سلام عليكم حبيباتي نتمنا تعجبكوم هاد القصة
قصة مع عائلتي
أنا بنت سميتي حنان .. طول طفولتي ما استقريت فشي بلاصة بسباب الخدمة ديال بابا.. مع هو عسكري ديما كينتاقل .. عايشا مع أسرة متوسطة جوج خوت وأنا الصغيرة وسطهم .. الواليدة مسكينة ماقارياش ولكن واعية ..والواليد صعييب بزاف وعلا سبة وزيدها من لفوق كيسكر ..
أنا غادي نبدالكوم بطفولتي التعيسة وماساتي فالمراهقة
باقا كنعقل ملي كان عندي 5 سنين بلي كنت مفششة عند بابا .. ولكن كولشي تبدل منين خويا الكبير أنوار دار واحد لموشكيل .... هاد لموشكيل لي دار بدل بابا .. لحقاش واحد النهار
المشكيل لي دار خويا أنوار وهو ديك ساعة كان عندو 15 سرق الكارت كيشي ديال بابا و بقا كيهز لفلوس حتا لراس الشهر ما لقينا والو بابا تعصب وعرف بلي أنوار هو لي دارها حيت هو معروف بالزبايل والمشاكيل .. بابا جاليه نيشان ماقالو والو غير بدا عليه بالتفرشييييخ
والعصة هاك بالاك .. الوليدة مسكينة مافهمات والو بقات غير كاتبكي ما تقدرش تدخل .. أما أنا وخويا حسام بقينا غير كانشوفو وبدا الخوف من بابا كيدخل لقلوبنا ولا بحال شي وحش بالنسبة لينا ...
المهم خويا أنوار تبوط مزيان ونعسنا ديك الليلة بغيت نقول درنا راسنا ناعسيين ... فالصباح فقت انا اول وحدة..وكانت المفاجأة
.. لقيت خويا أنوار كيحل باب دار بشوية ... أنا غير شفتو مشيت عندو وبزاف ديال الأسئلة كادور فراسي علاش خويا فاق بكري؟ وهو غير نعاس وعلاش كيحل لباب؟..... المهم هو شافني ولا صفر وجرني لعندو بزربة وقالي بشوية : حنان ختي لعزيزة أنا خوك لكبير وتعزيز عليك ياك .. شوفي بغيتك ماتقولي لحتى واحد هادشي ... أنا مافهمت والو ولكن سولتو فين غادي. . بقا كيتفتف وبالي على وجهو الحزن وقالي وهو داير يدو على كتافي : حنان أنا غادي نمشي مابقيتش قادر نعيش معاكوم خاصني نمشي لواحد لبلاصة وتما غادي نعيش ونكون راسي ونعاود نجي نديكوم ونهربو من داك لوحش دبابا وماتبقاوش تخافو .. انا جاتني البكية وقلتلو بلي أن تواحشو وما يخلينيش ... وهو قالي بلي غادي يجي يشوفني مرا مرا ... وهو يجمع لوقفة وباسني وهبط معا دروج ... أنا خفت لايفيق بابا سديت الباب ورجعت لبلاصتي وكانفكر فشنو كايتسناني فالمستقبل وخويا أنوار لي كان بحال درع كادرق زبايلي انا وخويا حسام هاهو مشا ... من بعد ما فاق كلشي وانا باقا فالفراش دايرا رأسي ناسا .. وكيما توقعت بابا مشا نيشان لبيت ديال أنوار باش اكمل عليه .. ولكن منين مشا لقاه ماكينش جعر وبدا كيغوت ماما جات مالقاتش خويا بقات غير ساكتة بحالا كانت حاسة بلي هادشي ايوقع وكالعادة بابا دار فماما وبدا كيدربها وكيسبها وكيقوليها هادي تربيتك الزينا ... ومع دلك محاولش اقلب عليه خرج حتا جا مع النصصات دليل وهو سكران .. لموشكيل هو ماشي بحال سكاريا لوخرين كيجيو ونعسو هو جا وسبني انا وخويا حسام وبغا يضربنا وهي ماما جات باش تحامي علينا وشدها وبدا يدربها قدامنا ... . بقينا على ديك لحال 3 سنين ولا سمعنا خبار على خويا لا والو .. كلهوم حسبوه مات إلا أنا باقي عندي أمل بلي خويا ايرجع .... مانكدبش عليكوم ديك 3 سنين دقنا العداب ولمرارة وعلمنا أن لحياة مكفسا وماما وحسام فقدو الأمل فالحياة ولكن انا كنحلم بداكشي لي قالي أنوار .... كان هذا آخر عام لينا فديك لمدينة حيت بابا خاصو ينتاقل .. ماما كتجمع الحيل وكادير داكشي فالكراطن ..... أنا مشيت مع حسام باش نجيبو الإنتقال من المدرسة وتما دخل حسام عند لمدير وانا كنتسناه برا .. شوية شندي شي واحد وسدلي فمي وعيني أنا خفت وحاولت نقاوم .. هاد شخص بدا كيجري وهو هازني ولكن نزلني ومنين حيد يدو على عيني كان واحد الشخص ماتوقعتوش. .... كان خويا أنوار .. أنا فرحت وعنقتو وبديت نبكي .هو مسحلي دموعي وبدا كيسولني على ماما وحسام .. انا كنبكي ونعاود ونبكي ونزيد نعاود ليه على شحال عانينا منين مشا وخنونتي عمراتلي وجهي .. خويا تبسم ومسحا ليا هاد لحنان ديالو خلاني نزيد نبكي . وهادشي كامل وهو ساكت وكيسمعلي وفخر قالي انا مزيان وكنخدم وغادي نحقق الحلم ديالنا وقالي بلي غادي يتبعنا للمدينة لي انمشيو ليها باش نبقاو قراب .. واخا هو كان كيحاول يطمني ولكن بالي ولا فشكال وجهو دبال ومابقاوش عندو لحنوك وضعاف وباين عليه مريض ويديه حرشين .. هو كان كايضن أنني صغيرة وما كانفهمش ولكن بالعكس كنستوعب كولشي
سلمت عليه ورجعت لدار أنا وحسام ...
من بعد أسبوع رحلنا وهنا بدات الماشاكيييل ....
