القائمة الرئيسية

الصفحات

قصة كوميدية نوعا ما كتحكي عن مناقرات ومدابزات بين العجوزة المسمومة لي كتشوف مرات ولدها سراقة وشفرت ليها ولدها
والزوجة لي مكتسكتش عن حقها وكتقلي سم لعجوزتها وعاجبها حالها وكل مرة عاملين المقالب فبعضهم اما الزوج فلا حول ولا قوة له
بعنوان:أنا وعجوزتي
بقلم :دعاء ابن الفقيه
النوع:تشمل كوميديا تعلم المعيور وتعطي عبرة
تقديم
العجوزة هي انسان حتى هي من دم ولحم هي لي ولدات وربات هي الأم هي الحنان والعطف والحضن هي لي ربات راجلك وكبراتو
كاين تلات أنواع دالعجوزات عجوزة ضريفة منها مكاين تحسبك مرات ولدها بنتها وتعاملك مزيان ونوع تاني كتكون وسطية مرة تعاملك بالقباحة ولكن كتكون عزيزة عليها متبغيش لي يضرك
اما نوع تالت فكتشوف مرات ولدها سرقت ليها كبدتها كتغير وتبغي تبعدك كتكون أنانية لكن هاد الأنواع بتلاتة تقدر تتعامل معاهم بطريقة تخليهم مزينين معاك وكل واحد والقسمة والنصيب لي ليطيح فيه
كلام ناس كيف سوسة اذا دخلت تسوس كلشي الحقد والغيرة عامي الكل فهاد زمان فكيفاش اتعامل الزوجة الجديدة مع عجوزتها القاصحة وشنو سباب قصوحيتها وشنو الموقف دزوج لي ايطيح بين نارين نار زوجته ونار أمه
انا وعدوزتي

قصتي مع مراة راجلي


أنا وعجوزتي

يلاه نبدااااااااااااااااااااااااااااااااااو
في واحد دار كاينة فحي شعبي كانت واقفة فالكوزينة لابسة سبنية دحياتي ولابسة بيجامة كتغني وتتعوج وتلوز عاجبها راسها كانت فورمتها ماغليضة ماضعيفة متوسطة الطول ببشرة بيضاء لكن نقصت بيوضتها بسبب البخار دطياب مهليا فراسها بالمزيان وخا داز عام على زواجها كان اسمها ليس اسما على مسمى اسمها حنان العمر 26 عايشة فدار وحدة مع زوجها أنمار لي تسمى بالغلط بهاد الاسم بحكم ابوه كان عندو صاحبو بنفس الاسم أيامات الاستعمار كان فرنسي اوا بقا داك الاسم فذهنو.. باسمو بالغلط سماه عمرو 30 وكذلك كانت معاهم عجوزتها سهام لي فمها كترمي منو غا سهومة
حنان كتغني: يلالة ويامولاتي راني جالسة فداري ويالالة و ياسيدي راني مرى وبداري
_دارك اوا لهلا يحوشك ابنت خديجة هادي داري انا وابني
مسدت يدها من طحين وعملت يد فخصرها واليد تانية بدات تحركها :اوا هدي دار بنك وابنك جيت وخديتولك اعجوزتي الغزالة وحاجتو هي حاجتي وحاجتي هي حاجتو فهمتيها احب قلبي و زيدون غا كنت كنغني
_هههه ضحكتيني شقلتي ازين ديالي حاجتو هي حاجتك ونتي خديتيه مني اوا انا ولدتو حلالا طيبا ونتي سحرتي ليه باينة
_ايه الحبيبة سحرتلو وسحرتو بعويناتي بعويناتي القتالة والغمزة ديالي القرطاسة وفورمتي القنبولة
_ههههه شنو قنبولة هههه وراك غليضة كيف البورمة اذا حزقتي جوج حزقات تعمري البوطة كبيرة غا ولدي مسيكن تغصب فيك احياني عليه مسكين
_اوا احماتي انا كنت فنيونة غا تزوجت بولدك وانا نغلاض باينة رضعتيه حليب فاسد مع نتي طويلة لي كتاكليه كاتبقة حتى تسالا مدة صلاحية ديالو عاد توصل لكرشك
_اهاه يالفعة بزاف عليك أنا كانت عندي فورمة واعرة وطولة دعارضات الازياء لي كيبينوهم فتلفازة عارفاك كتغيري مني
_هاهاي سيري احنينتي نعسي على جنب الراحة انا نغير منك نتي


