينيها فالمحل الراقي

البائعة: واخا مدام تفضلي رتاحي غنشوف مع السي الحاج

خليج : شكرا ... اجي اشراق نجلسو فدوك الفطويوات

اشراق: لالا خلينا نشوفو هادشي عندهم فن

خليج : شوفي هادا فيه الدياموند ... كيحممممق

اشراق: خديتي خاتم دياموند براكة عليك .... انا بغيت نبدل دوك براسليات اللي شرا ليا بابا بهادو ... عجبوني

خليج: خلي هادوك اللي عندك زونيني ودفعي فهادو حتى تكمليهم وديهم علاش تبدلي ...

وهما كيتناقشو هبط شاب وسيم مع الدروج الخشبية من لفوق... بدجين وحداء رياضي وقميجة بيضاء بارزة عضلات صدرو .. شعر اسود لاكن محسنو كامل ومسطر الدائرة على جبهتو... جات معاه وبيناتو اكثر جدية وصرامة .. لحية سوداء خفيفة وجسم رياضي ... مباشرة من بعد ما نزل دورات خليج وجهها مصدومة جهة اشراق وقالت

- نااري محمد طه الناجي !!! قرا معايا فلافاك هاد الدري

اشراق: بسخرية* اسيييري ...

قبل ماترد خليج تاجه قدامهم مباشرة حط العلبة المربعة الحمرا وابتاسم ليهم بجوج وقال

- بونجوغ

حسبي الله عليه توكلت ...: -بونجوغ
ردو بجوجات بابتسامة : بونجوغ

قال بابتسامة كيشوف فيهم بجوج : مدام خليج ؟..

قالت خليج بابتسامة: وي انا

فتح ليها العلبة وقال : هادا الكوليي ديالك اللي طلبتي ؟

شافتو خليج وبرقو عينيها وقالت : واااو ...هوا كما شفتو فالصورة ... (دوراتو عندها ) كيييحمممق

رد بابتسامة وقال : بالصحة والراحة (شاف فإشراق ورجع شاف فخليج وهوا كيقرا توصيل العقد ) خليج الناصيري ... (هز حاجبو ) ماغريبش عليا هاد الاسم

شافت فيه خليج كضحك وقالت : شوف مزيان وكان ..

استغرب وشاف فيها بنصف ابتسامة فدهشة كيحاول يتذكر وقال

- ياك بعدا ... فايت كنعرفك فشي بلاصة ؟

ضحكات خليج وقالت : تفكر شوية وصافي

ضحك وضحكو مع الضحيكة ديالو بجوجوج وقال كيتذكر

- والله ما عقلت ... فين ننن... ؟ زعما فين ههه؟

ضحكات خليج وقالت : قرينا انا وياك فلافاك ...

بدات تذكرو بليبخوف اللي قراو عندهم و كتجبد بعض الاحداث حتى تفكر وقال هاز حوابو بجوج

- خليييج ! (مد يدو كيسلم عليها ) وكنقووول فين سامع هاد السمية ! وسميتك مكايناش اصلا جامي سمعتها مرة اخرى

خليج : ياك هههه ...

ضحك وقال: ايوا مبروك مسعود الاللة نهار كبير هادا

هما كيهضرو واشراق كضحك معاهم وتعيش معاهم اللحضة فرحانة ..

خليج : الله يبارك فيك شكرا ... ايوا ونتا درتي شي وليدات

هز حاجبو بسخرية وقال : بلاتي بلاتي دغيا كسيريتي هه .. باقي حتى نلقاو مهم بعدا

قالت خليج كضحك: لااالا باقيين بنات الناس خاصك غير تنوي ويكون الخير نشاء الله

ضحك وقال : الاللة غير مللي شفناك هادا هوا النهار الكبير .. شنو درتي من بعد القرايا ؟

ضحكات وقالت : تخرجت متزوجة هههه

ضحكاتو وقال : بيه فيه ونعم التخرج ههه

خليج : ولاهيلا ... ايوا ونتا ؟ عرفتي صدمتيني مللي لقيتك هنا ... خليتك فالقانون اش جابك للذهب ههه

قال بابتسامة : باااقي فالقانون غير دابا معمر المحل مع الواليد وصافي

خليج : شنو درتي ؟

قال كيطوي الورقة ديالها : القضاة الى بغا الله

شافو فيه بدهشة وقالت خليج : تباارك الله ماعندي مانتسالك ... باقي كتقرا ولا صافي كملتي؟

رد بهدوء: لا ساليييت غنبقاو غير كنقراو هه! راه قربت نسالي السطاج فالمحكمة الابتدائية

خليج : ايوا نشاء الله نشوفوك قاضي كبيير فالاستأناف ههه
...: قال كيضحك : نشاء الله (شاف فأشراق اللي كضحك حتى هي وقال )) ماعرفتيناش على المدموزيل

شتتات اشاراق النضر بخجل وقالت خليج بسعادة

- اشراق ختي .. حتى هي كضرس القانون

قال بابتسامة : متشرفين (مد يدو سلم عليها ) ... خديتي الدوg ولا مزال

سلمات بسرعة وبعدات يديها و ردت بخجل كتقاد الفولار على وجهها : اه خديتو لعام اللي فات

خليج : بقا ليها هاد العام وصافي

ابتاسم وقال : بون كوغاج

ابتسمات وقالت : ميغسيي .