وصلنا وقريت تما 4 سنين وحنا مازال حالنا هو حالنا وبابا ولا شادو مع حسام وديما مزرقو .. ولكن ماما كانت كاتحاول تعيشنا فاجواء زوينة كانت كاتصايب لينا الشهيوات .. وتخلينا نشاركو فالعروض المدرسية غير بالسر حيت بابا ماكايبغيش. . ولكن انا قربت لسن المراهقة وهنا غادي بيانو معايا المشاكيل .. وليت كانخلي العداب لي فدار فالدار ومنين كنمشي نقرا كنشط وكندير بحالا ماكاين والو وكانتعامل ما الدراري هاد الأمر لي كون اعرفو بابا نولي من عداد الموتا .. امهم مع أنكم عارفين اش كنلقا فدار من الصداع والمشاكيل .. كانو كيحسدوني لبنات حيت كنقرا مزيان وسكوتيا ما كنهدرش بزف ودكشي ماشي عياقة غير بسباب القمع ديال بابا .. كانو لبنات كايبغيو يديرولي المشاكيل ويكرهو فيا الاساتدة ولكن كانو كيفشلو .. هاد لمعاملة عقداتني وكنت ديما كنمشي مور لمدرسة وكنبكي وكنقول ... علاش انا مابين الناس كيوقعلي هاكا شنو الذنب لي درت وكان هز رأسي للسما ويقول بيني وبين راسي ياااااا الله عاوني أنا تهت ماعرفتش أش كيتسناني ولكن بغيتو يكون زوين وبعيد على بابا ! وتما بدا التفكير ديالي كيتبدل وقلبي قصاح مابقيتش حنان البكاية .... ما بقا كيهمني والو لي بغا يتعامل معايا يتعامل ولي مابغاش الله اعاونو .. صافي كيهمني غير النجح ونفرح ماما. . ونتسنا خويا لي غبر وما بانلو اتار .. صافي وليت كي كايقولو شخصية غامضة وما كنهدر ما حتا واحد .. هادشي لي خلا لبنات يزيد يكرهوني ودازت السنين حتى رحلنا عاود تاني ... وهاد لمرا كان فعمري 14. .. وليت دماغ متفوقة فكولشي ولا عندي واحد الدكاء فشكل .. تصورو حتا وليت عندي قدرة الإقناع منين كايبغي بابا يحيح كان نقنعو وكيسكت ... ولا كيخرجني معاه للقهوة ومايقولي خوك حسام ماشي راجل .. نتي هي ولدي هنا وليت عزيزا عليه وما كايغوتش عليا وإلى بغات ماما ولا حسام منو شي حاجة كانقولهالو أنا وفنفس لوقت وليت كندعم ماما وحسام ... ماعرفتش منين جبت هاد القدرات كلها ولكن لي تأكدت منو هو أن ديك الدعوة لي دعيتها وأنا صغيرة تحققات ... أما بالنسبة لحياتي فالمدرسة تبدلات حيت كان كيقرا معايا واحد دري سميتو أيوب كان مربي وقراي كان ولد دارهوم وحشومي .. إلى هضر معاه شي حد كايحمار ويتزنك .. لموهيم كان لقدر ديما ملصقو فيا فيما كان شي عمل حنان وايوب .. حنان وايوب ..ديما ديما .. ولكن أنا كان كايجيني عادي .. وهو صراحة كان الشخص الوحيد لي كيدعمني ديما كيشجعني وكنا كانتعاونو ..حتال واحد نهار جا بابا يسول عليا فالمؤسسة وهو يلقاني مع أيوب فواحد لقاعة وكنخدمو .. هو شافني وقالي حنان وهو تخلطو عليا الامور وقلت ناريييي ميمتي مشيت فيها .... وكان داكشي لي ماتوقعتوش
دخل بابا ولقاني فالقاعة مع أيوب كانخدمو في كتوبة .. بابا قالي حنان .. أنا خفت بزاف ومقلت والو ما بقاش عندي لسان باش نهدر . قربت من بابا وقلت بيني وبين راسي إلى بغا يشوهني ويضربني حتا نرجعو لدار حسن ماشي قدام ايوب وقفت قدامو وأنا كنترعد .. وهو يحط يدو فوق كتفي وقالي بشوية : ههه حنان شكون هاد دري هاه .. ههه أنا مافهمت والو علاش بابا كيضحك . ولكن ماجوبتوش ما عرفت ما نقول خلاني بابا واقفة وصدمني مشا عند أيوب .. نارييييي اش ايقوليه .. مشا عندو وقالو : نتا كاتقرا مع بنتي . قالو أيوب اه قالو مزيان ايوا شنو سميتك. . بابا مجمع مع أيوب وكيهضرو وأنا مابقيت فاهما والو كانقول علاش مافرشخنيش ؟ واش كيمثل حتا لدار ويتفاهم معايا ؟ لموهم هادشي كامل ماتوقعتوش .. شوية وانا نسمع بابا قاليه داكشي لي ماعمرني تصورتو ايوقع ولا ايقولو بابا ... قالييه : مرحبا بيك فالعشية اجي تعشا معانا ،!!! أنا منكدبش عليكوم حسيت بحالا شي واحد سرفقتي .. واش هدا بابا ولا بدلوه .. واش هادشي كايوقع معايا انا .. صافي تهت بقيت ساكنة .. بابا مشا وبقيت معا أيوب وماكنهضرش ومصدومة .. حتى هضر هو وقالي باباك ضريف .. صافي كملنا داكشي لي درنا رجعت لدار وأنا كنقول موحال واش اجي أيوب واصلا بلاش .. ما بغيت حتا واحد يعرف عائلتي وخصوصا بلي بابا سكايري. . دازت واحد 5 دسوايع . سمعت الدقان فالباب . وفاش حليت لقيتو أيوب وهاز فيديه شي ميكا فيها شي حاجة .. انا حشمت وحسيت بشعور غريب خصوصاً وراني لابسا حوايج الدار ( اويلي ولد قيسمي عندما فالدار وايتعشا معانا ) حطات ماما اعشا وبابا كيشوف فيا ويضحك .. المهم تعشينا وسالينا ... أنا كنت نايضة نمشي فحالي نقضي شغالي وهو يقولي بابا : حناان ! حشومة هبطي مع أيوب وصليه شوية راه ضيفنا !. شفت فايوب لقيتو ولا حمر وكايشوف فالارض .. هبطت معاه وتمشينا شوية. . درت نشوف فيه لقيتو كشوف فيا .. دورت رأسي للجهة الأخرى وبقينا ساكتين .. وصلت لنص الطريق وهو يقولي : صافي غير رجعي دابا راه اليل وسيري دغيا حسن ماتوقعلك شي حاجة ونتي بوحدك ،، رجعت والطريق كاملا وانا كنفكر فاهد شي فهاد التغيير لي واضح علا بابا .. غادا وساهية .. حتى شندي شي حد وجرني لزنقة مضلمة خفت وبديت كنغوت ولكين سدلي فمي .. منين قاسو يديه فمي وبقيت كان نتنفس بجهد بنيفي شميت ريحة مألوفة بحال ريحة ..