جلد على عضم ونخلي هاد الخير كلو هاهاي خليني نعجن لراجلي قرة عيني يجي يلقاني موجدة ليه مياكل
_هادي ماكلة هادي راها سم
_الله يبعدو علينا ويشافي لي مراض بيه



حنان
مشات لالة العجوزة كتجمع دار وتمسح الغبرة وهي كتنجرز اما حنان فطيبات طاجين وعملات فيه الحر مجهد وجدات طابلة وكيف العادة دخل الزوج أنمار مبتسم وفرحان حيت يلاه تخلص كيخدم موضف فشركة راتب ديالو كان عادي مكفيه فحياتو دخل للحمام غسل يدو ووجهو بعد ماقال السلام جلس وهو كيتسنا كيف العادة الشكاوا تنهال عليه من أمه وزوجته والقتال يبدأ على شكون طيب لكن استعجب علاش مبداوهاش جلسو والعجوزة سهام ابتسمت وتكلمت وهي كتشوف فحنان بشر:على سلامتك أولدي حبيبي هانتا الغدا انا طيبتو ليك بيديداتي
قطعتها حنان وتكلمت وهي كتتحلون:ايه احبيبي وانا عجنت ليك الخبز بيديداتي ورديتلو البال حتى طاب هانتا ذوق من يدي... قطعت طرف من الخبز ومداتوليه لفمو كلاه من يدها وقال:ايه تبارك الله عليك غزال
حنان شافت فعجوزتها كتقليلها سم:بصحتك وراحتك احبيبي هدشي لي كنت باغيا غايعجبك
ابتسمت سهام فوق نفسها ونيران الغيرة كتجري فعروقها:ايه ذوق من طاجين ديالي... قطعت الخبز وغمساتها وهزات بطاطة عوطاتها فيها عملاتهاليه ففمو كلاها وعامل ليهم الخاطر باش ميقولوش كيفرق بيناتهم وحد ميضحك على حد... غير ذاقها عينيه حمارو شد كأس الما ونزل عليه وقال بغضب:حر حر شكون طيب هادشي اح لساني تحرق
حنان:اوف انا نجيب ليك كأس حليب تبرد بيه هادي لالة مي( عجوزة)هي لي طيبتها كنعيا فيها راه هداك حر ولاخر فلفلة حمراء( تحميرة)ولكن هي ديما كتخربق بيناتهم ونوجد ليك متاكل بالخف
وقف بغضب وقال أنمار:مبغيت والو مي متبقاش تقربي لطياب صاف راك كبرتي رتاحيليك خلي حنان هي لي تفهم وطيب... خرج بلا غداء وحنان شافت فسهام هاد الأخيرة لي مرضاتش وقفت ودخلت لبيتها أما حنان فجلست تاكل طاجين لي اساسا هي كتحماق عليه حار


بقات سهام فبيتها كتخطط وتفصل باغا ترد لحنان داكشي لي عملتلها حسات بجوع خرجات لقاتها باقا كتاكل جلسات وكلات دغمة غلبها الحار وهي تنوض حنان للمطبخ هزات طاجين صغير ديجا طيباتو وحطاتو حداها هزات خبز وكلات دغمة وقالت:هاهوا هدا مفيهش الحار
شافت فيها سهام وبدات تاكل كملو غداهم وناضت حنان تغسل مويعنات اما سهام فدخلت لبيت حنان مباشرة لحمامها هزات شامبو دفلات فيه وخلطاتو هزات الماسك دالوجه كبات منو النص وهزات الكول دوا وكباتو فيه خلطاتو وحطاتو خرجات ومشات لصالون شعلات تلفازة وبدأت تتفرج خرجت حنان من المطبخ ودخلات لبيتها مباشرة للحمام بدأت تعمل فماسكات لوجهها حساتو كيحرقها مع ذلك خلاتو شوية تجهد مشات غسلاتو دغيا بماء بارد شافت فالمرايا تخلعت وجهها رجع كامل حمر تحرق ليها بالكول هزات قرعة دالماسك شمات وهي تحل عينيها ودموع نازلين:هنن وجهي... هننن ليهودية عملت الكول فيه هننن... والله حتى نشكم بيها لولدها... دخلات لدوش بدأت تغسل شعرها وتبكي على وجهها كملات وخرجت لبست سبنية دحياتي شافت فوجها كان حمر دهنات ليه كريم مرطب وخرجات جلست حداها تتفرج غاشافتها سهام وهي تتكلم بنبرة مختلطة مع ضحك:هه مال وجهك حمار رجعتي فحال الخنزير هكا كيكون هههه
حنان:والله ملي يجي أنمار حتى نقولها ليه
سهام:شنو علاه انا مالي هه انتي خلي الماسكات حتى يساليليهم تاريخ ولا تبقاي ديما عاملة شي زمرة فوجهك حتى تقلعت جلدة وفلخر تلصقي فيا انا... اوا لهلا يحييك ويطول زمان عليك
حنان:لفعة لفعة
سهام:لفعة وانقتلك بسمي السحارة
حنان:يقال السفيه لا ينطق الا بما فيه يعني انتي سحرتي لشيخي الله يرحمو باش تزوجك
سهام حطات يد على يد وبدات تعيبها:السفيه لا ينطق الا بما فيه هيهي لهلا يحييك البقرة
فهاد اللحظة بقاو كيتعايرو كيف العادة قدام تلفازة عوض يتفرجو فيها هي تفرجت فيهم