يالاه بغا يهضر مع خليج رن ليه الهاتف وجبدو شاف المتصل وقطع وقال لبائعة من البنات

- شوفي مع المدام ... (شاف فخليج ) دقيقة وانا راجع

مشا كيشوف فتيليفون وخرج لبرا حدا الباب ..دار صبعانو فجيب السروال وعاطيهم بالضهر كيهضر وخليج متبعة ليه العين حتى نخزاتها اشراق

- بسم الله عليك راكي مزوجة البنت !

ضحكات خليج وقالت : والله مانيتي شي حاجة غير كنشوف كي ولا وصافي ... كانو البنات مزعوطين فيه فلافاك وكنت انا وحدة منهم

اشراق بصرامة : وصافي دابا تزوجتي هبطي عينيك راه كتسما خيانة

خليج : هههه الله ياختي على باطل مانشوفش طفي ليا عيني!! بغيت غير نشوف... (نخزاتها بيدها) شوفي شوفي .. شوفي ياختي الوقفة كي دايرة و الشخصية .. ملي كان كيقرا معانا وهوا هاكا وعاد مزاد تبوكص وجات معاه قاضي اححح (تنهدات)

جاتها اشراق الضحكة وقالت : ايوا الله يستر ... دابا تزوجتييي وحتى راجلك زوين وغزال مالو اش خاصو

ردت خليج بتمرد : وا قصيور شوية اختي كيفقضني... مغنلبسش الطالون عالي بزاف باش منبانش طويلة عليه

اشراق: نتي راه عينيك زاغو

ضحكات خليج وقالت: وا غير كنضحكو وصافي

البائعة : مدام ...صافي غاتاخدي العقد ؟

قالت خليج : اه اه طبعا راه مصايب ليا

البائعة : واخا اجي معايا للمكتب ...

خدات البائعة العقد ومشات مع الممر ديال الباعات اللي كيفصل بينهم وبين الزابون كونطوار زاج طويل وداير مع الشحل دالمحل حتى للمكتب الاسود ديال الحاج .. قدمات البائعة العقد للحاج وهضرات معاه ودخلاتو للحاسوب قدامو على مرآه وهوا كيرحب بالبنات بابتسامة .. شايب ولحيتو مخلطة بالشيب وشخصية باين عليه الخير والخمير.. بينما البائعة مكلفة بمعلومان العقد وكتجمع الحساب وقدامها جالسين البنات .. هزات عينها جهة الباب فجأة شافت محمد طه كيهضر ويشير ليها بيدو تسناه ... قالت بابتسامة للحاج

- ماعرفتش شنو بغا مسيو طه كيقول ليا بلاتي ...

وقف عليهم طه بابتسامة كيشوف فالبنات ودار مور لكرسي ديال الاب ديالو ووقف حدا البائعة كيشوف فالحاسوب ويشوف وخدام بواحد اليد واليد بهدوء والاخرى فجيبو ... شاف فخليج وهي فيدها البون ديال العقد والثمن وقال

- اري نشوف ديك الورقة .

عطاتها ليه بابتسامة وشافت فأشراق بسعادة فهماتو علاش طلبها .. دار عند البائعة الي حداه عطاها الورقة تعاود تحدفها من السيستيم وخرج ورقة اخرى وحطها لخليج وقال قدام باه اللي جالس داير رجل على رجل

- صافي ...غير سيري معاها

خليج : واش صافي؟

محمد طه: صافي بالصحة والراحة ... ومتغبريش علينا

خدات الورقة وناضت فرحانة كتشكرو ومشات مع البائعة باش دفع الثمن ديالو وهي كتقرا الورقة وغطير بالفرحة وتهضر بشوية

- طيح ليا النص ديال الثمن شفتي !

زفرات خليج وقالت : وا بلاتي بعدا نشري هادا
برقو عينين اشراق وقالت : حلفي بالله !!! صافي سيري خلصيه انا غنمشي نشوف دوك لخيوط حمقوني

مشات اشراق كتجري حلفات حتى تلسق خليج عليهم تشريهم ليها بأي طريقة وحطاتهم فراسها ومشات ليهم نيشان .. وقفات قدام بائعة بالحجاب كتوريهم ليها وتجبد وتقيس ليها فيديها ... دورات عينيها جهة محمد طه لقاتو متكي بيديه على البيرو كيهضر مع باه ويشير ليه جهة الحاسوب ويتناقشو .. بقات كتهرب ليها عينها كل شوية لتما حتى هز راسو مشوش التفكير وبعدات النضر رجعات لبراسليات ديالها الثلاتة ديال كارتيي عصريين .. واحد ابيض واحد برونز واحد اصفر .. شافت خيالو دايز وهزات عينيها لقانو قدامها مور البائعة .. شاف فيها بابتسامة وحرك راسو ومشا بحالو طلع لفوق . خسااارة البراسليات كبار ماشي قد يدها نهائيا ... يدها رقيقة لاكن جاوها كيحمقو مع بشرتها البيضاء ويدها الناعمة .. تحسرات عليهم وبدات تشاور مع البائعة حتى وقفات عليهم خليج