شميت ريحة مألوفة بحال ريحة خويا أنوار .. ترخيت شوية وهو يطلقني درت نشوف وجهو ..كان هو أنوار كيما توقعت .. شفت فيه وهو يعنقني وبدا كيبكي هو هاد لمرة وقالي : حنان هادي نتي. ! تبارك الله كبرتي وزيانتي ! توحشتك أختي !! كان حتى هو كبر تكون عندو فوق 20 عام ولكن ولا ضعف ملي شفتو آخر مرة وجهو فيه غير لعضام وحوايجو مكشترين وشعرو مغوفل وباين فيه المرض بزااف . بقا في خويا وجاتني البكية .. وطلبت منو يرجع للدار ولكن مابغاش طلبتو بزاف و والو .. وأنا طيح لي فبالي فكرة علاش مانحاولش معاه يوريني فين عايش باش نبقا نشوفو .. المهم قنعتو و وراني فين ساكن .. وخسارة والله حتى خسارة ! قلبي ضرني وحسيت براسي صافي غادي توقعلي شي حاجة منين شفت خويا الحبيب فين عايش .. واحد لبيت مصاوب بالقزدير وشي شوية ديال الطوب .. ما عندو لا ما لا ضو لا والو عندو تما كارطونة فوقها الجورنال فازك .. واحد التوب ديال الكتان كلو تقابي وموسخ .. وما نقوليكمش على الريحة كيدايرا بحال شي زريبة ديال الحلالف .. ماقدرتش نتحمل ورجعت للدار كنجري وكنبكي. وصلت قدام لباب ومسحت دموعي ودخلت ماهضرتش معاهم. . اليل كامل وانا فايقة كنخمم . حتى وذن لفجر. نضت مشيت للماريو وهزيت كاشة ومخدة ودرتهوم فواحد لخنشة ومشيت للتلاجة وزيت داكشي لي ماكايخسرش دغية وعمرت الميكات وحطيت داكشي فدروج فطرت وهزيت شي فلوس كنت كانجمعهوم. . وخرجت ..كانجري كانجري. . وصلت لبراكت أنوار ودخلت لقيتو ناعس .مابغيتش نفيقو ..وطيت داكشي ورجعت للدار. . اووف الحمد لله ماشافني حتى واحد. . فالمدرسة شفت أيوب ومهضرتش معاه حيت أنا وياه ماكناه شي اصدقاء النييت غير مجرد زميل ..منين شافني هو جا كيسلم عليا بقا كيتمتم وكيقلب على شي حاجة يقولهاليا باش يهضر معايا .. وهو يقولي لعشا كان بنين ماماك كطيب مزيان .. دخلنا قرينا عادي .. من بعد أسبوع وأنا كنفيق بكري ونمشي ندي لخويا ياكل ..حسيت بالإرهاق ومرضت وطحت فالفراش .. داوني عند الطبيب قالهوم : بنتكوم عندها إرهاق جسدي حاد بسباب قلت النعاس وعندها انهاك بسباب مجهود جسدي وخاصها ترتاح وتغدا مزيان وماتمشيش تقرا حتى التحسن وهادو الأدوية لي خاصها تاخود. . أنا غير سمعت ديك لهضرة بلي مانخرجش أول حاجة فكرت فيها هو أنوار .... ولكن ..
فكرت فخويا أنوار وشكون غادي يعطيه ياكل. . ولكن مالقيت ماندير .. بقيت فبيتي ونعسيني بزز وأنا كون لقيت نطير عند خويا . 3يام وأنا هاكا فالنهار الرابع وما شي العشرة ونص دخلات ماما عندي وقالتلي راه أيوب جا وجابلي الدروس لي فاتوني أنا غير سمعت أيوب قاديت لجلسة وجمهت شعري .. دخل عندي وهو حشمان وياربي السلامة هاز 7 ديال الدفاتر. . ويلي شحال فاتني .. المهم سولني كي بقيت وداكشي ديال الصواب .. جلس فواحد لكرسي حدايا وكايوريني فالدروس .. مانكدبش علكوم ماقشعت والو فداكشي .. وبلا مانحس قتلو شرح ليا باركا من التفلسيف! .. شاف فيا وهو مصدوم بحالا خلعتو .. هي هادك 3دسوايع وهو يشرحلي أنا نعست وما عقلتش شنو وقع حتا فقت على الصوت ديال بابا وهو سكران وهاز فيديو ميكا فيها الديسير ودانون وعطاهالي وباسني .. ماما جات وكلاتني وخويا حسام حدايا كينقل ليا الدروس لدفاتري .. وااو أول مرة نحس بهاد الشعور .. هذا هو الدفئ والحنان العائلي حتى من بابا السكايري حسيت بيه حنين معايا. . وأنا كنتفكر الحنان تفكرت خويا الحنين أنوار !
اش غاندير خويا ماعندوش والبرد هادا لا ما لا نعمة .. شحال وأنا كنفكر .. حتى قررت بلي خاصني نقولها لماما ونعتارف بداكشي لي مخبيا هادي سنين .. إلى مادرتش هاكا اشنو لمصير ديال أنوار مسكين .. تشجعت وقلت لماما جا لوقت باش تعرفي واحد لحاجة .. شافت فيا ماما وقالت : واش على خوك أنوار. . أنا تصدمت كيفاش عرفات ماما واش عادي حاسة دالام ؟ قلت ليها كيفاش عرفتي .. وهي تقولي : راني سمعتو منين كان غادي ومقديتش نحبسو بغيتو يرتاح من باك وعرفتك نتي لي عارفا كولشي وانا عارفة بلي كاتشوفيه.. واخا ماعرفتش فين .. أنا بديت كنبكي وحسيت بالعجز ديال ماما والعداب ديالها وبديت كنسرسر وكانعاود ليها من طقطق حتى السلام عليكم. .