سهام
جا ليل ودخل أنمار غير شافوه جاو يجريو عندو
حنان:حبيبي شوف مك اش دارت ليا
سهام:كذابة كذابة هي لي حكات وجهها بليخة
حنان:هننن لالا هي
سهام:اخر يامك اسهام تجي بعلوكة وتضلمك
حنان:اهئ اهئ حبيبي قوليها تبعد مني واش انا حمقة نحك وجهي بليخة
سهام:حمقة ومقطعة الوراق
حنان :اوا اوا راك عيقتي
سهام:لا تي باقيلك غاضربيني
شد أنمار راسو وغوت بجهد قفزهم:سكتو واش متعرفوش تتناقشو بشوية عرفتو حلمي أنني نلقاكم شي نهار ناعسين ولا ساكتين معرفتش انا واش عندي هنا مي ومراتي ولا المرا وضرتها
سهام :ياك امصخوط الوالدين كتغوت عليا
بدأت تبكي حنان وقالت:علاش علاش ككنت فدار با كوكاع موقع ليا هاكا
أنمار:يارب يارب لاحول ولا قوة الا بالله العلي العظيم... خرج وخلاهم يتباكاو مشا للقهوة وجلس راسو دايخ بالمشاكل اما سهام مسحت دمعتها وقالت:اوف مثلت بزاف مهم بصحتك غسلتي شعرك بشامبو لي دفلت فيه
شافت فيها حنان وموسعة عينها بصدمة غا دخلت لبيتها وهي تجري للحمام عاودت غسلت شعرها ببديل شامبو ورمات شامبو فطارو


جانهار جديد فاقت سهام هي لولة وقفات وخشات رجلها فصندالة دالميكا وعينيها مغمضين بالعمش حسات برجلها حرقوها لكن مهتماتش بالامر دخلت غسلت وجهها وقامت بروتينها صباحي خرجت لقات الفطور موجد جلست وحاضيا حنان لتعمل ليها شي حاجة اما هاد الأخيرة فممسوقاش وكتغني حتى خرج انمار من بيتو معصب جلس وبداو فطورهم عادي كملو وخرج مشا لخدمتو بعد مخدا رضات امو
دخلت حنان لمطبخها و بدات كطيب الغدا وحاضيا عجوزتها لي جات تحيد صندالة من رجلها لصقت عيات تجبد وتجبد والو اما حنان فبدات كتضحك بجهد
سهام:ياكي اديك اللفعة انتي لي لصقتيها هاه
حنان:بالعما انا غانضت فصباح بكري وجدت فطور وحاضيا ساعة غاقربت الوقيتة لي كتفيقي فيها جيت وعملت واحد سائل قالك كيزول الجلد الميت من رجلين فصندالتك
سهام:الجلد الميت ولا الجلد الحي ابنت الحرام
حنان:بجوجهم اعجوزتي الغزالة هاها نخليك نطيب الغدا لراجلي حبيبي قرة عيني واب ولادي المستقبلي
سهام:الله يلكيها ليك العوجة امونيكة عيشورة
مشات حنان توجد الغدا اما سهام فمشات للحمام طلقت الما صخون على رجلها وبقات تجبد فصندالة زولت لولة وبقات واحلة مع تانية حتى زالت وجات مزدوحة فالأرض وقفت وكتدعي فحنان بدلت حوايجها وخرجت لقات حنان مشات تتسخر علات على دراعها وقالت هدا الوقت المناسب مشات عمرت الما فسطل بالت فيه وهزاتو وخا جاها تقيل قالت ماشي مشكل وقفات عند الباب كتسناها تجي بقات مدة ومزال مجات عيات واقفة شوية سمعت صوت سوارت هزات سطل كان كيعطعط بريحة بولها استعدات غير تحل الباب وهي تكب داك سطل كلو و المفاجئة كان انمار لي حل الباب اما حنان فيلاه كانت طالعة وكتلوز غا شافت المنظر شدات الضحكة بزز ومشات تجري :ويلي حبيبي اشواهادا ويلي حماتي
انمار:ماما عييت صابر ليك جمعي حوايجك انديك نكري ليك ف بلاصة اخرى


