قصة راجلي في الحرام قصة واقعية كاملة - قصص مغربية بالدارجة
قصة راجلي في الحرام
قصة راجلي في الحرام قصة حقيقية - قصص مغربية سفالة بالدارجة
قصة راجلي في الحرام قصة واقعية كاملة - قصص مغربية بالدارجة 9isas maghribiya
مرحبا بجميع متابعين موقعنا قصص سفالة بالدارجة المغربية اليوم انحط ليكم قصة جديدة حقيقية و حصرية نتمنا تعجبكوم و ماتنساوش تكتبوا لينا الراي ديالكم على القصة في تعليق لتحت ، احبكم 😍
السلام حبيباتي كنت جالسة وقلت مع راسي نتشارك معاكم قصتي حيت اكيد بزاف لي عاشو بحالها وحتى لي معاشتهاش اكيد شافت وحدة قريبة ليها دوزات هادشي لي غنعاود ليكم.
حكايتي بدات ملي وصلت 23 عام كنت خدامة فواحد الروض كتقري الوليدات الصغار كنتخلص غير ب 1000 درهم واخا مكافيانيش كنت راضية بيها كنعاون منها ماما على مصروف الدار وخواتاتي لي أصغر مني إكرام والهام وماما كانت كتبيع وتشري داكشي على قد الحال معندها لا محل لا والو كتجيب بيجامات والتواب من الجملة وتعاود فيهم البيع كيشريو من عندها الجارات كتربح قليل أغلبية كيشريو بالكريدي. المهم ماما مسمحاتش فينا وتكرفسات من بعد ما توفى بابا وخلانا صغار وملقينا لا حنين لا رحيم غير الله حتى العائلة كلها ديها فراسو واخا لباس عليهم منفعوناش.المهم كنا عايشين بلي قسم الله حتى الحوايج ماعليك بحوايج حيت خلصتي وفلوس ماما ياربي يكملو لينا الشهر مكنتش بحال البنات فعمري كنلبس غير ليكان وناكل ليكان.حتى غيجي نهار لي غيتبدلو فيه بزاف الحوايج.داك العشية كنت فالروض جيت لدار لقيت مرات عمي الحاجة رقية سلمت عليها وجلست هاد مرات عمي مكتجيش عندنا وحتى عمي مكيجيش حيت هما مرفحين علينا ومكيجيوش كيخافو نلصقو فيهم الزلط وفيهم شبعا شيكي هي وبناتها وولادها.المهم مشات مرات عمي وماما بانت ليا فشكل سولتها قالتلي عمك بغا يزوجك لودو انا مفهمت والو كيفاش هادشي عمي معمرو اعتارف بينا ولا حاشاها لينا ماما قالتلي اشغنديرو تلفات وحيت ماما مرا نية بزااااااف ودريويشة قالتلي حشمت نقولو لعمك لا انا قلت ليها منزربوش حتى نفكرو...دازت 4 أيام وانا نتصدم بالسبت جاو دار عمي كاملين دخلو علينا اش هادشي دخل عمي قال لماما مكاين لاش نعطلو وزيدون إيمان بنتنا مغتقولوش لا
مغتقولوش لا وماما مسكينة حيت حشومية قالت ليه ليبان ليك الحاج انا معرفت نفرح ولا نتخلع انا مكنتش كنفكر فالزواج حتى إلى فكرت معمري نشوف فدار عمي حيت معمرهم تفكرونا كنشوفهم غير إلى كانت شي مناسبة فالعائلة وكنتسالمو بحال الاغراب.مشيت لكوزينة وعيطت لماما قلت ليها شنو هادشي قالتلي والله ابنيتي إلى حتى انا بحالك دخت ولكن يمكن هدا مكتابك وربي بغا يفكك من تمارة والقهرة قالتلي توكلي على الله وهادا رآه عمك يمضغك مايسرطك.قلت نتوكل على الله مشيت بالزربة بدلت حوايجي وجلست معاهم ونا كنترعد وقلبي كيضرب مرات عمي وبناتها لابسين آخر مكاين فالقفاطن والدهب بحال إلى غادين لشي ديفيلي تقول هما لي عرايس. وحتى الماكلة جايبينها طايبة حيت معالميناش. خطبوني لهشام جلسو اكتر من ساعة عاد جا هو سلم وجلس المهم جابو ليا شي حوايج ديال الخطبة وخاتم هضرو وضحكو وكلاو ومشاو وتفاهمو مع ماما صراحة مخاصنيش نقول تفاهمو مع ماما تفاهمو مع رأسهم وقررو وقالو لماما من هنا لشهر نديرو العرس.