ناضت ماما كتجري وجدات التقدية والقفف ديال الماكلة ومشا معاها حسام .. أنا بقيت كنتسناهوم ارجعو باش اقولولي كيداير .. ولكن بعدا حسيت بلي رتاحيت من جيهتو .. 3 دسوايع داو وهما باقي ما رجعو ..
انا بديت كانخاف عليهوم ياكما خرج ليهوم شي شمكار فدوك زناقي . ياكما درباتهوم شي طوموبيل .. ياكما. . ياكما. .. بزاف ديال لبلانات كايدورو فراسي ...
شوية جا خويا حسام كيلهت وكيقول حنان ! حنان ! أنا نت واخا فيا دوما وراسي ضارني ..
قلتلو ياك لاباس غير بشوية راه بابا ناعس!
قالي : حنان !
جا حسام كايجري وكايقول حنان! حنان !
مشيت عندو ياك لاباس
قالي : حنان ! ان..وا..ر .انا. .ر ..أنوار ! مالو أنوار مالووووو ! بدا حسام كايبكي وقال بجهد وهو كايغوت : أنوار ! ماااااااااااات
!!!!!!!! أنا تصمت .. تحطمت .. صافي تشخشخت من لمزيان صافي كلشي مشا كل شي حلمت بيه كلشي واعدني بيه مشا مشااا .. ماتيقتش سرفقت حسام وقتلو باراكا من الكدوب وبديت كانجري حسيت بالحرارة فجسمي ما بقا لاع مرض لا والو وخرجت من الدار لقيت الشتا خيط من السما ما ديتها فحتى حاجة قدامي رعد كيضرب وأنا كنجري .. ودارت بيا الدنيا وكنت انطيح ولكن .. حبي لخويا عطاني القوة باش نزيد طريق كاملة وأنا كنقنع راسي بلي مستحيل خويا يموت
وصلت ... كانشوف ماما معنقا شي حاجة فالأرض وكاتبكي .. قربت بشوية .. خطوة بخطوة وأنا كنتوقع المجهول .. عرفتو شنو باني .. بانلي واحد الجثة زرقا ووجها مكمش و الجسم ضعيف بزاف والدم كايخرج من فمو ... منين شفت داك المنظر الشريط ديال حياتي بان قدامي .. تفكرت دوك السنوات لقليلة لي دوزت مع خويا أنوار .. بديت كنسمع صوتو كايقولي : حنان أنا معاك ماتحزنيش .. هادشي لي سمعت قبل ما نغيب ...
فقت لقيت راسي فالسبيطار نظت وراسي كيضرني بزاف .. خرجت من ديك الغرفة و ما عرفتش فين انا درت لقيت الممرضة كترجعني لبلاصتي .. سولتها اش كاين قالتلي بلي طلعات ليا السخانة وفقدت الوعي بسباب إنهيار عصبي وضربني لبرد بسباب الشتا .. الشتا! ! تفكرت أنوار وبديت كايغوت فين أنوار فين أنوار !! قاتلي تهدني راه دفنوه .. انا كنقول لا! لا! لاااااا ! صافي صعرت شديت لممرضة وقجيتها حتا جاو شدوني الاطبة وعطاوني حقنة مسكنة .. نعست واخا قاومت. ...
منين فقت لقيت راسي باقا فين كنت غير هاد لمرا حدايا شي واحد ماقدرتش نعرف شكون حيت باقا كانشوف اضبابة .. توضحاة ليا صورة .. أيوب لي حدايا وكيدير فيا شي شوفات فشكل ما فهمتش لمعنا ديالهوم .. ولكن انا سولتو علاش أنوار علاش ! قالي بلي قبل مايدفنوه شرحوه باش يعرفو سبب الوفاة .. لقاوه مريض بسرطان الرئة .. من مدة طويلة ..ديك ساعة عرفت بلي مني كان كايبالي مريض كان فيه السرطان .. ماقدرتش نتحمل وبديت كنغوت عاود تاني .. جا طبيب وبنجني مرة خرا ...
دازت 3 شهور وأنا فالسبيطار بسباب الحالة لي كنت فيها .. وطوال ديك المدة كان أيوب كيزورني .. حتى ولفت ..ومنين كيتعطل كنبقا نتسناه
و مني قاليهوم الطبيب بلي تحسنت ونقدر ناكل عادي .. جا ايوب كالعادة ولكن جابلي ... معاه الشكلاط وماشي أي شكلاط هاد الشكلاط كان كايجيبولي أنوار .. فاقو علياالمواجع وقتلو وأنا عيني فيهوم الدموع شكون قاليك بلي كايعجبني. . قالي : ما قاهالي حتى واحد ولكن انا كيعجبني قلت نجيبلك منو .. الخ بديت كندمع شوية ...
ماحسيت براسي .. حتى لقيت ايوب .. عنقنييي !!!!!
لقيت أيوب ... كيعنقني .. كيفاش؟ وعلاش؟ .. ماعرفتش ولكن لي عرفتو ديك الساعة هو أنني رتاحيت منين عنقني ... صافي طلقني وبقيت كانشوف فيه وكنتسناه يقول شي حاجة ...هو قالي ادوقيني من الشكلاط قتلو اه وبقينا كاناكلو فداك الشكلاط حتى سالينا . وهو يمشي فحالو. . بقيت واحد لقصماين وانا كانحاول نفكر ونستوعب هادشي لي وقع .. شوية تفكرت فين ماما ؟ فين حسام ؟ .. كان ديك الساعة 12:30 ونضت وخرجت من داك لبيت بشوية وجارا السيروم معايا .. حتى خرجات فيا واحد الممرضة وانا نبدا نتمتم وقلت ليها فيا الصهد وخرجت نشم لهوا وهي تقوليا حتى لصباح ونخرجك تمشاي وتشمي لهوا. . منين هضرات معايا استغليت لفرصة وسولتها علا ماما قاتلي بلي عمرها ماجات عندي. . انا استغربت وما فهمت والو ..