- مالكي؟

اشراق معبوس : مجاونيش .. وحتى حاجة مجات قدي كيلعبو تكشبيلة فيدي وكيطلع واحد فوق واحد تفقصت

خليج: ينقصهم ليك

البائعة : ممكن ... ناخدو عبار يديها ونوجدوهم ليها

اشراق: غيتعطلووو بزاف

البائعة : فوقاش بغيتيهم ؟

اشراق: عندنا العرس من دابا يوماين ... بعد غدا يكونو واجدين ؟

البائعة : نشاء الله ميكون غير الخير

اشراق: صافي .. نقصيهم ليا ... شوفي داكشي اللي غتنقصي منو شحال غيعطيك وزيديهم ليا خاتم

زفرات خليج من مناخرها و بدات اشراق ضحك فصمت .. خداو ليها العبار ديال يديها وتفاهمو على الثمن ديالهم وخداو العقد ورجعو للدار فرحانين .

يالاه وصلات بدات تحيد جلابتها جاها اتصال وفتحات الخط كتعض شنايفها ودور فراسها

- الو ... وييلي نسيييت ... واش جيتي عندي؟ وييلي نسيت تشطنت مع خليج غير سمح ليا ... (خرجصوت الغوات من الايايفون حتى هربات ودنها ورداتها بعصبية ) ما درتهاش بلعاني واصلا تعطلتي شحال وحنا تما فالمحل ... غضب كاع .

قطعات معصبة ولاحت تيلي فوق النموسية معصبة وتسوط ... يخخخ بدا يطلع ليا فراسي بهاد العصبية ... شداني لشي واحد نعرفو كاع ... الطواليت الى بغيت نمشي ليها خاصني نعلم ... وهوا يعيط فاش ترشق ليه وتليفونو مكيسكتش كل مرة هاز وحدة فشكل ..يخ

طفات تيليفون ورجعات لشغالاتها كتوجد مع العائلة التمر المعمر والوريدات اللي غيتحطو نهار الحنة والديكورات ديال الطبلة .. جري عليا نجري عليك كل واحد فاش مشطون كل واحد وهمو وأول عرس عندهم فالدار تلفو وداخو بغاو يديرو داكشي فالمستوى ومودرن ومينساو حتى حاجة ... دخلة اشراق وبنات عمها خارجين ... كل مرة شنو يجيبو وكل مرة شنو يتفكرو ... مللي يصبح الحال وهما كيتجراو حتى كيطيح الضلام الي كيجري عليهم لديورهم ... ها الرونديفوات ديال الحمام ها الورد ها ماء زهر ها التكاشط ها الحلوى ... بقاو على داك الحال حتى لصباح نهار الحنة .

العنصر الصافي والماء ديالو يجري... مانعبيكش العايلة واخا نبقا عزري ...

العنصر الصافي والماء ديالو لحلو...
مانعبيكش العايلة غير الله يسامح لو ...

اغاني جبلية مطلوقة كاملة بحكم اب اشراق جبلي فالاصل .. البنات كيشطحو فالصالون فالقفاطن شهوة منهم ... الشعورات والمكياج لعلك ترضى كدوخ العين فيهم ... غير الزينة على ختها والدهوبات لا المزوجات ولا العزبات ... التاويل والاناقة فكل شيء .. لاللة نزيهة كترحب وتعاود بالبنات غلدية جاية بجوهرة وتشالي بالشراتل والشعر كاري زعر .. لاكلاااص الحاجة نزيهة وهي وسط العيالات فقط ممنوع الرجال .. التكشيطة معرية من اليدين مشبكة والصدر كيبان يحلف عليها الواحد ما والدة دوك البنات .. ايوا مللي الام هاكا كي بغيتو البنات يكونو ... اش غنقول ليكم ... لبنات كي الأميرات ... العروسة جالسة كتنقش النقش عامر فاليد بالقفطان خضر والمجوهرات والشعر كحل مسبسب كتفتفن .. طالقة رجليها ويديها ولاللة اشراق السندريلا ديال الدار حداها صدمات الجميع واخا العائلة عارفين السي الحاج عبد الغني والد الزين فين ما جيتيهم يحنتوك ... الشعر زعر ملوي طويل حتى للمأخرة والقفطان مذهب بالطرو والعقيق والمضمة ديال مها ديال الذهب دياراها .. الصدر مهزوز والكورميط فالعنق ديال الذهب والسنسلة طويلة مذهبة هابطة مع صدرها .. الفورمة كتفتن واليدين ميشاليو والدفار طوال مصبوغين بالاحمر فاتح والبراسليات كيتقرقبو فيديها والخاتم فصبع الشهادة الايسر قدو قداش والروايح والمكياج بارز .. ناضت وقفات وسط البنات والفرقة الموسيقية النسائية وطلعات بالطالون فيه ميترو على الكعدة وبدات دردك وتشالي بالشعر حيت عارفة راسها فالعرس غتجلس دير عقلها وسط الرجال مكاين لا شطيح لا شعور .. بردات غدايدها فوق الكعدة حتى شبعات هي وصحابات ختها وعائلتها .. نقشلتها يديها ورجليها وفرحو ليلة كاملة حتى قالو عمرنا نعاودو .