معقلتش اشنو وقع فهاد المدة حتى وصلت السيمانة ديال العرس جات مرات عمي قالتلي يالاه معايا بغيتك خرجت معاها وانا معارفة فين غادة حتى لقيت راسي عند واحد الطبيبة دخلنا وهي تقوليها مرات عمي هاهي ادوكتورة وانا غير كنشوف قالتلي الطبيبة اجي معايا دخلت قالتلي حيدي سروال وانا نتصدم حيت عرفت مرات عمي علاش جابتني عينيا عمرو دموع حيت حسيت باهانة وحيت حسيت براسي معندي لا راي لا والو بقيت ساكتة وتكيت وانا حشمانة معمري تحطيت فهاد الموقف قلباتني طبيبة وقالتلي صافي لبسي الله يرضي عليك وخرجات قالت لمرات عمي معندك مناش تخافي الحاجة البنت غزالة وباقا كيفما تزادت نهار الاول ومرات عمي عجبها الحال خرجنا مشينا عند النكافة قيست لبسات ديال العرس ومن
ومن بعد مشيت لدار كنبكي قلتها لماما قالتلي مديري فبالك والو قلت ليها ولكن علاش داتني واش انا كنبان ليها بنت الزنقة قالتلي انتي عارفة عائلة باك كلهم هاكا واخا لباس عليهم مزال عندهم النقشة قديمة وكيحكرو على هادشي.المهم حاولت ننسى هادشي وعقلي كامل غير مع العرس وكيفاش غتكون حياتي معاهم وكيفاش غيكون معايا هشام لي مزال مهضرتش معاه.بقات 3ايام للعرس عيط عمي لماما قالها اليوم غنديرو العقد وانا فهادشي كامل غير كنشوف درنا العقد وهشام هضر معايا شوي صراحة يمكن نقول هشام قريب للصورة ديال الراجل لي كنت باغاه طويل وعامر واسمر ومسرار. المهم نهار العرس جا هشام الداني لصالون بقيت تما مع اختي لي أصغر مني الهام حتى دازو عليا مشيت لدار حيت عمي دار لعرس فدارو كيفما قلت ليكم قبل عمي واخا لباس عليه ماشي من نوع الراقي. كانت العائلة حاضرة وداز العرس زوين وهشام مرة مرة يضحك معايا حتى قرب يطلع الصباح قالي غنمشيو لدار أخرى ديال عمي مفروشة وخاوية.سلمت على ماما وخواتاتي بالبكا ومشيت مع هشام.دخلنا لدار غزالة فراشها بلدي والجبس منقوش كلشي زوين انا كنشوف فداكشي حتى بات لي لافيست ديال هشام تلاحت قلبي ضرب هو مورايا قلت بدأ كيلوح فحوايجو ادن غيتلاح عليا قاليا مرحبا تبسمت ومهضرتش قالي اجي شد يدي وبدا طالع فدروج وانا قلبي كيزدح دخلنا لبيت نعاس انا جلست فوق ناموسية ومقادراش نشوف فيه قرب ليا وبلا مقدمات بلا حتى حاجة بدأ كيحيد ليا حوايجي انا تصدمت حيت مكنتش متوقعة هاكا كنت كنتسنى منو يدلعني ودير رومنسية باش يحيد مني الحشمة مدار اعتبار لوالو وماقالش رآه حشمانة مني وماكانتش مضاسرة معايا .المهم بدأ يحيد لي فالحوايج ومكانش الضو شاعل ولكن كان الضو ديال النهار قريب يطلع كنت كنشوف هشام ماشي كيتمتع معايا
كنشوف فيه بحال شي واحد كياكل فيا مكاينش دوك البوسات الحنان ولا تعنيقة تحسسني بيه ولي زاد صدمني هو ملي شميت فيه ريحة الشراب كرهت راسي.وكملها معاملنيش بالمحنة ولا قال بشوي على هاد البنت رآه اول مرة تنعس مع راجل.المهم داز كلشي وهشام ناض دوش وجا نعس انا لبست حوايجي وتخشيت فالفراش وعطيتو بالظهر.نعست مضرباتني الفيقة حتى سمعت تلفون هشام كيصوني شوي سمعتو كيهضر....آلو. ..وفين أبا عماد صافا بخير الله يحفظك صافي حتى نتلاقاو فالقهيوة المعلومة ...تهلا. شوي فيقني. . إيمان ..