داز أسبوع وجا النهار لي انخرج فيه وهو يجي عندي حسام .. وداني للدار ..الطريق كاملا وهو ساكت ماهضرش معايا .. منين شتو هاكا حتى انا صقلت ...
وصلت للدار وانا نسولو فين ماما ؟ وفين بابا؟ قالي بلي بابا مشا للخدمة 3 شهور هادي وماجاش حيت مشا بعتا للكوسوفو .. وماما ناعسا فالبيت ..
أنا ديك لوقيتة بداو كيبانو عليا الشكوك ماما غير ناعسا فالبيت وماجاتش تشوفني ؟! هادشي عجيب مايمكنش شي أم بنتها فالسبيطار وما تمشيش عندها !
دخلت نضرب طلة علا ماما لقيتها كلها زرقا ومريضة وجهها صفر. . تخلعت وأنا نغوت ماما مالك!
هي غير شافتني قالت ليا حنان وهي كتبكي بالا ماتحرك .. انا تحنيت علا يديها كنبوسهوم وكانبكي وكانقوليها مااالك اش واقع ليك! جا حسام وخرجني من عندها وبدا كايعاودلي .. فكانت الصدما الكبرى بلي ماما منين مات خويا أنوار جهتها جلطة دماغية جزئية ومشات للسبيطار ومنين قالو ليها بلي حتى انا فالسبيطار وكاين حتيمال باش نموت .. تشللات !! اويلي ااااه علا ميمتي لحبيبة تشللات !! وباااش بالفقصة ...
أنا زدت نهاريت ومشيت لبيتي وكانقول اش هادشي انا كل المصايب طاحت فوق رأسي !! اش باقي مزال كثر من هاكا !!
دازت شهرين وسالا لعام انا حنان لبنت المتفوقة نجحت غير بالكشايف !
من مور داكشي بجوج سيمانات جا بابا .. وباقي كيسكر وكل ليلة يحرر فماما لعيشة ويسبها بالعجز ديالها .. وأنا كنسمع وكنتقطع عليها .. وفوق هادشي شغال الدار كلها عليا وانا يالاه كملت 15 عام ...
بدا لعام الثاني وداز حتى هو مكفس ونجحت بمعدل متوسط .. وغادي نطلع للليسي ..
وشكون لي كان داعمني فهاد السنين غير ايوب .. حتى وليت كنحس تجاه بواحد الشعور زوين وينبغي نبقا معاه أطول وقت ممكن .. من بعد دركت بلي راه كيعجبني ولكن ما كانش كايهمني الموضوع حيت فلخر كايبقا هادشي غير شعور .. مغاديش نموت إلى ماكانش أيوب ..
المهم فالصيف ومنين كنت كانسيقفالدار
طلع بابا وهو سكران وكايعيط حناااااان وزوايا حناااااان !
تفوو مال هدا عاوتاني .. طلع وكيف لعادة جاي وجايب معاه لخبارات وهو يقولي وجدي وجدي. . اش غانوجد .. وكااانت الصدمة وجديد الرحيل غادي نرحلو السمانة الجاية .... انا ماتوقعتش بلي مازال غادي نرحلو .. وتفكرت بلي عادي نتوحش أيوب والحومة والزناقي كلهم وحتى لبراكة لي كنت كاندوز ليها باش نشم ريحة خويا أنوار
لموهيم تقهرت وشنو لفرق اصلا انا ديما مقهورة .. فالعشية خرجت نتقدا شي حوايج وانا نشوف أيوب .. وبقيت كنفكر واش نقولو أن رحل .. لا لا لا لا . اصلا انا مامنعنيله والو علاش غادي نقولهاليه .. ممم ولكن حشومة حنا واخا هاكاك بحال لخوت ..ومشيت قلتها ليه .. السيد وجهو صفار وخضار وبانت عليه الدهشة وهو يقولي علاش غير بقاو انا. . ماكملش هضرتو وسكت لمهيم حسيت براسي أن بكي وانا نقوليه بسلاما بزربة ومشيت ..
جا لوقت باش نرحل ركبنا والطريق كاملا وانا كنبكي وكانقول مابقاش كتر من هادشي لي وقع !
ولكن ماكنتش عارفا بلي المصائب كايتسناوني تما. ..
وصلنا للمدينة الجديدة للرحلنا ليها وبديت لقرايا
كانو تما فاليسي شي بنات فشكل .. كيلبيسو حوايج مزيرين وصابغين شعرهم. . صراحة كانت أول مرة نشوف داك المنظر .. مارتاحيتش ليهوم كانو بحال شي عصابة من 3 ديال لبنات .. أميمة وشيماء وويصال .. أميمة هي الرئيسة ديال العصابة. . أول نهار جيت بداو كيسولوني فين ساكنة وفاش خدام بابا زعما واش لاباس عليا ولا لا .. انا كنت كانجاوب عادي ..وهما كيطلع ويهبط فيا .. مارتاحيتش لدوك الشوفات .. ودخلت نقرا وبقيت كانفكر ناري كون اعرفو هادو بلي بابا كيسكر.. غير مجرد التفكير ماستحملتوش ..ديك ساعة حسيت بالوحدة والفراغ هانا كل مرة فقنت وديما المشاكيل .. ولكن الحمد لله غير علا صحتي. .
دازو جوج سمانات وهو يبدأ يهضر معايا واحد الدري سميتو سفيان .. ولا كيشاركني الدروس وكايوقف معايا فالاستراحة .. ولكن عرفت من بعد بلي هو البوكوص ديالهوم والبنات كايبغيوه .. وهنا بدأت المشاكيل ولاو دوك العصابة ديال لبنات كيتقربو مني وبغاو نوليو صحابات .. وكايدوزو عليا وداكشي .. شوية منين كاتكون عندنا ساعة خاوية كيطلبوني نبقا معاهم قدام لباب. . شوية ولاو كايديوني لديور وأنا مافاهماش بلي كايحفرو ليا وباغيين يخرجو عليا. . من بعد 4 شهور وانا علا نفس لحال .. جا عندي سفيان وقالي بغيت نهضر معاك بوحدنا انا قتلو واخا .. المهم تمشينا فالساحة وهو يقولي بعدي من دوك لبنات راه خايبين عليك وغادي يخرجو عليك .. انا مافهمتش اش كان كيقصد ولكن هما شافوني معاه وجاتهوم لغيرة ولا كيسحابهوم بيني وبينو شي حاجة. .