صبح الحال ... وصبح كلشي مرون مع العرس... سبقو الحنة بيوماين قبل باش يرتاحو لغد ليه عاد يصبحو فالعرس... بقا غير ليوم وغدا العرس وكل وحدة كتوجد فراسها . اما لاللة اشراق صبحات لابسة جلابتها الحمرا لانيقة والبلغة ديالها الحمرا ولايحة شال باج على راسها والشعر زعر كيجل .. الحنة حمرا فيدها والنقش كيحمق والدفار مصبغين والروايح نعام السي .. مكياج خفيف.. تكحيلة وكلوز وشدات الطريق فطموبيلت باها خطفاتها ليه بسرعة ومشات تجيب براسلياتها تحضر بيهم فالعرس
فالطريق وهي سايقة سيارة باها كاط كاط هيونداي رن الهاتف حداهت وفتحات الخط
- الو خليج ..

خليج : الزين .. راه درت ليك انفيطاسيو فالصاك عطيها لمحمد طه

تصدمات اشراق وشدات الفران فالجنب وهزات الصاك وتيلي على كتفها كتأكد وترون فيه البزربة لقات الدعوة مذهبة وجبداتها قراتها باسم " السيد محمد طه الناجي " بدات ترمش فدهشة وقالت

- اويييلي واش مريضة منقدرش نعطيها ليه

خليج ببرودة : اممم... باينة على وجهك كتحشمي امسكينة

اشراق: بجدية ) مغنعطيهاش ليه (كمشات فمها)

خليج :ببرودة ) ونتي مالك ... غتعطيعا ليه.. وتقولي ليه عطاتها ليك خليج .. مرحبا بيك .. وصااافي .. نردو ليه الجميل ونديرو معاه الصواب

اشراق: ايييه .. مسكييينة ساهلة ! ايوا والى جا بصفتو شكون احبيبة ؟

ردت خليج ببرودة : بصفتو ولد مول الباش .. عطيها ليه وصافي واصلا شكون قالك غيجي راه غير صواب يا حيوانة غير الصواب

اشراق : مغنعطيهاش ليه

خليج: غتعطيها ليه احبيبة

اشراق:الا

خليج : ايوا ها حنا غنشوفو .. يالاه بالسلامة

قطعات عليها وخلاتها شادة تليفون كتسوط وتشوف فالدعوة وتنفخ .. رداتها للصاك وكملات طريقها مباشرة المحل ووقفات قدام الباب ونزلات هازة الصاك فيديها وكتقاد الفولار على الدورة دوجهها .. ابتاسمات للبائعة اللي استقبلاتها وقالت

- عفاك... ديجا حاطة عندكم براسليات ديالي جيت ناخدهم

البائعة : واخا مرحبا

دورات اشراق عينيها فالمحل مابانش ليها محمد طه ... غير الاب اللي جالس فالمكتب كيهضر فالفيكس والموضفين اللي خدامين والناس وشي فنانة متنكرة باش ميعرفوهاش الناس كتقيس خواتم الدياموند .. ابتاسمات اشراق وقالت للبائعة

- مسيو محمد طه مكاينش

البائعة : لا مكاينش

تنهدات اشراق بخجل وقالت : امم..احم .. مغيجيش؟

البائعة : كاين الحاج ...

قاطعاتها اشراق: لالا بغيت مسيو طه الى كان ممكن ... تقدري تتاصلي بيه

بقات البائعة غير كتشوف في حيرة وقالت بتردد

- ما .. ماعرفتش.. انا غادي نشوف لغيسبونسابل ونرد عليك

حركات اشراق راسها وجلسات فوق كنبة كتبلع الريق ماحملاتش الموقف اللي تحطات فيه وبدات تشطح برجلها فتوثر .. جا عندها المسؤول شخصيا كيرحب وقال

- شي حاجة اغجونص امدموزيل ؟

ردت بحرج : لالا .. اا اه اه بغيتو الى كان ممكن

الغيسبونسابل : واخا مادموزيل تفضلي رتاحي

جلسات كتسب وتغدد فخاطرها على خليج حتى قاطع سبانها المسؤول وقال

- هاهوا جاي ...تقدري تسنايه شوية

اشراق: واخا ..شكرا

دارت رجل على رجل نسات البراسليات وبدات تلعب فواحد الخاتم فديها كتسنا .. صونا ليها تيليفون وفكل مرة كيصوني كتشوف المتصل بميوعة وتقطع عليه حتى دخل محمد طه مع الباب كالعادة سبورتيف . الدجين وتيشورط كحلة وكاسكيطة كحلة حيدها مع الدخلة احترام للزبناء والمحل الراقي .. فيدو سوارت السيارة وتيليفون .. شافتو ودارت راسها مشافتوش هبطات عينيها على الهاتف كأنها مشغولة وفنفس كتراقب التحركات .. مشا حدا كونطوار الزاج ماعرفهاش ودار يدو على جمبو مكروازي رجليه والبائعة كتهضر معاه وتشير لأشراق بعينيها ..تلفت باستغراب وجا عندها وقف عليها .. هزات راسها فاجآتو ووقفات مدات يدها بابتسامة وخجل وهوا كذلك كيشوف فيها بابتسامة فدهشة