إيمان نوضي درت لعندو قاليا يالاه نمشيو قلت ليه فين قالي لدار عندنا قلت ليه دابا ؟؟ قالي ياكما يحسابليك غنسكنو هنا جينا غير البارح حيت الدار عامرة والصداع والحضية.قلت ليه حتى لغدا ونمشيو قالي لا دابا يالاه نوضي المعكازة بدلي حوايجك ويالاه.فقت دوشت غير لحمي بزربة حيت زربني مخلانيش ندوش على خاطري ونغسل ونتوضا ونصاوب شعري زعما راني عروسة مخاصنيش نمشي مبهدلة.المهم قاديت شوي واخا غير قليل المهم منمشيش وجهي صفر ومشينا تلقاو لينا بالصلاة والسلام كان قريب المغرب هشام حطني ومكاملاش ربع ساعة خرج.وبقيت انا معاهم كلشي مجموع جات ماما كتسولني مقدرتش نقوليها رآه داكشي معجبنيش قالي امدرا قلت ليها مزيان.حتى لهنا نقدر نقول كانت الأمور ماااابيهاش.دازت 3ايام والدار خوات والعائلة لي بعاد مشاو ومشاو خواتات هشام 2 لي مزوجات وبقاو جوج وحدة مزوجة ومطلقة بجوج ولاد ووحدة قدي باقا بلا زواج.المهم كنت ناعسة داك الصباح حسيت بهشام فاق قلت ليه مالك قالي انمشي لخدمة شحال من نهار ممشيت بغيت نقوليه ولكن زعما حنا عرسان المفروض نسافرو واخا غير سيمانة ماشي تمشي تخدم .وأنا نقوليه باقي الحال قالي رآه 8 هادي
خاصني نمشي لماكازا (هشام عندو مكازا ديال السلعة ليكسبور والدجينات لامارك)المهم لبس وخرج شوي سمعت الباب تحل حتى وقفات عليا مرات عمي قالتلي تبارك الله على عروستنا مزال ناعسة ياكما بغيتي نجيب ليك الفطور لبيت انا كيحسابلي كتضحك قلت ليها حاشة اخالتي قالتلي اوا يا بنيتي داك الراجل لي مشا بلا فطور علامن عارو.انا ملقيت باش نجاوبها قالتلي اوا اليوم داز خاصك تفيقي قبل منو فطريه وعاد يمشي يخدم ماشي يخرج بلا فطور قلت ليها صافي اخالتي غير الداني نعاس غدا أن شاءالله نوجد ليه الفطور.قالتلي وا نوضي رآه عندنا مايدار بقيت مصدومة من الطريقة لي هضرت معايا بيها وضرني خاطري ومكرهتش نعيط لماما نقولها ليها ولكن لا غير غنبرزطها.لبست بيجامتي وجمعت شعري وخرجت لقيت مرات عمي فالكوزينة كتوجد الفطور عاونتها وقاديت الطابلة وهي تجي بنتها لي مطلقة سميتها سومية قالت ليها مالك فايقة كن دابا ارتاحي راك عييتي هاد اليومين قالتليها لا راني عندي غرض غنخرج نقضيه داكشي علاش فقت.فطرت بالزربة وقالت لمها ماما بلا متفيقي رجاء رآه كتوصي قالتلي خليوني ناعسة كان ضارها راسها البارح نعسات معطلة قالت ليها أمها ايه مرضات بنيتي عوينة ضرباتها.المهم فطرنا وخرجات سومية وبقيت انا ومرات عمي قالتلي إيمان جمعي راسك غنخملو الدار رآه بقات الروينة مور العرس وانا شدتني البكية حيت انا مزال عروسة حشومة عليها تعطيني تمارة من دابا.مشينا لصالة لكبيرة وبدينا نهزو فسدادر ملي كنهز انا كترخي عليا بحال إلى هازاه بوحدي وداكشي مصنع تقيل.حسيت بيها ناوية تعدبني وكنقول اش درت ليها فهمت بلي كانت باغا خدامة فابور تشقى ومتقولش اححح وتشقى عليها هي وبناتها لي مكيحطوش يديهم فالما بارد هاديك المطلقة غير داخلة خارجة والأخرى غير التلفازة
