✎ بقلم : نهيلة سليمي ♡
لنبدأ بسم الله
قراءة ممتعة الأجزاء الرابعة :
وهي مسكينة كتبكي وترغب فيه، عرفتو حسيت بالأرض دارت بيا وما بقايتش قادرة حتى نبكي ولا نقول شي حاجة، ورجعت هبطت مع الدروج بلا حوايج بلا فلوس بلا والو، يا الله الجلابة اللي فوق ظهري صافي، ومشيت كندور في الزناقي حتى وصلت للأوطوروت، واعملت أوطو سطوب.
وهنا غاديا تبدا ملي مشيت عند أمي الفايزة وجلست معاها هي وبنتها، غير دازت ثلاث أيام وهوما يضغطو عليّ باش نبدى نخدم معاهم في الدعارة، كانوا كيجي عندهم كل نهاية أسبوع رجلين أو رجل وكيدوزو معاهم الليل كامل في التقسار والشراب والفساد، تصوروا أن الأم كتمارس الجنس هي وبنتها في بلاصة وحدة ومع راجل واحد في نفس الوقت، ما عمرني في حياتي ما كنت كنظن أنه كاينين شي ناس بهاد الوقاحة وهاد السفالة وهاد الحيوانية، وملي ضغطو عليّ بزاف فكرت نخرج نمشي نقلب على شي بلاصة أخرى، ولكن شفت أنني قربت نولد وما عنديش فين نمشي، بالخصوص أنني ما عمرني خرجت من دارنا للزناقي ولا شي بلاصة خايبة حتى وقعات لي الواقعة، وصبرت وجلست معاهم، واضطريت نمارس الجنس مع رجال كيجيو عند "أمي الفايزة" وكنت كنبقى مع الراجل فيهم بلا عقل بلا إحساس بلا أي حاجة، بحال شي مونيكة كيعمل فيها هو ما بغى ويمشي في الصباح بحالو، وكنبقى نبكي كاع الوقت، هاديك الأيام خلاتني نعرف بأن الرجال ديال المغرب ذئاب وأشرار وحيوانات ما كاينش بحالهم، كيشوفك الراجل حاملة وكرشك كبيرة قداش، وهو طالع فوقك ما كيفكر ما كيقول هاد بنت الناس مالها وعلاش هي بحال هكذا، كرهت الرجال وحقدت عليهم وما عمرني نحمل شي راجل حتى نموت ونلقى الله، تصورو أنني ملي كنقول لشي واحد فيهم عافاك أخويا راني حاملة ما تّقلش عليّ كيقول لي دابا تولدي عشرة إلى مشى ليك هذا، أو كيفرض علي الممارسة بطريقة شادة باش ما تحبسوش كرشي، المهم ما بغيتش نهضر ليكم بزاف على هاد الحالة اللي عشتها واللي كنتمنى من الله يغفرها لي لأنني ما كنتش لاقيا شي حل آخر من غير نسكت ونصبر ونحدر راسي.
من بعد مشات الأيام وولدت بنت ولداتني قابلة في الدار، ودازت الولادة بفضل الله سالمة وبلا مشاكل، وبديت كنحس باللي راني اصبحت ثقيلة على الفايزة وعلى بنتها في هاديك الأيام، خصوصا أنهم هوما اللي كانو يشرو الحليب والليكوش والدواء للبنت، ومن بعد 60 يوم صافي نوضوني نخدم من جديد، وكتبقى فيا بنتي كتبكي وأنا ممنوع علي نوض من عند الرجال ونمشي نرضعها، حتى لواحد النهار كان معايا شاب باقي صغير وشافني غير ساكتة وما كنهضرش بزاف وما حاسة معاه بوالو، وهو يقول لي مسكين شي حاجة عندك أنتي ماشي طبيعية، وهي تبدا من عند الله بنتي تبكي وهو يقول لي شكون هاد البنت، قلت ليه بنتي، وهو يقول لي واش انتي مزوجة، قلت ليه لا راني حملت نتيجة غلطة دمرات لي حياتي كلها، وأنني كنت طالبة وبنت أسرة شريفة ومحافظة، وبقيت نبكي ونحكي ليه حتى بانو لي دموعو نزلو، وهو ينوض يلبس حوايجو وقال لي غاديا تنوضي دابا تهزي حوايجك وبنتك وتمشي معايا، غادي نهنّيك من هاد العيشة مرة وحدة، وسمحي لي على هاد الغلطة، أنا راني مبلي بالفساد ولكن راني ولد الناس