من بعد هادشي ب 3 عرضوني لشي حفلة .. قلتها للبابا وماما وشريت كادو حيت قالولي حفلة ديال عيد ميلاد. . المهم وصلت لليسي كنتنلهوم باش يديوني للبلاصة لي فيها لحفلة. شوية وقفات قدامي واحد الطموبيل كحلا وواعرة هي واحد BM زوينة باينة غالية
تحل الجاج ديالها وهي تقولي أميمة يالاه طلعي باش نمشيو .. طلعت ووصلنا لواحد لفيلا .. دخلت بانو ليا البولات طافيين غير شي شمعات لي شاعلين والجو كيخلع تما انا خفت. . وهي تقولي أميمة وهي كضحك واحد الضحكة زادت خلعاتني . جلسي هنا وتسناي. . جلست فواحد لفوطوي رطب .انا مخلوعة .. ما كنتش عارفة بلي لي كابتسناني هاد ليلة واحد المجهول غير متوقع ... شوية. ...
شوية حيت بشي واحد من مورايا وحط يدو علا كتفي وقاليا افين الزين أنا خفت ودرت قتلو شكون نتا .. قالي ماعرفتينيش انا معاد .. انا شفتو بان ليا فيه سكران وقفت بزااف ! قلت علاش راجل شارف وسكان هنا ؟ جا وجلس حدايا وأنا نوقف ..وهو يشدني من يدي وجلسني بزز .. انا صافي خفت بصح شي حاجة ماشي هيا هاديك .. بدأ كيقربلي وانا كنغوت وكانغوت وحتى واحد مداها فيا وهو بدأ كايحاول يغتصبني .. وأنا كانقاوم. . أنا عرفت بلي جابوني هنا لهاد السبب! ! بقيت كنغوت وكنطلب الله ...
حاولت نقاومو وبديت كانبكي. . اش هاشي اشداني نجي لهنا .. غمضت عيني وبقيت كانغوت شوية طاح عليا وسخف مافهمت والو دفعتو من حدايا .. كنلقا سفيان ! ..الحمد لله عتقني ضرب داك الشارف بالمحبق وانا كنت انسخف هزني سفيان وخرج بيا من لفيلا
ركبنا فبيكالتو. . وصلني للحومة وقالي هاحنا هربنا اش وقع ليك ياكما دار ليك شي حاجة! قتليه لا مادارلي والو. . ولكن كيدرتي عرفتيني فين كنت .. قالي راه قلت ليك دوك لبنات خابت
هادشي علاش تبعتك.. ..شكرتو ورجعت لدار وانا خايفة وما كانتيقش ...
من بعد 5 شهور
قرب اسالي لعام وانا من داك شي لي وقع ماكانهضر مع حد غير مع سفيان
رجعت للدار ودخلت كيف العادة نسلم علا ماما ولكن .. منين جيت عندها لقيتها ناعسا ومابغاتش تفيق .. ماما مالك في!
ماما فيقي !!
والو مابغاتش تفيق .. انا دارت بيا دنيا ومابقيتش عارفة اش كايوقع .. ناري عنداك تموت ماما وتخليني اش انبقى ندير فهاد دنيا بلا بيها. . خرجت كانغوت واااا حسام .. حسااام !! عتق ماما. . ولكن حسام ماكاينش ... هزيت التليفون كانعيط على الإسعاف.. وكالعادة الإسعاف المغربية روطار بحال الحكومة!
منين وصلات ... كان فات لفوت ... صافي ميمتي حبيبتي لي رباتني وكبراتني وصبرات عليا. . ماما لي داقت لعداب والمرارة باش نكمل قرايتي أنا وخوتي.. آه ياربي الله أش درت فهاد الدنيا شنو دنبي! ! باش ترزيني فميمتي ضو عينيا ..
الواليدة ماتت بسكتة قلبية
هادشي علاش واخا كنت منهارة ومقهورة وحسيت بجناحي مكسورين. . قررت باش نكمل ومانوقفش باش التعب ديال ماما مايمشيش هباء منثورا. . وزدت صممت باش نولي طبيبة ديال لقلب ونعالج الاماهات فابور. ..
دازت الربعين على موت الوليدة
وانا باقا كاندير مافجهدي. .كانمشي نقرأ ونجي نقضي شغال الدار ونفيق الصباح نجمع الزبل ديال لقراعي حيت بابا منين ماتت ماما وهو كايجيب السكايريا يقصرو عندنا. ..
أما خويا حسام كان فالجامعة وكايقرا الحقوق ...
والى كمل هاد لعام ايشد الإجازة ... وأنا صابرة علا دوك لبنات لي ولاو كيسبوني منين ماقدوش اخرجو عليا. . ولي كان فجنبي غير سفيان لي حسيت بيه تعلق بيا وهادشي لي مابغيتش. .. صافي داز هاد العام مر والذكرى ديال ماما باقا فقلبي وحبي ليها كيعطيني القوة باش نستمر ... هادشي كامل لي داز فوق راسي وانا عاد كملت 17 .. طفولتي ومراهاقتي كلها عداب مالقيتش لوقت حتا باش نتفشش حتا انا بحال لبنات لوخرين... ما كانلبس مزيان ما كنمشط شعري ديما ضافراه. .. والحمد لله. ..
واخا دازو المصائب وقلت صافي قلال لعداب باقي ماسالت قصتي باقي تابعني لي ماعمرني تصورتو. . داك المجهول لخبيت تابعني ...
واحد نهار رجعت للدار لقيت خويا كيجمع حوايجو ... انا تعجبت علاش كيجمع حوايجو .. وفين بابا ... اش وقع ؟؟؟
لقيت خويا كيجمع حوايجو .... سولتو علاش كايجمع .. وهنا بداو المفاجآت عاوتاني
قالي بلي جراو علا بابا من العسكر حيت كان سكران فوقت العمل واختالس لفلوس. . وخاصنا نخويو الدار. .. هاناااري فين انمشيو وبابا ماشاري لينا دار حتى كي عباد الله .. مالقيت ماندير وسولتو فين بابا قالي بلي كايسكر فبيتو. .. انا تعصبت كيفاش كيسكر وحنا فهاد لحالة .. صافي غادي ندور فيه ولي بغا يوقع يوقع ... دقيت عليه وما جاوبنيش .. وأنا مدفع عليه الباب .. وهنا شفت داكشي لي ماتوقعتوش من إنسان جبان بحال بابا. ...