تبرد دفارها ونعاس وانا نتسخر عليهم ونشقى عليهم والراجل يا حسرة مرة بايت فالدار مرة يجيني سكران.وحتى ماما مكنمشيش عندها إلى بغيت نشوفها كتعيط ليها مرات عمي كتجي عندي نشوفها.وملي كنقول لماما شنو كيديرو كتبقى تصبرني.قهراتني مرات عمي بتمارة حتى وليت مكنلقاش الجهد نمشط حتى شعري اما إلى جاو الضياف مكيشوفونيش حيت من صبح الله وانا فالكوزينة كنشقى حتى يمشيو وبناتها جالسين على جموع والضحك.حسيت بالحكرة ومكاينش لي يعاوني عرفت علاش اختاروني نكون مرات ولدهم حيت عارفين مكاينش لي يحامي مني وعارفين ماما مرا دريويشة مغلوبة على أمرها.دازت 5 شهور وانا فالعداب 5 شهور وانا ساكتة وصابرة واحد نهار غيزغبني الله قالتلي مرات عمي ديري شيحاجة قلت ليها عييت اخالتي حتى لغدا قالتلي لا اليوم قلت ليها قليها لرجاء رآه غير جالسة وهي تشعل معايا اوااااااا كيفاش نقولها لرجاء ياكما بغيتيها تشقى عليك قلت ليها متشقاش عليا تشقى غير على رأسها وتعاوني شوي رآه عييت بزاف قالتلي رجاء دابا فدار باها حتى تمشي لدار راجلها وتشقى.بقيت مصدومة قلت ليها خالتي واش منبقاش فيك كندير كلشي قالتلي انتي فيك التبوحيط ياك كنشقى معاك كلشي.عطاتني السم وخلاتني كنتشوا ملي جا هشام فليل قلت ليه هشام هضر مع خالتي ترخف عليا شوي راني عييت وخواتاتك مكديرو والو بقا كيغوت عليا قالي مدخلينيش فشغال العيالات.بقيت ليلة كاملة كنبكي وهاكا كندوز شحال من ليلة.فهاد الشهر حسيت براسي ماشي حتى لهيه مغيرة وليت غير سخفانة ومكناكل والو قلتها لمرات عمي داتني لطبيب قالي حاملة معرفت نفرح ولا نبكي حيت انا معدبة علاش نعدب معايا هادشي لي فكرشي.قلتها لماما وانا كنبكي قالتلي سكتي الهبيلة دابا غيتبدل كلشي ماي غتولدي.المهم فالشهر الأول كتعرفو المرض ديال الوحم
المرض ديال الوحم ومحنوش فيا مكنقدر نأكل والو جوع والوقوف والشقا ومقدروش يقولو حشومة البنت كتوحم نشوفوها واش مشهية شي حاجة ولا ارتاحي أ ايمان راك حاملة.مكاين حتى حاجة من هادشي.فالشهر التاني انا باقا مريضة وزادني هم آخر هشام مبقاش هو هداك هو اصلا مكانش هو هداك ولكن زاد تغير ولا قليل فين كيجي لدار ولا جا كيجي سكران مكيحاشيها ليا مكيخرجني مكيكسيني وزايدني بالهضرة الخايبة شوفي حالتك كيدايرة وغير كيعيب فيا وانا فين هو الجهد لي ننتهلا فراسي من جهة تمارة كنسالي كنبغي غير نرتاح ومن جهة الوحم جاني واعر والمرض ديالو.من بعد خرج ليا الهم الكبير هشام كيعرف شي وحدة وهي لي متلفاه ومدوخاه والصدمة الكبيرة هي موب وخواتاتو عارفين ومكيقولو والو والكارثة هي هاد القح... صاحبت اختو المطلقة .وليت حالتي حالة متبغيهاش لعدوك الهم من كل جهة داز شحال من شهر وليت معاهم فصداع ليل ونهار مكنشقاش حيت تقلت وحلفت ما نحط يدي فشي حاجة وملي كيجي هشام كندابز معاه كيقولي إلى عجبك الحال جلسي معجبك سيري بحالك. وأنا كنقول فين غنمشي ماما يالاه مقاتلة مع الزمان نزيدها بهمي وهم لي فكرشي.حتى واحد ليلة انا فبيتي كنسمع الضحك خرجت لقيت هشام وخواتاتو وصاحبتو مجمعين قلت ليه أش هادشي قالي كيفما كتشوفي تزايدت انا وياه فالهضرة وبديت نعاير فديك الخانزة قالي جمعي فمك كنبغيها وغندزوج بيها قلت ليه وانا قالي انتي هانتي هنا مالك اش خاصك قلت ليه خاصني كلشي قلت ليها انتي مبان ليك غير راجل مزوج قالتلي شغلي هدا شكوووون انتي اصلا لي كتهضري معايا هاكا.وخواتاتو ساكتين عاجبهم الحال.طلعت لبيتي كنبكي لبست جلابتي وهبطت مشافونيش مشيت لدارنا حالتي عالم بيها غير الله وكرشي لفمي ماما شافتني تخلعات غير دخلت بقيت نبكي بحال شي حمقة وماما وخواتاتي