اشراق: سمح ليا الى جيت فشي وقت ماشي هوا هداك

رد بلطافة : لا مرحبا على الراس والعين

ابتاسمات وحلات الصاك جبدات الدعوة مداتها ليه وقالت بارتباك مع ابتسامة خجولة

- هادي عطاتها ليك خليج .. قالت

ليك مرحبا بيك للعرس غدا بالليل نشاء الله
شد الدعوة كيضحك حلها وقال : شكرا على الدعوة

اشراق: كتأكد عليك تجي ..

ضحك وقال ومالقا اصلا ميقول : نشاء الله ...شكرا بزاف ... و ..و والله يكمل بلخير

اشراق : امين ... (هبطات راسها بالجنب باش تنصرف وقالت بابتسامة)

- سمح ليا مرة اخرى

دازت من قدام عينيه مشات تشوف البراسليات ديالها ووقفات قدام البائعة .. دخل لداخل جهة المجوهرات ودار جهتها حدا البائعة وقال وهوا كيدور العلبة دقامو

- هادا ديالك ؟

حركات راسها وقالت : اه ديالي

البائعة : نقصنا منو على قياس يدها ... جاوها كبار فالاول

رد مع تحريك الرأس: امم .. انشوف

هزهم كيشوف الخدمة ديالهم وحلهم وحرك راسو باش مدات ليه يدها اليسرى وجرات الكم ديال الجلابة وعطاتو يدها الجميلة ركب ليها الاول والثاني والثالت وهي كتفتف فكل مرة يلمس يديها . عمرها ما ضنات باللي الاعجاب ممكن يجي حتى من اليدين ماشي الوجه فقط .. اعجبت بيديه الرجولية .. كانت كتكره تشوف الزغب فالرجال لاكن تبدل ليها الرأي هاد المرة ورجعات من عشاقه .. حتا هوا داير ساعة يدوية باهضة الثمن فيدو فضية وخاتم رقيق و خيط اسود فاليد الاخرى فيه دائرة ذهبية منقوشة على شكل التاج اللي كيكون مرسوم وراء الدرهم . وفعنقو سلسلة ذهبية رقيقة .. بقات غير كنشوف فيه ولحمها كيتوشك .. طلق من يديها وقال

- مزيانين دابا؟ مامزيرينش بزاف؟

حركات راسها وقالت بارتباك : لا زوينين ... عجبوني شكرا ... كنت طلبت معاهم خاتم ديالهم ..

شافت فيها البائعة وجهها صفر وقالت : نسيناه .. ما ..

شاف فيها محمد طه بتخنزيرة بنص عين حتى غرقات وتدخل

- جبدي المودل نشوف

جبدات ليه المودلات قدامو وشارت اشراق للخاتم ديال البراسليات وقالت

- هادا ولاكن جاني كبير فصبعي

حرك راسو بالاجاب وحل واحد المجر موراه جبد واحد الدائرة صغير ومد يدو عطاتو يدها ودخلو ليها فصبعها وبدا كيزير بشوية كيشوف العبار ديال صبعها وهي كتشوف فيه بنص عين طلع ليه الدم من الموقف ديال الخاتم .. حيد الدائرة وشار للبائعة تحيد من حداه وجا الغيسبونسابل قيد العبار

محمد طه : شوف المحل لاخر واش باقي عندهم (شاف فيها وقال) فوقاش بغيتيه ؟ ليوم ؟

حركات راسها وقالت : اه بغيتو ليوم .. والى مكانش ماشي مشكل حتى يوجد

تنهد ودار شاف فالمسؤول كيسوط .. عرافتو تعصب غير مصلاحش ليه يهضر قدامها وكيخزر فيهم بعينيه .. تاصلو بالمحل التابع ليهم ولحسن الحظ جابو ليه الخبار وهوا واقف كيطقكق بصبعو ويتسنا ويتسنا

الموؤول: كاين راه قلت ليهم يجيبوه

محمد طه : نفس هاد العبار

المسؤول : اه نفسو

جات بائعة اخرى بادب وقالت : مادموزيل .. تفضلي معايا على بيدمن يوصل الخاتم ديالك

حركات اشراق راسها عجباتها المعاملة ديالهم واخا نساو ليها الخاتم .. جلسات وعطاوها شاي ودارت رجل على رجل كتشوف فالبراسليات اللي فيدها في حين طلع هوا هوا لفوق وتبعو المسؤول
نصف ساعة وحضر الخاتم ونداو عليها ناضت عندهم شافت الطابلو ديال الخواتم اللي جابو ليها .. هبط فديك الاثناء محمد طه عندهم وجر وهز الخاتم وقال بابتسامة
- على الله يجي قدك