وكنخاف الله، عرفتو ما نقولش ليكم آش حسيت هاديك اللحظة، ونضت نجري جمعت حوايجي وهزيت بنتي بلا ما نبيّن للأمي الفايزة شي حاجة، وملي بغيت نخرج كانت هي وبنتها مع شي 02 رجال في الصالة سكرانين، وقلت ليها باللي راني غاديا مع هاداك السيد راه لقى لي خدمة، وصافي حتى هي في الصراحة فرحات لي بزاف وهزات بنتي وباستها وقالت لي تهلاي فيها وفي راسك، وخرجت مع الراجل، طلعنا للطوموبيل ديالو وداني مسكين لواحد الشركة ديال الخشب في بوسكورة، شركة كبيرة وصونا على العساس واخرج عندنا العساس وهو يقول ليه دخّل هاد السيدة عندك هي وبنتها وتهلا فيهم حتى نهار الإتنين راها غاديا تحدم معانا هنا في الشركة وما عندهاش في تجلس هاد اليومين، ودخلت مع هاداك العساس وهو راجل شيباني وتهلات فيا مراتو وقلت ليهم كيف قال لي عبد الكبير اللي جابني عندهم أنني مطلقة ومن مدينة برشيد.
صافي دازت الويكاند، ونهار الإثنين جا عبد الكبير وهو الشاف ديال الشركة وداني عند واحد السكرتيرة في الإدارة وقال ليها تعلمني نخدم في الريسيبسيون ونعمر الفاكتورات ونكونطرولي السلعة اللي كتخرج من الديبو، وفي النهاية ديال النهار الأول اعطاني مسكين 3000 درهم قال لي سيري اكري بيها في شي دار واعتابريها بحال السلف وقت ما رديتيها على خاطرك، ما كنتش كنصدق كاع هاد الشي اللي سايرة كانعيشو وكنخاف نكون غير كنحلم ونفيق ونلقى راسي في دار أمي الفايزة، ولكن مع الوقت عرفت باللي الله سبحانه وتعالى كاين وكيحس بالعباد ديالو، وأنه غفور رحيم، وكريت بيت في واحد السطح في سيدي معروف، وبديت كنخلي بنتي في حضانة قريبة من الدار،
وكنتهلى فيها وفي راسي، وحتى الدعوة اللي كانت النيابة العامة دارتها ضد يوسف اللي اضحك علي وحملني ما بقايتش شفت آش واقع فيها، واش شدوه واعتارف ليهم، واش اهرب وما لقاوهش ؟ ما عرفتش آش طاري من ورايا تمّا، صافي حاولت ننسى كلشي ونبدا من جديد على قبل بنتي، بنتي الي كنت كنكرهها واحد الكره كبير وكنشوف أنها سبب كلشي اللي واقع يا، ولكن مع الأيام وليت كنبغيها وكنموت عليها، وواحد النهار توحشت ماما بزاف وخوتي وقلت نتاصل بيها، ولكن المفاجأة كانت كبيرة.
ملي صافي استقريت في الخدمة ومشات حياتي مزيان، فكرت نتاصل بدارنا، لأنني توحشت ماما بزاف، وفعلا شارجيت الهاتف ديالي واتصلت بيها، وملي جاوباتني بقات تبكي تبكي بمجرد سمعات صوتي، وتبوس في التلفون وتقول لي فينك أبنتي راك سطيتيني من نهار غبرتي ما بقيت شفت النعاس، وبقات كتزاوك فيا وتقول لي فينك وفين عايشة، وملي احكيت ليها كلشي وقلت ليها راني ولات عندي بنية سميتها وصال، بقات كتبكي وتقول لي كيف عاملة بنيتك واش انتوما لاباس، قلت ليها الحمد لله، وأنا نسولها على اخوتي وبابا، وهي تبقى تبكي وسكتات، قلت ليها مالك جاوبيني ياك ما كاين باس، قالت لي خوتك لاباس عليهم كلهم، وباباك الله يرحمو البركة في راسك.
تعليقات
إرسال تعليق