ماما وخواتاتي كيسكتو فيا وانا حسيت بالقهرة والحكرة وكلشي دوزت يومين وقلت غيتاصلو بيا ولا يجي عندي شي حد مسوقوش ليا ومعقلوش عليا بحال إلى كانو كيتسناو هاد نهار عرفت بلي كانو باغين نبقى غير ساكتة ونشقى عليهم بحال حمار الطاحونة منهضر منتشكا ونهار هضرت وقلت مندير والو بناتك حتى هوما يشقاو عطاوها ليا للسم اما هشام عرفت مزيان بلي انا عندو زايد ناقص من نهار الأول ومعمرو داها فيا وغير دار خاطر والديه لي جابو ليه خدامة لدار. داز شهر وانا فدارنا ومسولوش فيا وليت بحال شي مسطية غير ساهية وكنشوف حتى الماكلة بزز باش كناكل غير على قبل لي فكرشي منعدبوش.جاني الوجع وداتني ماما لسبيطار غير وصلت دخلوني لبلاصة لولادة ولدت بنيتة ملي شفتها نسيت الألم والحريق ونسيت الهم ونسيت الدنيا كلها ملي خرجت من بلاصة الولادة قالتلي ماما واش نعيط ليهم نقوليه راك ولدتي قلت ليها لا ومنهضروش فهادشي دابا دوزت يومين فسبيطار وخرجت.ماما مسكينة مقصراتش معايا واخا على القد الحال كطيب ليا ومهليا فيا انا وبنتي وحتى فليل كنعيا وننعس وهي كتبات مقابلة بنتي إلى فاقت.جاو الجارات دخلو يباركو وبطبيعة الحال ضروري من الأسئلة لي كتقتل وانا غير كنتلف فالهضرة.دازت 20 يوم ولا هشام لا دارهم سولو فيا وانا غير فالدار كنخمم فحياتي وكيفاش تدمرات وكنقول مع راسي اشنو غيوقع .واحد نهار جات واحد المرا من العائلة وبقات متعاود لينا قالت ليا كنت مشيت لدار عمك وسولتهم عليك قالو ليا عليك العجب قلت ليها اش قالو جاوبتني قالتلي الحاجة قهراتني مرات هشام غير نعاس والعكز وزايدها بقلة الحيا مكتحش من حتى واحد حتى انا كتقابل معايا بالمعيور.انا تصدمت ملي سمعت هاد الهضرة خصوصا من هاد المرا مفيهاش الكدوب وعندها غير نيشان واصلا هادوك ليهود يقدرو يقولو
يقدرو يقولو و يديرو أي حاجة.المهم ملي مشات المرا بقيت انا وماما وماما كتهضر معصبة وانا ساكتة قالتلي هضري قولي شي حاجة قلت ليها غدا غنمشي نرفع دعوة طلاق ماما قالتلي لا بنتي ناس مغيسكتوش بالهضرة قلت ليها لي بغا يقول شي حاجة يقولها واش آماما بغيتي نرجع عندهم وهوما معمرهم سولو فيا واخا عرفوني ولدت واش بغيتي نهز بنتي ونمشي عندهم مدلولة.شوفي آماما انا غنقلب على خدمة وغنعيش بنتي وهادوك اليهود معمري نشوفهم.داكشي ليكان مشيت درت دعوة الطلاق وشحال ديال الطلوع والهبوط ولكن متعطلناش حيت حتى هو قال باغي يطلق المهم سجل البنت فالحالة المدنية. وفرمشة عين كلشي سالا بحال إلى معمر شيحاجة كانت طلقني هشام بحال إلى كنت متقلة عليه ومحاولش حتى يشوف بنتو ولا يسول عليها قدما ارتاحيت من هاد الكلب وتريكتو قدما كنت كنتعدب حيت كنفكر فلي جايني من بعد وليت كنخرج نقلب على خدمة كنفيق بكري نرضع بنتي ونبدل ليها ونخليها مرة لماما مرة لوحدة من خواتاتي ونخرج وملي نعيا نرجع بزز باش لقيت واحد الشركة ديال الخياطة دخلت كندير الفينيسيو من بعد حيت كنت قارية على لبنات لي معايا وليت كندير كنترولة واخا كنضل واقفة وتمارة ملي كنتخلص كنرتاح دازت 5 شهور من بعد ما ولدت وفينما كيضيق بيا الحال كنشوف ملاك بنتي كنسى همي وكنزيد نقول ياربي تعطيني الجهد باش نربي بنتي ومنخليها تحتاج حتى حاجة ونعاون حتى ماما لي هازة معايا الهم.