ضحكات وقالت : على الله ههه

حيدات الخاتم اللي كانت دايرة فصبعها حطاتو قدامو وبقات كتشوف فالخاتم فيدو ماعرفاتش واش هوا اللي غيركبو ليها ولا هي غتركبو راسها... بقا كيهضر مع اللي حداه على شي حاجة اخرى .. انصرفو اللي كانو معاهم وبقات بنت وحدة واقفة كتساعدهم .. تلفت عندها وقال

- اري نشوفو هاد الصبعان عندك واش يقبلو عليه ولا لا

ضحكات وعطاتو يدها ركب ليها الخاتم .. اخييرا جا قدها .. فرحات وضحكات المساعدة وقالت

- جاوك زوينين فيديك بصحتك

رد محمد طه بابتسامة خفيفة ومغازلة واقف بالجنب كيشوف فالمساعدة

- يديها اللي زوينين كيجي معاهم الذهب جيبي ليها مراية تشوف

حمارو حناك اشراق وبقات غير كتشوف ساكتة .. حطو ليها المراية كتشوف يدها وتحركها وقالت

- مغيتحلوش ؟ زعما يتحلو ولا يطيحو

حرك راسو بالنفي وقال : لا مزيرين غير حركي يدك كما بغيتي

قالت بسعادة : شكرا بزااف

شاف فيها بابتسامة وقال: بالصحة والراحة

مشا للمكتب جلس فالكرسي لان باه ناض خرج كيهضر مع شي شخص على برا .. لتاحقات بيه للمكتب تاخد حسابها ومكانتش متوقعة غيدير معاها بحال اللي دار مع ختها .. ختى هي طيح ليها الثمن وعطاها الورقة ليديها وقال بابتسامة

- بالصحة والراحة .. (مد ليها الكارط ديالو) الى خصاتك شي حاجة تاصلي بيا مرحبا

قالت بسعادة: ميغسييي ... عنداك ماتجيش غدا

رد بابتسامة:نشاء الله يكون خير

اشراق: نشاء الله .. خليت ليك الراحة

ناضت فرحانة ربحات الفلوس اللي بقاو ليها وكانت ناوية تكمل البقية ..مشات طلعات فالطموبيل فرحانة غادية سايقة وكتصور فيديها عاجبها الحال حتى للدار ودخلات فرحانة عاودات لخليج على شنو وقع وجلسو يفرنسو شوية من بعد ناضو عاوتاني جري عليا نجري عليك فالتوجاد ...

نهار العرس كولشي واجد ... كولشي لابس .. كولشي مقاد ... جا احسن ميكاب ارتست عندهم للقاعة هي وختها دار ليهم مكياج بجوج وحدو لعروسة والقاعة عمرات .. العرس مخلط قطريين وناس نقيين كلشي باغي يبان همة وشان .. لعروسة واجدة فالاوتيل فين حاجزة غرفة للعريس تما مشات تلبس بعيد على الناس وعلى الدار العامرة ... صايبو على خاطرهم ولبسو على خاطرهم .. لاللة اشراق اسم على مسمى .. سارقة بتكشيطة حمراء اخر صيحة وصندالة عالية دوغي ومضمة .. فولار على راسها خفيف جنابو مرمين على كتافها لور والشمار مذهب دارتو ليها النكافة على كتافها وخيط الريح على جبهتها داخل الحجاب.. واخا دايرة فولاور طلعات احسن من جميع البنات اللي حاضرين بالسوالف .. لعروسة بالمشطة والتاج واجدة والعريس معاها فرحان عاجبو الجو والتقاليد المغربية .. نزلو وركبو فسيارة فاخرة ومشاو موراهم السيارات المرافقة حتى للقاعة ، دخلو لعروسة بعيساوا فالعمارية وشطحو بيها وسط القاعة مع مغنيين شعبيين .. كلشي فرحان وكلشي ناشط .. سرحات اشراق عينيها فالقاعة على الله وعسى يبان ليها محمد طه لاكن لا وجود له .. بل تصدمات فاش شافت صاحب دعوتها جالس وسط الحضور شاب طويل وعامر باين من وجهو الشر كيشوف فيها ويضحك بسخرية.. اويلي! شكون عرض عليه !! اش هاد الكمارة عندو جاي بيها للعرس بلا حشمة بلاحيا !! شافت فيه بعصبية وخزرات فيه وشارت بعينيها جهة المرحاض ومشات كتزرب دخلات للمرحاض ودارت يدها على جنبها كتسناه حتى دخل وهي تخزر فيه
- اشنو جيتي دير هنا !! شكون دخلك