....
كاااان ...
انا غوت ...
جا حسام أشوف اش وآفاق! !! ..
بابا. ..
نتاحر! !!!!
مافهمت والو وبقيت كانشوف علاش ؟ علاش دار هاكا علاش شنق راصو ؟؟؟ علاش كايوقع هاكا ... وبزاف هادشي بزاااف ... انا عيييت ...
كانت فالأرض ورقة مكتوب فيها قراني ... هزيتها ولقيت بابا كاتب فيها. ...:::
~بنتي حنان. .ولدي حسام. سمحولي بزاف ولكن مانقدرش نكمل .. تسنيت لموت ومابغاتش تجي ..وقررت نمشي انا عندها. .. سمحولي على لي دوزت عليكوم. .. راني طول حياتي عشت الفقر وكان عندي سروال واحد. . و إلى تغديت ما نتعشاش .. و راني كنت متزوج قبل ماماكوم. . ولقيتها كاتخوني مع العساس ديال لعمارة. . هي فاش بديت كنشرب. . وصاحبي زوجني بمكم. . هي كانت ضريفة معايا .. وكاتعاملني مزيان وخاكا كنضربها وكنخرج فيها العقد ديالي. . عنداكم ضنو بلي ماعندي قلب. . راه من نهار خرج أنوار وأنا كنحس بالدنب ومنين مات تحطمت وهادشي لي خلاني نزيد نشرب. ... انا عندي وصية وحدة هي تسمحولي ..وراني كانبغيكوم واخا ماعمرني قلتها. .
ما تنساونيش ودعيو معا باكوم~
انا قريت داكشي وانا غرقت فدموعي ..علاش كيوليو ضريفين منين كايبغيو اموتو .. علاااش ولكن انا كانلومو ماكانش عليه انتاحر. . وفديك لورقة كان واحد العنوان ... جمعت حوايجي ..أما الأثاث بعناه لمول لبالي وبقينا بلان . ما بقالنا غير نشوفو اش كاين فداك لعنوان ... ركبنا فالطكسي وقلنالو يوصلنا لتما وهو بقا كايشوف فينا وقالينا اش غاديرو تما راه كاين غير زريبة مهجورة. .. المهم وصلنا ووقفنا قدام الزريبة .. وحنا واقفين سمعنا ....
وصلنا لديك زريبة وسمعت واحد الصوت. . حدا الباب وهو تخرج لينا واحد الشارفا .. وغير شافتنا وبدات كتبكي. . وأنا نقوليها اشريفة مالك؟ مافهمنا والو. . وهي تقولينا : مات ياكو ماات يك !! ياك احسام ياك احنان؟
اااااه ! فين كتعرفنا هاد لمرا وكيدارت عرفات سميتي ؟؟ مافهمت والو بقيت غير كايشوف .. وهي تقولينا دخلو ترتاحو وانشرح ليكوم كلشي .... دخلنا معاها ولقينا داكشي مكشتر ومبهدل والتبن مشتت هنا ولهيه والريحة ديال البهايم. . قلسنا على واحد السداري فالقنت. .. وهي شحال وغابرة. . جابت لينا لحليب والما وشي ليمونات وتفاحات
درنا الصواب وشربنا الما وهي جالسا الطلع وتهبط فينا وكدوز يدها على شعري .. شوية قالت لينا : انجيكوم نيشان اوليداتي. . باكم راااه! ولدي ..ااااا بابا ولدها هي هاي جداتي. .. وقالت : وانا كنت عارفة بلي هاد النهار إيجي. . راه من هدي كتر من 28 عام باكوم تزوج بمكوم وقالي بلي مايبقاش اجي لعندي حتا يموت كان مقلق مني حيت خبيت عليه بلي مرتو الأولى كانت كاتخونو. . ومن نهار هجرني كان كيسفتلي رسائل عليكوم وكل مرة كتولد فيها مكم. . وصاني نعطيكوم حقكم ديال لورث وبلي نتوما منين أموت هو اتجيو عندي وهانا اولداتي .. امانتكوم راها عندي. .
حنا بقينا غير كانشوفو مافهمنا والو دماغنا مشتت .. شوية ناضت هي وغبرات شي نص ساعة وانا وخويا كنشوفو فبعضياتنا وكنفكرو فشحال من حاجة ماكناش عارفينها ... جات وهي تعطيني واحد لكارط كيشي visa وباينا واعرة ومعاها وريقة فيها لكود وقالت لينا هاكو رزقكوم .. حلال ديوه . شديتها وطلبناها تمشي معنا ولكن مابغاتش وقالت لينا بلي ولفات بقيراتها وماتقدرش تمشي. . رجعنا للمدينة .. وشحال وحنا واقفين ماعرفناش فين نمشيو .. دانا خوينها .. اش غانديرو. . بقنا جالسين فوق الطروطوار ..وهي طيح ليا فبالي .. علاش مانمشيوش لبانكة ونشوفو شحال خلا لينا بابا ..
مشينا لبنك وخشينها ودخلنا لكود .. وأنا تقول معا راسي شحال ايكون عندو كاع 5 ولا 10 ديال لمليون إلى طار. . درنا الإطلاع على الرصيد وكانت المفاجأة ... ويليييي
صدق لواليد ملعق . وخانز فلوس عندو مليار ونص ... !!!!!!! ملياااار ونص اواااتاه منين جاتو هاد لفلوس جاني لفضول باش نعرف وطبعا غادي نبدا نبحت فالموضوع. ...