وفهاد الوقت كامل معمر دار عمي سولو ولا جاو طلو على بنتهم حتى النفقة خديتها غير شهرين ومن بعد مشفت والو.واحد نهار خارجة من الخدمة هو يدوز من قدامي هشام فالطوموبيل هو وهاديك...... كيضحكو حسيت بالحرقة حيت شمتوني وخربقو ليا حياتي هو ومو وخواتاتو كنت عايشة ماعليا
ماعليا مابيا حتى داوني خدامة عليهم والإهانة والتمارة وفالآخر ولاو كيشوفو ولدهم كيجيب صاحبتو حتى لدار سيفطوني ببنتي بحال إلى معمري كنت معاهم.هاد المرة ملي شفت هشام مرضت حيت هو عايش حياتو ومبرع هو وهاديك ويا حسرة باش بدلني كون غير كانت شي زين أولا ضربات على شعا بالماكياج واللباس وكملت عليا 1 لبنت كتعرفو قالتلي رآه تزوج.هاد نهار كنت تخلصت مشيت شريت شي حوايج ديال الوقت ومشيت لدار ماما والبنات مفهمو والو قلت ليهم حتى انا غنعيش حياتي وغنتهلا فراسي وغنلوح داك اللبس ديال الشارفات وجلالب.فالصباح لبست الدجين مزير وقاديت وطلقت شعري وخرجت ملي بديت غادة للخدمة وانا كنسمع الهضرة لي يقول زين ولي يقول تبارك الله ولي يقول صباح زين.وانا كنتمشى بحال إلى كنعفط على بنادم وفبالي 3حوايج بنتي ملاك وحياتي لي خاصني نعيشها وعائلة هشام ميشوفونيش مكرفسة ولا مبهدلة.ملي دخلت للخدمة بنادم مفهم والو كيفاش حتى تبدلت ديما كنجي غير جليليبة وشعري مجموع ووجهي مفيه والو حتى جيت اليوم وحدة أخرى.بقيت هاكا ومرة مرة كنهز بنتي ونخرج غير انا وهي مبغيتهاش تحرم من حتى حاجة واخا مزال صغيرة. المهم الشاف ديالي عينيه زاغو ملي شافني تبدلت وكتعرفو مرا مطلقة وبقا صغيرة كتبان دجاجة بكامونها المهم الشاف حولني لبوسط آخر مرتاح وفيه خلاص اكتر وهادشي زاد عاوني وريحني زدت فمصروف الدار وزدت تفركست كنت مرة مرة كندوز من قدام مكازا ديال هشام غير باش يشوفني باش يعرف ملي طلقني عاد رتاحيت وتهنيت ماشي راني جالسة كنبكي.واحد نهار كانت واحد البنت خدامة معايا عندها عيد ميلاد ومشيت عندها لبست سليم والطالون والشعر مصاوب ومطلوق دازت الحفلة وملي كنت راجعة دزت من قدام المكازا ديال هشام هو وقف بالطوموبيل خرج جا الوجه فالوجه هشام بقا غير كيشوف
بقا غير كيشوف وانا دورت وجهي وفتو وكنشوف بطرف عيني بأن ليا دار كيشوف اكيد ضرو راسو مشيت وانا عاجبني الحال حيت لي كنت باغاه وقع وأخيرا شافني ودابا الله يعطيه الغراق ومعمري نشوفو.دازت شي سيمانة خرجت فالعشية من خدمة ومشيت لدار بانت ليا واحد الطوموبيل بحال ديال هشام وقلت ميمكنش اش غدير هنا ملي دخلت قالتلي اختي راني شفت هشام فالحومة.قلت مع راسي اكيد شداتو الصنارة وبغا يشوفني مرة أخرى وحلفت حتى نرد ليه الضربة بالتاني والمتني.