لا لليأس نعم للأمل - نصائح تحفيزية بالدارجة المغربية

 

 لا لليأس نعم للأمل - نصائح تحفيزية رائعة

ماتفقديس الامل

لا لليأس نعم للأمل

عارفة بلي بزاف ديال البنات عاناو،فشلو،تحطمو وبزاف دالحاجات وقعو ليهوم فهاد الحياة حتى يأسو وفقدو الأمل بمرة،انا اليوم جيت باش ننزع دوك الجذور ديال اليأس فقلبكوم وعقلكوم وبلاصتهوم نزرع ذرة من الأمل باش تقدرو تزيدو للقدام وتنجحو وتحققو اهدافكم ان شاء الله

-أول حاجة الحياة ماشي ساهلة ومادارتش باش تعاش ساهلة،هي دارت باش نتقاتلو فيها،ندمرو على الحاجة لي بغيناها ونحيدوها من فم السبع،دارت باش نصبرو فيها ونخدمو ونسهرو ونتعبو للدنيا وللأخرة ايضا طبعا يعني مانساو حتى جانب

-ايلا متقاتلتيش على الحاجة بلا ما تيأسي،ايلا ماكنتيش اصلا انسانة حربية بلاما تجي تبكي عليا وتقولي ليا يأست اسامية،حيث هادي حاجة ماشي منطقية طبعا وغتكوني غير كتخربقي وماغتوصلي لفيين،ديري بعدا مجهود،خدمي على الحاجة لي بغيتي عاد نشوفو النتائج...

-باراكا من الاعذارباراكا ماتبنيو حواجز بينكوم وبين احلامكوم،باراكا ماتقولي لاء شنو دارو كاع لي قراو،لاء مغنخدمش،لاء مغانوصلش،لاء معنديش فلوس...الاعذار ازوينة غير ديال الجبناء وصافي،أما الناس الحربيين كيتقاتلو على الحاجة وفالاخير كيديرو بلاصتهوم فالمجتمع،كيخدمو،كيديرو فلوس وكيعيشو حياتهوم

*ضروري اي وحدة فينا تكون كدوز من مراحل حزن ويأس،ولكن بلاتي نسولك!بغيتي تنجحي فحياتك ياك؟باغا تكون عندك خدمتك،طوموبيلتك،دارك،فلوس،ميكاب،حوايج،يشوفوك واليديك كيفما بغاو ياك؟!!

ايوا شكاتسناي نوضي مزقي داك اليأس وبداي تخدمي،بداي ديري مجهود،ركزي فقرايتك هي مستقبالك،كنتي جالسة غير فالدار،نوضي ديري باك حر،قرااااي،قراااي،ديري مشروع ديالك...عطا الله الطرق باش نوصلو ونحققو اهدافنا،متقوليش ليا لاء منقدرش! لا نتي غالطة بزاف،نتي قادرة اه قادرة غير بداي،سمعي مني عافاك،بداي من جديد وماغاتندميش،ربي مغيخيبكش،ربي غيعاونك،غير وكلي ليه امرك وحاشا واش يخيبك سبحانه!

كيقول المثل(سبب اعبدي وانا نعينك)فهميه وطبقيه

-متنسايش الجانب الديني طبعا،غدي روحك بالصلاة،قراي القرآن،حفظيه ايلا بغيتي،صومي...توكلي على الله ودعي ومايكون غير الخير ان شاء الله

فنعم للأمل لا لليأس

بزاااف ديال الحب والامل

تعديل المقال