شدات سهام دموعها بسيف وقلبها بدا كيضرب بجهد حست فحال سكين تخشا فيها مشات لبيتها تجمع حوايجها اما هو فجلس وحط راسو بين يديه
حنان:زوجيا العزيز طلعات ليك صخانة واش انت بخير صافا صافا با اتكري لمك فبلاصة أخرى هاه
مقلتي راها شي نهار طيح متلقا لي يهزها ولا يدخل شفار ويسرقها واش انت بعقلك ولا سكران هاه واش انت مريض ولا حمق يا والله وباش كيحلفو العيالات الحرات بقيتي شفتيني انمشي معاها اهاه ماشي انا هي لي نخلي عجوزتي تخرج هاد شي ميبغيه لا الله لا عبدو وحتانا منبغيهاش لمي وكما تدين تدان وهانتا هاودني عمل عقلك
وقف انمار بغضب حس انها كتسبو هز يدو وسرفقها حتى دار حنكها خرجات سهام شدات فيه وكتبعدو منها:ها رضا ها سخط بعد من البنت واش حماقتي بعد
جمعت شعرها حنان وكبحت دموعها:واش تبغي لي يضرب بنتك هاه هه متبغيش ودبا كتضرب مراتك هادي هي لي يبغي يقول الحق تضربوه هادي مك وانت باغي تجري عليها اه انت حمق ومسخوط ماقلتي راها رباتني وكبراتني وكافحت عليا ماقلتي راها كبيرة صافي انت نسيتي كووولشي غا كبرتي وتقادو ليك كتفان أتخرجها ياسيدي داك شي بيني وبين عجوزتي ندابزو نتقاتلو داك شي شغلنا
انمار :'**** هاه مبغيتيش تسكتي انا انوريك...شدها من شعرها باغي ينتف ويضرب وسهام كتفك وحنان كتضرب فيه على حر من جهدها مفكاتهم حتى حمقوها توجه للباب وقال:هانتي اتشوفي اذا مجبتش لالاتك ال*** و نخليك خدامة عندها اقليلة الأدب
جا يخرج وهو يشوف حوايجو فازكين رجع دوش ولبس خرج اما سهام خدات حنان لبيتها وبداو يبكيو بجوجهم لولة حيت مضروبة وتانية حيت ولدها بغا يجري عليها

بقاو كيتباكاو فالبيت حتى تفشو ناضت حنان غسلت وجهها وجمعت شعكاكتها ولقمت اتاي حطاتو فصالون وجلسو كيشربوه
سهام:ميسحبليش انا عندك عزيزة
حنان:اودي يا ودي كاين شي حد ايبغي عجوزتو تترما فزنقة
سهام :ايه الله يرضي عليك ميبقيتي شوية
حنان:اه وانتي
سهام بخير
ولاول مرة كلسو بعقلهم تفرجو وصلت ساعة نعاسهم بغات حنان تنعس مع سهام لكن عجوزتها منعاتها وقالت:عمركي تخرجي من بيتك هداك بيتك انتي واذا معجبو حالو هو يخرج
دخلت لبيتها نعست وخدات بوصية عجوزتها
بضبط فالكافي كان كالس أنمار هو وصاحبو ويحاول يفاتحو بالموضوع حتى قال:احم صاحبي بغيت نخطب ختك
جواد( صديقو وجارو فالدار)اهاه منلقاش حسن منك مرحبا غا هو حتى نتشاور مع البنت
انمار :ايه ضروري تتشاور
جواد:ان شاء الله ميكون غا الخير احم ومراتك
انمار:كلمتي هي لي تكون وشرع عطانا ربعة و متخافش ختك اتعيش معززة مكرمة
جواد:ايه هاد شي مضمون فيك خليت ليك راحة
رجع جواد وانمار لدارهم كل واحد دخل لدار ومشا ينعس