نهار آخر دزت من نفس الطريق ديالو ولبست احسن من المرة الأخرى وربي وقف معايا حتى هاد المرة مع هو خارج من المكازا مع انا دايزة هزيت تلفون كنهضر مع واحد البنت وكنضحك ودرت راسي مشفتوش وانا عندي خطة فراسي حالفة حتى نديرها ملي بعدت قطعت مع صاحبتي وبديت نتمشى عادي بلا منبقا ندور فقزيبتي مافيا لي يتبعني شي حمار شوي وقفت عليا طوموبيل يااااااسلام هشام نزل بالزربة وجا عندي قاليا اش هاد الحالة دايرة فراسك خليتو كيهضر ومشيت هو يجي قاليا وهو كيغوت راني كنهضر معاك قلت ليه وشكون انت لي كتهضر معايا قالي بلا هاد الهضرة إلى طلقنا رآه كنبقى بات بنتك وانا نطلقها بوااااحد الضحكة قلت ليه شكون بنتك واش كتعرفها حتى كيدايرة ولا واش واكلة ولا مريضة سير شوف ليك علامن دير الرجلة ديالك أما أنا داز داك الزمان لي كنتي كتغسل فيا رجليك وانا ساكتة وانت آخر واحد فهاد الدنيا عندو الحق يدخل فيا.هو يقولي اه إلى انتي معنديش الحق ندخل فيك ولكن بنتي عندي الحق فيها وبغيت نشوفها.خليتو كيهضر وبغيت نمشي قاليا وقفي رآه هضرت معاك بغيت نشوف ملاك.وانا عرفتو الغرض ديالو ماشي ملاك الغرض ديالو انا لي شافني تبدلت ومبقيتش هاديك البنت البلدية لي كتلبس لي كان وماعندها غرض فراسها وعلى طبيعتها هو باغي زواق
هو باغي زواق هاهو لقاه عندي وكيفما عدبني غنعدبو وهاديك القح...حالفة حتى نرجع ليها حياتها كحلة كيفما شتتات ليا العش.المهم ملي شفتو لاصق قلت غنبدا الخطة ديالي وقلت نهبط كواريا شوي حيت خاصني نرطب ماشي نهربو.حاولت نتهدن وقلت ليه هاديك بنتك وانا ماشي بنت الحرام باش نمنعك منها إلى بغيتي تشوفها سير عند ماما قاليا:علاه ماشي انتي لي مقابلة بنتك قلتليه:انا خدامة قالي فاش:قلتليه ماشي شغلك وخليتو واقف ومشيت.حسيت بلي بديت نوقف على رجليا ومبقيتش هاديك الخوافة والمحكورة.المهم دازت شي يومين كنت فدار حتى سمعنا الدقان ختي كانت فالسطح هبطت كتجري قالتلي هشام فالباب قلت ليها حلي عليه وانا مشيت بالزربة لبيتي حاولت نفيق ملوكتي وبالزربة بدلت بيجامة لبست وحدة زوينة مزيرة والفوقاني قصير وجمعت شعري عشوائي وبقا جالس هو شي 10 دقايق جالس سمعتو قال لماما بغيت نشوف ملاك شوي جات عندي ماما قلت ليها قوليليه هاهي كتفيقها وغتجيبها.قالتلي ماما بالزربة من قبيلة كيتسنا قلت ليها خلي جدو مرصود ياما تسنيتو انا ومعقلش عليا.المهم هزيت بنوتي وخرجت عندو اكيد بقا كيطلع ويهبط حيت موالف يشوفني بالبيجامات ديال الشارفات لي كانت كتشري ليا مو.وصلت حداه وعطيتو البنت شدها بقا يبوس فيها ويلعب معاها وتقول حتى هي عرفاتو بقات ساكتة مبكاتش ليه وجاب معاه شحال من كريطينة شاري لبنتو داكشي زوين ديال وليدات صغار انا مبقيتش معاهم وحيت موصية ماما والبنات يهضرو معاه عادي ويديرو صواب واخا يكونو كارهينو.نضت ودخلت لبيتي حسيت بيه مكرهش يقولي بقاي ولكن ميقدرش.دخلت لبيت وتكيت وانا كنضحك حيت هشام جا ادن شداتو النشبة.المهم من بعد مشا خرجت عند ماما قالتلي غير فهميني اش كيدور فراسك قلت ليها دابا تفرجي آماما غير لي قلتها ليكم بلا متعكسو معايا