عبس وقال : علاش مكتجاوبينيش وكتقطعي عليا

تعصبات : صافي كنقطع عليك تجي عندي حتى لهنا لعرس ختي تخسر لينا لعرس ولا شنو

رد بعصبية : جاي نشوفك ... ماشي نخسر العرس

اشراق: شفتيني ؟ واسير دابا حيد من هنا

طلع فيها وهبط وقال : هاي هاي هاي ... متيتزة ليا مع راسك

زفرات وقالت : وا سييير فحالك دابا غتجبد ليا الصدع سييير

رد بعصبية: شوفي ..غدا غنشوفك الى مجيتيش غدا غنجي حتى لبابكم

دفعاتو وقالت : صافي سييير غدا تشوفني صافي

خرجاتو من المرحاض وخرجات قدام المرايا كتشوف فوجهها وتسوط. تفو كرهت النهار اللي عرفت و فيه .. لسقة الله يخليها ماركة الزبل كرهني فيه

خرجات لقات العروسة نازلة باللبسة الثانية ومشات بالزربة تعرضات ليها وهبطات معاها فرحانة وقفو العروسة والعريس الوسط كيشطحو معاهم واشراق كتشالي بيديها وتجر فالتكشيجة كتسقسق بالحجر اخر مكاين . مع الدورة غدور جهة الرجال قشعات محمد طه جالس على الكرسي فالطبلة مربع يديه بسروال كلاص زرق مغلوق وقميجة بيضاء كيضحك معاهم .. شافت فيه بدهشة وسرور وتلفتات بسرعة عند خليج اللي كتشطح وقالت ليها فودنها

- شوفي شوفي محمد طه جا

تلفتات خليج بسرعة شافت فيه وضحكات معاه هي واشراق اللي شارت ليه بيدها بلا متشعر كأنها كتعرفو سنين ومنين هادي دار التحية براسو كيضحك وهنا بدات الفراجة ديال بصح عند اشراق... المشية بالتاويل والجلسة بالتاويل واي حاجة بغات ديرها كضرب ليها الحساب تحسبا لنضراتو ... غير كضحك مقاداها فرحة وكل مرة دور تشوف فيه كتلقاه كيشوف فيها .. مشات كطير عند لاللة الحاجة نزيهة وجراتها كتشوش ليها فودنها فالبيت ديال لعروسة

- اشراق: مارحبتوش بصحبات خليج غيبقا فيهم الحال

لاللة نزيهة : الله ابنتي من قبيلا وحنا نرحبو ونعاودو

اشراق: لا مارحبتوش بصاحبتها يالاه جات هي وراجلها دابا عاد

الحاجة : متأ... زيدي وريني هاد صاحبتها ... رحبي بيهم نتي ونتي شكديري

اشراق: وا نتي ماشي هي انا .. قوليها لبابا يرحب براجلها حشومة ... اجي نوريه ليك بعدا

خرجاتها من البيت وبدات طل هي وياها من لفوق وتنعت ليها وتشوش وهبطات لتحت كتعوج وحاضيا باها منين غادي ومنين جاي حتى بان ليه غادي جهة محمد طه و بدا كيرحب بيه ... ناض الاخير وقف وسلم بالوجه كيبارك والاب كيرحب بصدر رحب ويعاود في حين جالسة اشراق كضحك حدا العروسة فالبرزة وهما كيتصورو
خليج : مسخوطة شنو مشيتي قلتي ليهم
اشراق : راجل صاحبتك ههه

خليج : دوزي من حداه رحبي بيه حشومة

اشراق: اويييلي حشمت

خليج: سيري سيري واش القااااضي جاي عندنا وعارضينو نهار بنهارو وجا ومانرحبوش بيه .. سيري تكعدي من حدايا انا معندي باش نفعك

نخزاتها خليج حتى ناضت ومشات يالاه قربات جات عندها النكافة دوخاتها بالهضرة وصدقات طالعة مع العروسة بدلو ليها وبدلات حتى هي لبسات وحدة اخرى رائعة وبدلات الفولار ..دارت الفرقة الوسط وسط منها خيط الريح مذهب وشدات الفولار لور خفيف بينات الفرقة ... مابقا حجاب رجع ستايل .. زاغت وبغات تبان شوية ..جات زوينة كتحمق وبدلات لوك هاد المرة واخا تمادات شوية وبينات شعرها الاشقر لاكن ماشي مشكل العرس هادا واخر مرة ديرها . نزلات مع العروسة بالصلاة والسلام حتى لتحت باش طلع فالطيفور .. خلات كلشي ملاهي مع العروسة ومشات دارت من اللور ورا ضهر محمد طه حتى وقفات عليه فاجآتو بقا غير كيشوف فيها وناض وقف مد يدو ليها سلم

- اشراق : مرحبا بيك ... شرفتينا

قال بابتسامة شاد فيدها : الشرف ليا مادموزيل اشراق

اش كيوقول فببحال هاد المنسبات ؟ تلفات الهضرة مالقات متقولو ولا باش تجاوب ..بدات دخل وتخرج فالهضرة وخايفة شي واحد يرد ليها البال ولا تشدها الكامرة المفضوحة وتبقا متورخة ديال بصح . هز علبة محطوطة قدامو صغيرة وقال