جا صباح جديد فاقت حنان ناضت لقات انمار جاب صخرة وقالب دسكار والورد مافهمت والو قالت يمكن باغي يتصالح معاها عملات راسها مشافتش داكشي مشات وجدات الفطور وحطاتو وفيقات عجوزتها كلسو عاد جا انمار باس يد مو وطلب مسامحتها وقال:الواليدة المسامحة حقا مكانش عليا نعمل هذاك ولكن الشيطان ولد الحرام
سهام:الله يرضي عليك اوليدي صاف
كلس بلاصتو وقال:الواليدة عاقل بنت جارتنا فتيحة كنتي باغا تخبيها ليا وفلخر خديت بنت تانية
سهام:ايه عاقلة
انمار :ليوم بغيتك تمشي معايا نخطبها البارح طلبتها من خوها وليوم عطاني موافقتها مهم انمشي دبا للخدمة... شاف فحنان وضحك خرج اما هاد الأخيرة فتصمرات بلاصتها حسات فحال سطل دالما تكب عليها يسحب ليها غا كان كيهضر ساعا طبقها... حسات بدموعها اينزلو بدات ترجف وحدها وقلبها زادو دقاتو بدات رأية كتتضبب وصوت سهام كيعيط ليها كينقص... وجهها هرب منو دم ورجع صفر حسات براسها تقال ورجليها فاشلين... وطاحت من فوق الكرسي للارض... ناضت سهام مخلوعة مشات جابت الما و البصلة كتمسح ليها على وجهها لي كان متعرق وكتعمل ليها البصلة فنيفها باش تفيق حلات عينها برتقالة ودموع نازلين ليها هزات سكار وخشاتو ليها ففمها قالت احتمال يا سكر نزل يا طونسيو طلع... شوية بشوية بدات تبكي وقالت:ورقة طلاقي اتوصلو
سهام:كلسي قالك ورقة طلاق دبا خاصك تعرفي تتعاملي وتوري بنت فتيحة اش كتسواي
حنان كتهضر وتبكي:غشاتني بنت فتيحة كانت صاحبتي كنت كنهضر معاها و عرفتي ديما تسوسني من جهتك
سهام :تسوسك شناهوا
حنان:ايه كانت تقولي انتي كتهضري مع مها فتيحة وتسبيني وتعيبيني
سهام:الكافرة لوخرا هي مها فتيحة كانت كتقولي ولدك حالتو مهياش وفيه اتار السحر وكانت تقول عليك سحارة وكتشوفك عند الفقيه بوجمعة وكتهزي الفار وزيد زيد
حنان:الفار انا سراق زيت إذا شفتو نقد نلصق مع سقف بالخوف
سهام:ايه بنت الحرام والله لبقات فيها مكذبوش نهار قالو كلام ناس كيف سوس واذا بغيتي تتأكدي من شي حاجة تناقشي مع الشخص المعني ليوم نندم هاد فتيحة
وقفات حنان وعلات على كتافها:تسنايني نغسل وجهي ونهودو بجوج إذا منتفتش بنت فتيحة خدوج ميكونش اسمي حنان بنت ميلودة

مشات حنان غسلت وجهها ونزلات هي و عجوزتها دقو الباب بجهد غا حلت فتيحة نقزات عليها سهام ومع سهام باقا شادة فراسها اما فتيحة فتدعدعات بقات عليها غا هاك بلاك وحنان كتنتف غا سمعات حس خدوج بنت فتيحة وقفات وتصنعات البراءة:خدوج وا خدوج وتي عتقي دغيا
خرجت خدوج وجها خضر بالماسك كيف ضفضعة 🐸غا شافت حالت مها منتوفة وكلها مقمشة وسهام غا يدها لي مضروبين جات تجري باغا تفك محست براسها غا مزدوحة مع الأرض وحنان فوقها كتضرب وتنتف وتعض حتى تخلي دم سمعوهم جيران عياو يفكو مقدرش عيطو للبوليس جاو وهزوهم بربعة فسطافيك وداوهم المخفر خلاوهم واقفين شحال عاد دخلوهم وكلشي كيضحك على خدوج وجهها خضر مخلط مع دم
الكوميسير :اش واقع هنا
خدوج كتبكي وتنوح مع شافتو زوين وكتتبوحط:سيدي كوميسير جاو هاد ناس لدارنا وتعداو عليا انا ومي
حنان:بسم الله عليك ولهلا يحييك ويطول زمان عليك شفتيه زوين وقلتي اري نتحلون ونتبوحش يا الضفضعة يا خطافت رجال اسيدي كوميسير اذا عندك فين تهرب غا هرب هادي خطافت رجال
الكوميسير:سكتوو