)بلا متعكسو معايا.صافي آماما خليني نشوف شنو جايب فهادشي بقيت نقلب فداكشي وانا الابتسامة على وجهي.قالتلي ماما رآه هشام سول إكرام اختك فين خدامة وقالت ليه.امممم سي هشام باغي مزال يشوفني حتى انا مغنحرموش مني.الغد كان الاتنين مشيت لخدمتي عادي وفالعشية لقيتو كيتسناني نزل من طوموبيل قالي بغيت نهضر معاك قلت ليه معندنا فاش نهضرو قالي لا عندنا فاش بغيت نهضر معاك على ملاك. قلتليه شنو قالي طلعي طوموبيل ونهضرو قلت ليه أش بيني وبينك حتى نطلع معاك وياك انت مزوج سييييير أولد عمي لتشوفك مراتك وتخاصم عليك.هشام بدأ يتشوا قالي إيمان بلا هاد الهضرة ركبي نهضرو ومراتي ماشي غتمنعني نهضر مع أم بنتي.سكت هو يحل باب طوموبيل وركبت هههههه انا كيتحل ليا باب طوموبيل هاد الطوموبيل لي ركبت فيها مرات محسوبين وكنركب لور حيت كانت مو كتركب حداه.المهم ركبت وجا ديمارا مشينا لواحد كافي. واش سمعتو البنات هشام داني لكافي ههه هي هاديك جلسنا هو غير كيدخل ويخرج فالهضرة كيقولي ملاك نشوفها اه حقا نديها عندي شي يومين قلتليه نسى بغيتي تشوفها اجي ليها اما تديها عند هاديك مراتك نونونو منتيقش فيها لي تخطف الرجال تقدر دير أي حاجة.بقا غير كيدور فعينيه شوي قالي شوف إيمان انا معجبنيش هاد الخدمة لي انتي فيها قلت ليه علاش واش شفتيني خدامة فبار ولا كنبيع لحمي خدامة بعرق كتافي الحمد لله شنو كنتي باغي نبقى جالسة وماما تصرف عليا وعلى بنتك.قاليا دابا هضرتي هانتي قلتي بنتك انا غنصرف عليها وحتى انتي أمها مايخصك والو قلت ليه صرف على بنتك اما انا ممحتاجاكش.وانا فنفسي ماشي هادشي لي ناوية باغا نحلب طاسيلتو ونتفو كيفما كان مكرفسني انا وكيصرف على هاديك ومبرعها. شوي قالي إيمان حتى هاد تغيير لي تغيرتي معجبنيش اشنو غيقولو ناس غير طلقتي ودرتي
غير طلقتي ودرتي هاد الحالة.قلتليه مالها حالتي كيفجاتك وحتى واحد ميقدر يقول فيا شي كلمة وزيدون اهشام انت متهضرش معايا فشي حاجة بعيدة عليك قلتي باغي نهضر على البنت ماشي على حياتي انا حرة وندير لي بغيت قاليا لا ماشي حرة انتي أم بنتي وبنت عمي ويلا هضر فيك شي واحد خايب غتولي ليا معيورة.قلت ليه خاصني نمشي تعطلت قاليا نوصلك ونشوف ملاك قلت ليه يالاه ملي قربنا لدار داز لواحد باتيسري كبير خدا حلاوي وعصيرات قالي مندخلش على البنات يدي خاويين وانا غير ساكتة وكنقول فخاطري غير جبد إلى عندك ماتجبد هداك غير رزق بنتي لي كنتي كتخسرو على الخانزات.وصلني حتى لباب الدار ودخلنا ماما بقات غير كتشوف عطاها داكشي وهز ملاك كيلعب معاها وشوي ناض قالي بسلامة.بقيت انا كنعاود لماما قالتلي رآه جيران غيبداو يهضرو ملي يشوفوك جاية معاه قلتليها لي بغا يقول شي حاجة يقولها حتى واحد من هاد جيران معاش معايا محنتي وانا دابا آخر حاجة نفكر فيها هي هضرت ناس.المهم بقينا هاكا مرة مرة هشام كيجي يشوف بنتو وفينما يجي يجي محمل.ولكن هادشي مقنعنيش ماشي غرضي هاد تفاتف خاصني صحيح وخاصني مراتو دوق داكشي لي شرباتو ليا. واحد ليلة ماما كانت بايتة عند واحد خالتي هي والبنات قلت غنجبدو ولي ليها ليها مع شي 12 ديال ليل صونيت ليه قلت ليه اجي ملاك طلعت ليها سخانة و ماما لي مولفة تعاوني على هادشي مكايناش .لبست بيجامة مأنتكا وشعري شي مجموع شي مطلوق.وشديت ملاك بقيت خاشياها فصدري حتى سخنات سخونة عادية شوي وصل عندي قالي ياك لباس قلت ليه معرفتش جاتني فيها سخانة ومعرفت شنو ندير تلفت بدأ يقلب فيها قالي اه دافية. (وهي حبيبتي معندها والو غير حيت غطيتها وخشيتها فيا)قالي نمشيو طبيب قلت ليه راني عطيتها واحد خنيشة ديال سخانة نصبرو 10 دقايق إلى