- هادا كادو صغير لخليج سلمي عليها

شداتو وقالت : علاش كلفتي راسك

جبد علبة صغيرة من جيبو مدها ليها وقال

- هادا الخاتم ديالك اللي خليتي عندنا ... درتي الجديد ونسيتي القديم

شداتو وقالت : اويلي نسيييتو .. ومتفكرتووش

ضحك وقال : هاهوا جا حتى لعندك

شكراتو وعاودات رحبات بيه بخجل ومشات خلاتو رجع جلس متبع ليها العين .. رن الهاتف ديالو وهزو لقا مسجات الواتساب .. دخل لقا شي واحد فصحابو بعت ليه رسالة مكتوب عليها بالفرنسية

- شوف الزين شوف

دضحك على صاحبو ودخل فتح الفيدويو بدا كيتفرج فالشعر مطلوق والزين كيتشاير .. شوية تبدلو ملامح وجهه بسرعة فاش دارت البنت عندو وبان وجه اشراق ! كتشطح فوق القعدة محيحة طالقة الشعر وكتلعب بيه عايشة اللحضة ومحزمة .. وشحااااال كتعرف تشطح بقا غير كيشوف فيها حتى سالا الفيديو وناض خرج لبرا حدا الباب ربط الاتصال بصاحبو

- الو .. هانيا الحمد لله .. انا فواحد العرس.. اجي قول ليا .. لفيديو اللي سيفطتي ليا دابا منيني جبتيه؟... شكون سيفطو ليك ؟؟؟ ... كفاش داير لبوز !....واخا هانا غنشوف.. لا والو غير كنسول ... يالاه بون وي

قطع ودخل لداخل شاف فيها مباشرة لقاها واقفة مكتشطحش ومكديرش داك الشطيح نهائيا مللي بدا العرس.. عاود تفرج كيتأكد ويشوف فيها .. واش بإرادتها ؟ واش هي ناشراه راسها؟ زعما دايرة الحجاب ميمكنش تلوحو وهي محزمة بحال هاكا . هادا اغراء ماشي شطيح عادي اللي ديرو بنت محتارمة بحالها وتنشرو .. دخل للفايس بوك لقا الفيديو ديالها منشور فكروبات الدراري كيتحرشو بيها مكاين غير اللي كيتشها وكاين اللي كيسب وجامع البنات كاملين فالشبكة ، كاين اللي عاجبو الحال كيقول بنت زوينة كتعرف تشطح و كاين اللي كيسب فاللي نشرو وكيعطي مبررات ويجي من جهتها . كذلك الانستاغرام الصفحات كاملين ناقلينو لاكن كاتبين عليها عنواين غريبة . - فاش كطلقي وكديري الحفلة - فاش كيقول ليك بوركابي جاي نخطب من بعد 7 سنين ديال تجرجير - الزين المغربي - ديري هاد الشطيح يشدك كلاكاج... الى اخره الفيديو دار البوز بامتياز ومنزل فجميع السطوريات

دار تيليفون فجيبو ورجع جلس عادي لاكن بقا كل شوية يعاود الفيديو ويهز عينو فأشراق وهي دور دور وضحك معاه ..طالعة نازلة مع العروسة وفرحانة حتى قرب يسالي العرس وهي تشوفو ناض هز لافيست ديالو بحكم كان شوية ديال البرد وفصل الخريف الجو مخربق . دار ليها اشارة باش يمشي وهي تمشي عندو لبرا فين وقف كيتسناها ومدات يدها كضحك
محمد طه: يالاه لاللة اشراق.. الله يكمل كلشي بلخير

سلمات عليه وقالت: يجيك الخير نورتينا

جاتو الضحكة وقال: النور نورك الاللة اشراق ... عندك انستغرام ؟

اشراق :اه عندي

جبد تيليفونو الاسود ن الجيب وقال : عطيه ليا

خدات تيليفون ديالو دخلات اسمها وحلات تليفونها قبلات منو الدعوة وقالت

- صافي راه قبلت لانفيت

دوز صبعو على تصاورها بسرعة خدا فكرة لقا كلشي بلحجاب ومحتارم والانستا ديالها فيه الناس قلال ومقفل .

اشراق: هادا حسابك ؟

قال بسخرية : وديالمن ؟

ضحكات وقالت: لا غير سولت وصافي

بقات كضحك وودعاتو مشا طلع فسيارة بي ايم دابيلو كحلة كتبري تحت انضارها ومشا بحالو . رجعات فحالها جلسات دايرة عقلها مابقا لا سير ولا اجي حتى صبح الحال وسالا العرس ومشات لعروسة للاوتيل ورجعات العائلة اللي خاصها ترجع تبات فالدار .

بات العرس بالليل... وصبحات الجنازة فالصباح .. سبحان الي يبيتها فحال ويصبحها فحال .. دخلات لاللة نزيهة عند اشراق للبيت كتجري والدموع فعينيها وجهها صفر كترعد وتشهق فيقاتها من عمق النوم

- اشرااااق اااشراااق نوضي اشراااق

تعليقات

🔴 ممنوع قراءة القصص المخيلة للآداب و أنت على صيام