ووو حتارمو راسكم عاودو اش وقع
فتيحة:اسيدي انا غادي نهضر بنتي مسكينة وردة ومفتحة
قطعتها سهام:وردة مفتحااا من نيتك وهادي هي حاسبا بنتها وردة فضية وهي خرية مطلية
ضرب يديه الكوميسير فالبيرو وقال:يا اتسكتو يا انحبسكم بربعة
حنان:انا انهضر هاد الضفضعة بغات تسرق لي راجلي سوسة بيني وبين عجوزتي وفرقتني على حبيبي وانا حاملة... ضارت وغمزت سهام
سهام:ايه اسيدي وبغات تطيح البيبي لي فكرش مرات ولدي
الكوميسير:عندكم
شي دليل... شاهد
سهام:الشاهد هو انا راني شفتها بعينيا لي غياكلهم دود

 والاخير
الكوميسير :وتمشيو ضربوهم هاكا هاه مكاينش حاجة اسمها دولة بربعة بيكم الحبس وحتى نشوفو قضية القتل المتعمد
حنان:لا اسيدي انا خديت حقي ومنبغيش ضلم اذا زدتي عاقبتيهم ايتظلمو هانبي انا حاملة وعجوزتي مرى كبيرة الله يخلي ليك ميمتك خلينا نخرجو
الكوميسير:عندكم
زهر قصتكم علاين فحالي انعيط لراجلك وتفاهمو معاه هنا اما انتو بجوج
خدوج:نعام احياتي
قرأتها فتيحة اما الكوميسير على يدو ووراها خاتمو:مزوج
خدوج :شرع عطا ربعة
الكوميسير :مكذبتش انت أولدي هز هادو نزلهم لتحت بيتهم تم انتو اري رقم تيليفون راجلك
حنان :هالا غا خلي نخاف لينوض صدع اخر
الكوميسير:اري ولا نزلكم عندهم
عطاتو حنان رقم صونا على انمار علمو بلي كاين جا يجري ومعصب دخل شدو الكوميسير وقال:خلي عائلتك تشرح ليك ونقص غضبك لتندم
خرج وخلا انمار عاقد حجبانو مشا وكلس وقال:شواقع هنا ياك ديما مقاتلين دبا نهار بغيت نخطب تعاونتو
بدأت سهام تعاود ليه على خطة فتيحة وبنتها وخططهم وهو غا كيسمع غا كملت قال:حمير انتو حمير ولهيلة حتى حمير طحتو فمصيدتها
سهام:كتقول على مك حمارة
انمار عاد عاق:ها لالا حشا زعمة انا حمار كنت باغي نخطبها اصلا مكاينش فحال حنان حنونة قلبي
حنان:وا مسحني مسحني ياك جبتي قالب سكار والورد وجيبو عند با وزيد عليه اتعاود صداق... خرجات وطلبات الاذن من الكوميسير قالها تمشي اما انمار شاف فمو وهي تقول:بلامتشوف فيا انت جبتيها فراسك وعاود ليها صداق وتعلم مرة جايا تجمع يديك
انمار:مي ولكن
سهام :هاا سخط هارضى يلاه نمشيو ووجد راسك باش تجبد لفلوس ياك كنتي ناوي تعاود صداق لخدوج وعطيه لمراتك زايد فيها يلاه
انمار:تستحق صراحة نهار مخلاتنيش نبعدك عليا وخافت عليا من سخط
النهاية
العبرة من القصة باينة عمرك تسمح لناس يدخلو فعلاقاتك مع شخص آخر بالإضافة انها عجوزتك عمرك تجري عليها واوريها حنانتك نهار يجبدها شي حد خرجي ليه انتي وخا كيفما كانت علاقتك معاها وخا هي تكون ممزياناش انتي دافعي عليها وشوية بشوية اترخف معاملتها كيف وقع مع حنان دافعت على سهام وهاهوما ولاو كيف الخواتات أو أم مع بنتها نتمنى القصة تكون عجبتكم نتلقاو فقصة جديدة وماتنساوش تكتبونا رايكم على القصة في تعليق لتحت .

تعليقات

⛔ ممنوع قراءة القصص المخيلة للاداب +18 فقط .