دازت 3شهور علا ديك لواقيعة شرينا دار ودرنا مشروع ديال مخبزة وشاط لخير والخمير. . كيما قلت ليكوم بديت كنحفر علا الماضي ديال بابا باش نعرف منين جاب دوك لفلوس. . مشيت كانسول عليه فلخدمة قالولي بلي ماجراوش عليه هو خدا تقاعد مبكر. .. اواااه مخرجوهش أو علاش خدا تقاعود. . زدت كنقلب وما عارفاش شنو انلقا فلخر ديال الطريق .. كنت غادة فطريق وكنفكر شنو ندير وكيندير نعرف منين جاب لفلوس .. شوية حسيت بلي تابعني شي حد .. كاندور ما كانلقا والو .. خفت وليت كنزرب فالمشية .. درت معا واحد الزنيقة وهو يخرجلي واحد وقالي شششش ماتخافيش إلى بغيتي تعرفي علاش باباك شد التقاعد انا نقوليك .. وأنا سمعت هاد لهضرة وافقت بلا تردد وردت معاه نتلاقاو فالمخبزة ديالنا حيت قالي الموضوع حساس. ..
المهم رجعت للدار وحطيت شكارتي ونزلت للمخبزة لقيتو .. جيت وبقينا كانهضرو شحال وصراحة تصدمت وقلت اوااااه واش انا فالموغرييب ولا فين ..صدق داك السيد صاحب بابا من الطفولة وفهمت من هضرتو بلي بابا كان رجل دولة وكايعرف شي امور فالسياسة خاطيرة وكان مخبر سري هادشي كان كيستوجب يعيش عادي وشبه فقير ..وهو نتاحر حيت عرف شي معلومات ماكانش خاصو يعرفهوم وطلبو منو يموت وكراو عليه لي يقتلو وهددوه بلي ايقتلوني انا وخويا إلى بقا حي هو ... انا فلول ماتقتش وقلت واش هذا كيتفلا عليا ولكن منين بدأ كايشرحلي داكشي بانلي كايهدر بصح ..يعنيراه دوك لفلوس هي داكشي لي كانو كيخلصوه منين كايجيب لخبارات ... انا قلت وايلي وايلي وا الوليد ماصدقش سويهل. . ولكن خسارة ما كانش خصني نقول لحتى واحد هاد لهضرة حيت معلومات سرية. . من بعد عام اخور شديت لباك وخويا ولا محامي ومخبزتنا ولاة مشهورة وحنا باقي ملعقين سبحان الله منين مات الوليد حياتنا تحسنات ..... مانعرف واش لي كايتسناني حسن ولا باقي المشاكيل
ماعرفتش شنو كايتسناني. . ولكن ياربي ايكون غير خير. .. من بعد 7 سنين خويا حسام ولا محامي مشهور بالخير كايدير القضايا الأسرية فابور. . وأنا شديت الدكتورة. .. ودخلت باش نتعلم الطب والتشريح ديال القلب. . وفكل لحظة كنت كانتفكر الناس لي ضحاو باش نوصل انا وخويا حسام. . كنتفكر أنوار وماما وحتى بابا لي كان قبيح. .. ولينا زايدين للقدام واوجاعي والامي لي عانيتهوم فطوفولتي ومراهقتي .. هاهما بداو تمشيو كنحس راسي بحالا كنحلم .. واش انا حنان .. ديك لبنت لخوافة .. لبكاية. . المقهورة والمحكورة لي ديما مهمومة واش انا هي حنان لي تحملات المسؤولية فسن صغير .. وكانو ايخرجو عليها. . آه كلشي تبدل انا دابا إنسانة جديدة. .
قررت نرجع للمدينة لي مات فيها خويا ونور عيني أنوار. . باش نتفكر الدكرايات وايوب حب طفولتي. .لي معمرني نسيتو. . رجعت وشفت فين كنت كانقرا فين كنت كانجري باش مانتعطلش فين كان. . ساكن أنوار فين...
فاقو عليا كل الأوجاع ونهاريت فالجردة لي حدا دارنا لقديمة وبقيت كنبكي بحرقة. . ياااه كون شافني أنوار فين وصلت وكي وليت يااااه كون شافتني ماما كون فتاخراة بيا .. ولكن باقي عندي خويا حسام. .. بقيت كنبكي .. حتى سمعت شي واحد قال حنان واش هادي نتي؟، اواااه واش باقي شي حد هنا عاقل عليا! ! درت وانا نشوف واحد دري فشبابو قريب لعمري وكايبانلي مؤلوف ... هو يتبسم .. اهيا هاد ضحيكا كنعرفها ... اااااا ميمكنش هدا ايووووب .. جمعت الوقفة وقتلو نتا أيوب قالي اه وشنو لموشكيل قتلو لا ماشي هاكاك ولكن كبرتي .. وهو يقولي وكون تشوفي رأسك حتا نتي كبرتي ولكن وليتي زوينا ..وأنا نغوت عليه علا مالي كنت خااايبة !!!! بدأ كيضحك وااو علا ضحكة عندو وقالي ههه لا كنتي زوينة وزيانيتي كتر. . انا حشمت وهو يبدل الموضوع وبدا كايسولني كيدايرا وفين كانسكن وداكشي وبدينا نهضرو. ..
وعرفت بلي ولا إستاد جامعي وكيخدم فمدينتي .. وهو يطيح فبالي سؤال .. إلى كان خدام فمدينتي اش كايدير هنا؟ ؟ سولتو وهو يقولي بلي كايجي يتفكرني هنا وشحال وهو كايقلب عليا .. انا فكرت علاش ايقلب عليا .. زرب عليا وقال .. حنان تزوجي بيا؟ ؟؟!!! اااااااااااه !!! ويلي !! انا تصرفقت ما هضرتش وهربت ...
بعد 3 جا لدارنا وخطبني من خويا ودرنا عرس متكتك. . ماتقوليكومش اشمن حلاوي واشمن عواصر .. واشمن زدحا والشطيح. . المهيم داز عرس ديال لحماقات. ..
دابا لي بغيت نقوليكوم ها أنا حققت أحلامي ودرت لي بغيت وخليت لماضي المكفس مورايا و نسيت كولشي وديتها غير فربي وداري وخدمتي. . بصح انا تعدبت ولكن فلخر كلشي مشا .. رآه حتى حاجة ماكادوم وربي ماكاينسا عبادو وكل دمعة سالت من عينك بليل رآه ربي حاس بيها ومخبيليك الخير فمخفي كان أعظم. .
كونو بحالي وصبرو ومتنساوش بلي انا ديما "متفائلة"
النهـاية 🧡🧡💚
تعليقات
إرسال تعليق